U Homieli na voziery znoŭ sprabujuć pasialić Vałatazaŭryka
Na homielskim Vałataŭskim voziery znoŭ ustalavali fihuru Vałatazaŭryka, ź jakoj u minułym hodzie było šmat kłopatu i śmiechu. Tamu i sioletniaja padzieja ŭžo abrasła žartami. Homielcy spadziajucca, što ŭ hetym hodzie płactykava-mietaličny šaścimietrovy plezijazaŭr nikudy nie spłyvie i nie patonie, piša «Štodzień».
Pavodle źviestak u dziaržaŭnych miedyja, ideja stvareńnia kampazicyi naležała maleńkaj dziaŭčyncy Alinie. Nibyta jana sama patelefanavała na pramuju liniju kiraŭniku administracyi Centralnaha rajona i raskazała pra toje, što niadaŭna pahladzieła film «Moj chatni dynazaŭr» pra pryhody chłopčyka Anhusa, jaki žyŭ na bierazie voziera Łoch-Nies, i zachacieła takoha ž na radzimie.
Uładam ideja spadabałasia, i jany addali jaje praktyčnaje ŭvasableńnie ŭ ruki pryvatnaj firmy, jakaja i ŭziała na siabie finansavyja vydatki. U vyniku skulpturu zrabili ź mietaličnaha karkasa, na jaki płastami nanieśli admysłovy płastyk. Zrabili heta z metaj praduchileńnia źjaŭleńnia ržy dy akiśleńnia ŭ vadzie, a samaja ciažkaja častka, hałava, była stvoranaja z elemientami bietonu.
Pa bakach ad istoty raźmiaścili vializnyja baki, jakija pavinny byli vykonvać rolu papłaŭkoŭ, jakija b nie dazvalali abjektu pierakulicca. A kab kanstrukcyja nikudy nie spłyła, da dna voziera jaje «nadziejna» prymacavali łancuhami.
Ale ŭ realnaści Vałatazaŭryk pajšoŭ na dno amal adrazu paśla ŭstalavańnia, umomant staŭšy miemam.
Na zimu Vałatazaŭryka z voziera prybrali. I voś dniami jon znoŭ źjaviŭsia na Vałataŭskim voziery. Ciapier žychary rajona dy i ŭsiaho horada robiać ledź nie staŭki z nahody taho, jakija jašče pryhody čakajuć viadomaha ŭ horadzie plezijazaŭra hetym letam.
Ciapier čytajuć
Jany pajšli ad nas u 2025 hodzie. Zhadvajem biełarusaŭ, jakich my stracili3
Kamientary