U Biełaviežskaj puščy bolš čym praz 40 hadoŭ znoŭ znajšli vielmi redki vid asaki
Doŭhi čas hierbarnyja ekzemplary asaki Buksbauma, sabranaj u pačatku 1980-ch hadoŭ, byli adzinym paćviardžeńniem taho, što hetaja raślina raście ŭ Biełaviežskaj puščy. A ŭ červieni hetaha hoda, praz bolš za 40 hadoŭ paśla pieršaj i adzinaj znachodki, jaje znoŭ znajšli ŭ tych samych miaścinach, jak paviedamlajecca na sajcie nacyjanalnaha parku.
Asaka Buksbauma (Carex buxbaumii Wahlenb.) — vyklučna redki dla Biełarusi bałotna-łuhavy vid raślin, jaki adnosicca da I katehoryi nacyjanalnaha pryrodaachoŭnaha značeńnia.
Pavodle apošniaha vydańnia Čyrvonaj knihi Biełarusi, da ciapierašniaha času dakładna viadomych miescaŭ, dzie ŭ našaj krainie dahetul raście hety vid, u našaj krainie niama, a bolšaja častka znachodak asaki Buksbauma maje daŭninu ŭ niekalki dziesiacihodździaŭ.
U Biełaviežskaj puščy asaku Buksbauma ŭpieršyniu znajšła ŭ 1981 hodzie puščanski batanik Volha Hrušeŭskaja, ale raślina była pamyłkova vyznačanaja jak asaka Hartmana (Carex hartmaniorum Cajander). Pieravyznačeńnie vidu ŭ puščanskim hierbaryi pravioŭ praź dziesiacihodździe supracoŭnik Instytuta ekśpierymientalnaj bataniki Arkadź Skuratovič.
Kamientary