Vaskrasienski raspavioŭ, jak sustrakaŭsia z Pačobutam dziela jaho vyzvaleńnia
Juryj Vaskrasienski ŭ intervju prahramie «Panarama» raskazaŭ, jak pa inicyjatyvie polskich dypłamataŭ arhanizavaŭ sustreču z palitviaźniem, aktyvistam polskaj mienšaści ŭ Biełarusi Andrejem Pačobutam. Heta adbyłosia «prykładna paŭtara hoda tamu». Imavierna, pieramovy išli pra ŭmovy vyzvaleńnia i prymusovaha vyvazu Pačobuta ŭ Polšču.
«Pa prośbie polskaha boku ja źviarnuŭsia da śledčych orhanaŭ, i jany łaskava dazvolili sustrecca z Pačobutam utroch: Pačobut, polski pasoł i ja. Hetaja sustreča adbyłasia ŭ Śledčym kamitecie prykładna paŭtara hoda tamu z metaj narmalizacyi adnosin, spynieńnia eskałacyi», — kaža Vaskrasienski.
Ale, pavodle jaho, sustreča nie stała dla Vaskrasienskaha pryjemnaj. Pačobut nie byŭ spahadlivym z byłym členam štaba Babaryki.
«Jon pasprabavaŭ nakinucca na mianie, i atrymaŭ adpaviedny adpor», — zhadvaje Vaskrasienski, jakomu było, vidać, nie sałodka.
«Dla mianie da hetaha času zahadka, čamu jon tak pavodziŭ siabie. <…> Ja padumaŭ: moža, jon i ŭ Polšču nie žadaje viartacca (heta chłuślivaje śćviaržeńnie, Pačobut naradziŭsia ŭ Biełarusi i hramadzianin Biełarusi — NN)», — skazaŭ Vaskrasienski, jaki sam pracuje na łukašenkaŭskija śpiecsłužby i ŭchvalaje dziejańni ŭładaŭ.
U 2021 hodzie Biełaruś vyzvaliła troch aktyvistak polskaj mienšaści. Heta Hanna Panišava, Maryja Ciškoŭskaja i Irena Biarnackaja. Jany byli vysłanyja ź Biełarusi ŭ Polšču.
U sakaviku 2022 hoda kiraŭnicu niezarehistravanaha Sajuza palakaŭ Biełarusi Anžaliku Borys vyzvalili z-pad varty i pieraviali pad chatni aryšt.
9 lutaha na 8 hadoŭ kałonii asudzili žurnalista Andreja Pačobuta.
Polšča nie pakidaje sprobaŭ vyzvalić jaho. «Kali Andrej Pačobut zaŭtra budzie vyzvaleny, paślazaŭtra budzie adkryty prachod u Babroŭnikach», — skazaŭ ministr unutranych spraŭ i administracyi Polščy Maryjuš Kamiński.
Ciapier čytajuć
U Cierciela prahučaŭ novy akcent: «razradka ŭ cełym toj napružanaści» ŭ adnosinach z Polščaj i Bałtyjaj15
Kamientary