Śviatłana Kurs prapanavała pravieści jašče adzin marafon — dla biełaruskich vajaroŭ
Piśmieńnica miarkuje, što zbor srodkaŭ dla biełarusaŭ-dobraachvotnikaŭ maje prajści 8 vieraśnia — na Dzień biełaruskaj vajskovaj słavy.
«Dla mianie heta radasny dzień, kali ja pierakanałasia, što my ŭsio jašče razam, i našaj supolnaści nie raźbić, nie spynić, nie strymać», — napisała piśmieńnica ŭ fejsbuku pad kaniec suboty, kali stała zrazumieła, što marafon zboru hrošaj dla palitviaźniaŭ i ich siamiej staŭ vialikim pośpiecham.
«A davajcie jašče našym vajaram źbiarom, našaj hordaści i abaronie. Tym bolš što i Dzień biełaruskaj vajskovaj słavy blizka. 8 vieraśnia», — napisała Kurs.
Kurs miarkuje, što inicyjatyva novaha marafonu taksama pavinna zychodzić ad kabinieta Śviatłany Cichanoŭskaj.
«Dziela hetaha musiŭ by azvacca Kabiniet abranaj prezidentki, — adznačyła Kurs u kamientarach. — Bo my ŭsie za jaje hałasavali».
Aŭtarka ramana «Pa što idzieš, voŭča?», viadomaja pad svaim litaraturnym psieŭdanimam Jeva Viežnaviec, taksama vystupała na marafonie salidarnaści ŭ subotu.
Biełarusy, zdajecca, źbiaruć na marafonie bolš za paŭmiljona jeŭra, čaho mała chto čakaŭ.
Ličbu 400 tysiač adoleli ŭnačy kala 0:35. Na ciapier sabrana ŭžo bolš za 469 tysiač, zbor budzie doŭžycca da kanca siońniašniaha dnia.
Adna z papularnych sum — 23,34, abo numar administracyjnaha artykuła, pavodle jakoha łukašysty sudzili dziasiatki tysiač biełarusaŭ.
Inicyjatyva praviadzieńnia marafonu zychodziła ad pradstaŭnicy Abjadnanaha kabinieta pa sacyjalnych pytańniach Volhi Harbunovaj, da idei dałučylisia dziasiatki miedyja i jutub-kanałaŭ, u tym liku «Naša Niva» i jutub-kanały Nasha Niva News i «Tok» / Talk.
Status palitviaźnia na siońnia majuć 1484 čałavieki, ale za kratami znachodzicca našmat bolš palityčnych, nie ŭsie ich imiony viadomyja hramadskaści.
Masavyja palityčnyja represii ŭ Biełarusi praciahvajucca z 2020 hoda, kali Alaksandr Łukašenka, miarkujučy sa źviestak z učastkaŭ, dzie vybarčyja kamisii dazvolili naziralnikam sačyć za padlikam hałasoŭ, prajhraŭ Śviatłanie Cichanoŭskaj, ale nie addaŭ uładu.
Z 2022 hoda, paśla napadu Rasii na Ukrainu, biełarusaŭ pačali pieraśledavać i za antyvajennyja vykazvańni abo simpatyi da Ukrainy.
Za hety čas u krainie adbyłosia nie mienš za 50 tysiač palityčna matyvavanych zatrymańniaŭ, zaviedziena nie mienš za 12 tysiač palityčna matyvavanych kryminalnych spraŭ i adkinutyja navat samyja bazavyja normy zakonnaści i marali.
Va Ukrainie vajavała ci vajuje niekalki socień biełaruskich dobraachvotnikaŭ. 26 ź ich zahinuli, dvoje trapiła ŭ pałon.
Ciapier čytajuć
BNTU: Vykładčyk, jaki ŭciakaŭ ad milicyi, pamior ad sardečnaha prystupu18
Kamientary
Łochotron dołžien žiť viečno!
Triebujut prodołžienija bankieta.
Zrešty hałoŭnaje - kab paŭtaryć učorašni pośpiech, treba pa pieršaje ŭ niejkim vyhladzie stvaryć hetaje samaje vojska. Dziela hetaha vielmi važna pracavać i damahčysia ahałošańnia na hety kont dakładnaj pazicyi Ŭkrainy. Bo sučasnaja pazicyja vyhladaje tak: vy pakul vajujcie i hińcie za našam baku - heta zadavalniaje nas, a kaliści potym my pahledzim, što z vami rabić, bo nie žadajem razzłavać dyktatara i parušać mižnarodnaje prava ŭ datyčeńni da tych, chto ŭžo daŭno vykinuŭ jaho ŭ śmietnik. Hetkaja situacyja patencyjna stavić hety zbor u šerah šmatlikich zboraŭ na patreby ZSU i tamu čakać bieź źmienaŭ stanu rečaŭ rezanansnych vynikaŭ ad hetkaha marafonu naŭradci varta.