Chram moža raźmiaścicca ŭ inšym baku vulicy Niamihi, kala Teatra muzkamiedyi.
U Minsku ŭ budučyni moža źjavicca chram u honar Kazanskaj ikony Božaj Maci, pišuć Minsk-naviny.
U Maskoŭskim rajonie zaviaršyłasia hramadskaje abmierkavańnie architekturna-płanirovačnaj kancepcyi kultavaha abjekta. Abmierkavańnie pravodziłasia ad 13 da 27 červienia.
Abjekt prapanujecca raźmiaścić pamiž Teatram muzyčnaj kamiedyi i «Biełarusbankam». Habaryty chrama: — 28 na 12 mietraŭ u daŭžyniu i šyryniu i 25 mietraŭ u vyšyniu. Za architekturnuju asnovu ŭziaty kryžova-kupalny staražytny typ chrama, jaki pryjšoŭ ź Vizantyi.
U prezientacyi jość histaryčnaja zapiska z tłumačeńniami. Adznačacca, što anałahičny chram isnavaŭ u Minsku. 29 kastryčnika 1888 hoda ź impieratarskim ciahnikom u Rasii zdaryłasia čyhunačnaja katastrofa. Ź siamiejstvam Alaksandra III, praŭda, nie zdaryłasia ničoha błahoha. Ale ŭ pamiać hetaha vyratavańnia ŭ Minsku na Zacharjeŭskaj vulicy była ŭźviedziena kaplica, a na Pryvakzalnaj płoščy pabudavali draŭlanuju carkvu. Paźniej, u 1914-m, jepiskap Minski i Turaŭski Mitrafan aśviaciŭ novy kamienny pryvakzalny chram u imia Kazanskaj ikony Božaj Maci. Chram byŭ uźviedzieny pamiž kaplicaj i draŭlanaj carkvoj i mieŭ vyhlad vieličnaha sabora. Budynak praisnavaŭ da 1936 hoda, draŭlanaja carkva — da 1961-ha. Ich źnieśli savieckija ŭłady.
Jak napisana ŭ prezientacyi prajekta, stračanyja śviatyni «źjaŭlajucca značnaj historyka-kulturnaj kaštoŭnaściu nie tolki ŭ ramkach stalicy, ale i krainy». A niešmatlikaść pravasłaŭnych chramaŭ u centry horada robić aktualnym pytańnie ŭznaŭleńnia takoj carkvy, pišuć Minsk-naviny.
Adnak raniejšaje miesca raźmiaščeńnia zabudovy (ciapier pł. Miaśnikova) nie dazvalaje pabudavać tam poŭnapamierny chram. Tamu ŭ kancepcyi prapanujecca ŭ histaryčnym punkcie (na vuł. Miaśnikova, 6) raźmiaścić tolki nievialikuju kaplicu z pamiatnym znakam. A sam chram uźvieści niepadalok, na vulicy Niamizie, i złučyć abodva miescy małymi architekturnymi formami i infarmacyjnymi stendami.
Kaplicu prapanujecca raźmiaścić na krai płoščy Miaśnikova, jana budzie zakrytaha typu (u jaje nie praduhledžany dostup ludziej) i nievialikich habarytaŭ (2,3×2,3×7 m). Na hałoŭnym fasadzie raźmieścicca pamiatny znak u honar ikony Božaj Maci Kazanskaj.
Uličvajučy, što padčas hramadskaha abmierkavańnia nie pastupiła nivodnaha zvarotu ad haradžan, a sama kancepcyja była dapracavana z ulikam papiarednich zaŭvah, to architekturna-horadabudaŭničaja rada padtrymała prajektnuju prapanovu.
Viadoma, što zakazčykam architekturna-płanirovačnaj kancepcyi vystupiŭ prychod chrama ŭ honar Kazanskaj ikony Božaj Maci ŭ h. Minsku.
Kamientary