Viadomaje ŭsim kafe ŭ samym centry Minska vystavili na prodaž. Cana — bolš za 2 miljony dalaraŭ
Na tarhi vystavili kafe «Załaty hrabieńčyk» na vulicy Lenina, jakim vałodaje «Trajpł». Infarmacyju pra heta na placoŭcy «Biełrealizacyja» zaŭvažyŭ Realt. Pačatkovaja cana — 6,7 miljona rubloŭ.
«Załaty hrabieńčyk» znachodzicca ŭ samym centry Minska — na vulicy Lenina, 3. Ustanova śpiecyjalizujecca na francuzskaj kuchni.
Kafe naležyć zasnavanamu Juryjem Čyžom «Trajpłu». «Załaty hrabieńčyk» — adzin z samych viadomych prajektaŭ kampanii ŭ śfiery hramadskaha charčavańnia.
Ustanovu vystavili na tarhi z usim abstalavańniem i meblaj.
Płošča — 790 kvadrataŭ. Pačatkovaja cana — 6 704 843 rubli, abo kala 2,23 młn dalaraŭ pa siońniašnim kursie. Tarhi buduć iści na panižeńnie da minimalnaha koštu ŭ 6 034 359 rubloŭ. Aŭkcyjon projdzie 4 žniŭnia.
Jakija jašče budynki i biznesy «Trajpła» ŭžo pradadzienyja i kamu?
Za apošni hod na aŭkcyjonach pradali i inšyja biznesy i majomaść «Trajpła».
Tak, u červieni 2022 hoda była pradadzienaja Łahojskaja palaŭniča-rybałoŭnaja haspadarka «Makaŭza». Kompleks za 641 tysiaču rubloŭ nabyła kampanija «Biełsiciojł», jakaja na 100% naležyć synu Juryja Čyža.
U lipieni 2022 hoda pradali turystyčnuju viosku Sabali ŭ Bresckaj vobłaści, jakoj vałodała źviazanaja z «Trajpłam» kampanija «Busłaŭka». Kompleks za 640 tysiač rubloŭ kupiła kampanija «PROSTARYTEJŁ», jakaja kiruje hipiermarkietami ProStore.
Uviesnu 2023 hoda na aŭkcyjonie pradali i fitnes-centr Evo wellness club na Bahdanoviča, jaki naležaŭ «Trajpłu». Jaho za amal 2,9 młn dalaraŭ kupiła kampanija «Biełfarm-Miedyka», suzasnavalnikam jakoj źjaŭlajecca biznesmien-aptečnik Andrej Ščabroŭ.
A ŭ mai 2023 hoda budynak «Trajpła» ŭ histaryčnym centry Minska pradali za 1,5 młn dalaraŭ.
U lutym 2023 hoda sud pryhavaryŭ Juryja Čyža da 3,5 hoda pazbaŭleńnia voli za machlarstva i admyvańnie hrošaj. Ale ad adbyvańnia pakarańnia ŭ kałonii jaho vyzvalili: užyli amnistyju i zaličyli ŭ termin pakarańnia čas, jaki jon užo adsiedzieŭ (biznesmien znachodziŭsia pad vartaj dvojčy: z 11 sakavika pa 14 vieraśnia 2016 hoda i z 15 sakavika 2021 pa 9 vieraśnia 2022 hoda).
A ŭ mai 2023 hoda Juryj Čyž daŭ pieršaje intervju za doŭhi čas, dzie vykazaŭsia nakont biznesu i siamji.
Ciapier čytajuć
«Ludzi, budźcie pilnyja! U takoj situacyi moža apynucca kožny žychar ES!» Hramadzianin Litvy, asudžany ŭ Biełarusi da 13 hadoŭ za «špijanaž», pieradaŭ list z kałonii3939
Kamientary