Pierachod na letni čas adbiare ŭ nas hadzinu snu. Jak padrychtavacca?

Pierachod na letni čas dajecca ciažej, čym na zimovy. Čamu tak?

Naturalny rytm bijałahičnaha hadzińnika — jak praviła, krychu daŭžejšy za 24 hadziny. Heta značyć, štodzień my schilnyja da taho, kab kłaścisia paźniej, čym treba. Takim čynam, «skačok napierad» idzie suprać naturalnaha rytmu cieła. Pa adčuvańniach jon padobny da źmieny časavych pajasoŭ: kali vy apynajeciesia ŭ inšaj krainie i vam składana prymusić siabie lehčy spać raniej, bo vy pryzvyčailisia da inšaha hrafika.

Ekśpierty źviartajuć uvahu na toje, što mnohija ludzi majuć niedasyp užo napiaredadni pierachodu na letni čas. Tamu paśla straty jašče adnoj hadziny jany akazvajucca siarod tych, chto pastajanna niedasypaje, — mahčyma, navat hetaha nie ŭśviedamlajučy. Siarod nastupstvaŭ mohuć być pavyšany kryviany cisk, ryzyka insultu abo atrymańnia vytvorčaj traŭmy. Heta nie kažučy pra prablemy z kancentracyjaj uvahi i psichičnym zdaroŭjem.

Voś što rajać doktary miedycyny Chiren Mazumdar i Dzipa Burman, jakija časta pracujuć z pacyjentami, čyj unutrany hadzińnik nie sinchranizavany z vonkavym časam.

Što možna zrabić, kab prystasavacca da pierachodu na letni čas

1. Nie pačynajcie z «niedachopu snu». Pierakanajciesia, što vy (i kali vy baćki, to i vaša dzicia) rehularna vysypajeciesia. Bolšaści darosłych patrebna ad siami da dzieviaci hadzin snu, kab narmalna pracavać. U dziaciej roznyja patreby ŭ śnie ŭ zaležnaści ad taho, kolki im hadoŭ.
2. Sačycie za režymam napiaredadni źmieny času. Kłaścisia spać na 15-20 chvilin raniej štonoč na praciahu tydnia, jaki papiaredničaje pieravodu hadzińnika, — idealna. Kali vy budziecie raniej pračynacca, heta dapamoža vam raniej zasnuć. Pastarajciesia pračnucca na hadzinu raniej, čym pryniata, u subotu — za dzień da pieravodu hadzińnika. Kali ŭ vas niama takoj mahčymaści, prosta prytrymlivajciesia stabilnaha hrafiku snu, bieź istotnych pierakosaŭ.
3. Vykarystoŭvajcie śviatło ŭ svaich intaresach. Śviatło — najmacniejšy sihnał dla naładaŭ unutranaha hadzińnika. Starajciesia być na jarkim śviatle paśla abudžeńnia, a kali vy žyviacie ŭ miescy, dzie naturalnaje aśviatleńnie pa ranicach abmiežavanaje, vykarystoŭvajcie štučnaje śviatło, kab sihnalizavać arhanizmu, što treba pračynacca raniej. Unočy źviadzicie da minimumu ŭździejańnie jarkaha śviatła i asabliva siniaha śviatła, što vypramieńvajecca ekranami elektronnych pryład. Jano moža źmianić rytm vašaha cieła, i na nastupny dzień vy pračniaciesia paźniej, čym treba. Uviečary ekrany možna zrabić bolš ćmianymi, kab jany vypramieńvali mienš śviatła.
4. Źviartajcie ŭvahu na svaje ranišnija i viačernija płany, bo jany niepasredna ŭpłyvajuć na režym snu. U noč pierad pieravodam hadzińnika lepš zapłanavać dobry son — dla hetaha ŭviečary treba supakoicca — naprykład, pačytać knihu ci pamiedytavać.
5. Uklučycie ŭ režym fizičnyja praktykavańni ranicaj ci na pačatku dnia — navat kali heta budzie tolki špacyr vakoł doma abo ofisa.
6. Padumajcie pra toje, kab pačać z bahataha na białok śniadanku, bo niedasypańnie moža pavysić apietyt i ciahu da praduktaŭ ź vialikaj kolkaściu vuhlavodaŭ i cukru.
7. Pastarajciesia nie ŭžyvać kafieinu  paśla abiedu, a niepasredna pierad snom — vino i inšyja vidy ałkaholu.
8. Pastarajciesia być ciarplivymi sa svaimi dziećmi, pakul jany prystasoŭvajucca da pierachodu na letni čas, — niekatorym dzieciam ciažej prystasavacca da źmieny času, čym inšym. Vy možacie zaŭvažyć bolš častyja zryvy, razdražnialnaść i stratu ŭvahi dy kancentracyi. Niachaj uviečary budzie bolš spakojnaha času, volnaha ad internetu i televizara. Padumajcie pra karotki 20-chvilinny son na pačatku dnia dla małych dziaciej, jakim moža być ciažka dać rady źmienie času.

Čytajcie jašče:

Što takoje «chutki son» i čamu jon samy važny dla vašaha samaadčuvańnia

Jak spać pa 7 hadzin i adčuvać siabie vyspanym

U Polščy janot panadziŭsia spać na lichtary

• 10
• 0
• 7
• 2
• 0
• 1
• 0
• 0