Ci varta zachoŭvać arechi ŭ chaładzilniku? Chimija padkazvaje pravilny adkaz

Ci mohuć arechi sapsavacca?

Tak, jany mohuć prahorknuć. Vydańnie Inverse pahłybiłasia ŭ temu i raspaviadaje, što pry pakajovaj tempieratury arechi zachoŭvajuć śviežaść tolki kala troch miesiacaŭ. Złučeńni, jakija nadzialajuć arechi niaśviežym maślanistym pacham, možna adčuć navat pry vielmi małoj ich kancentracyi.

Prablema ŭ tym, što mnohija ludzi pryzvyčailisia da pachu, asabliva kali jon jašče ledź čutny. U jakaści prykładu pryvodzicca prahorkły arachisavy alej, jaki moža być absalutna narmalnym na pach. Śviežy ž arachisavy alej na pach «jak kardon», tamu što ŭ im adsutničajuć złučeńni, što nadajuć jamu maślanisty pach, da jakoha my zvykli. Kali kolkaść śpiecyfičnych złučeńniaŭ značna pavyšajecca, u arechach pačynajuć źjaŭlacca smakavyja adcieńni.

Što psuje arechi?

Kali pavietra ŭzajemadziejničaje z malekułami tłušču ŭ arechach, adbyvajecca składany chimičny praces. Ich vyhlad upłyvaje na toje, jak chutka jany mohuć sapsavacca. Arechi ź vialikaj płoščaj pavierchni schilnyja da chutkaha źjaŭleńnia harkaty, tamu što ŭ ich bolšaja pavierchnia, jakaja padviarhajecca ŭździejańniu kisłarodu. Z hetaj pryčyny hreckija arechi prahorknuć chutčej za ŭsio, bo jany majuć najbolšuju płošču pavierchni ź vialikaj kolkaściu ščylin, kudy moža dabracca kisłarod. Mindal ža, naprykład, nie budzie psavacca daŭžej, tamu što jon vielmi kampaktny, a jaho abjom pieravyšaje płošču pavierchni.

Na malekularnym ža ŭzroŭni hałoŭnym faktaram vystupaje ŭtrymańnie nienasyčanych tłuščaŭ. Kali arechi akiślajucca pry kantakcie z kisłarodam, to ŭtvarajucca novyja złučeńni. Čym bolš nienasyčanych tłuščaŭ, tym chutčej akiślajucca arechi.

Umovy zachoŭvańnia taksama mohuć paskoryć abo zapavolić praces. Reakcyi adbyvajucca chutčej pry bolš vysokich tempieraturach, tamu chaładzilnik abo, jašče lepš, marazilnaja kamiera ŭ chaładzilniku mohuć zatarmazić akiśleńnie, praduchilajučy vypracoŭku svabodnych radykałaŭ u arechach. Uździejańnie śviatła taksama ŭpłyvaje na akiśleńnie. Zachoŭvańnie arechaŭ biez škarłupiny (jak i luboj inšaj ježy z vysokim utrymańniem nienasyčanych tłuščaŭ) pad pramym śviatłom pryviadzie da ich psavańnia našmat chutčej.

Ci škodna ŭžyvańnie prahorkłych arechaŭ?

Vierahodna, para prahorkłych arechaŭ nie zabjuć vas i navat nie sabjuć z noh. Viadoma, što hidrapieraksidy i aldehidy ŭtrymlivajuć niekatoryja taksičnyja złučeńni, ale z momantu, kali vy kidajecie ŭ rot kiepski arech, vaša cieła pačynaje vypracoŭvać fiermienty, jakija rasščaplajuć usie vyšej zhadanyja niadobryja złučeńni razam ź inšymi pabočnymi praduktami akiśleńnia. Hetyja fiermienty traplajuć u straŭnik i kišečnik, u značnaj stupieni abiasškodžvajučy hetyja pabočnyja pradukty.

Ale kali niechta žyŭ ci žyvie niejki čas na vyklučna prahorkłym arachisie ci pieryjadyčna ŭžyvaje prahorkłyja bulbianyja čypsy — heta moža stać prablemaj. Pakul ža vy trymajeciesia zdarovaj dyjety i nie pierajadajecie šmat akiślenaj ježy na pastajannaj asnovie, to niekalki kiepskich arechaŭ nie pavinny vam naškodzić.

Jak lepš za ŭsio zachoŭvać arechi?

U hiermietyčna zakrytym słoiku ŭ marazilnaj kamiery. Hiermietyzacyja praduhledžvaje vydaleńnie ŭsiaho kisłarodu sa słoika. 

Možna zachoŭvać arechi ŭ škarłupinie i pry pakajovaj tempieratury, ale tolki nie bolš za šeść tydniaŭ. Kali vy raskolecie niekalki cełych hreckich arechaŭ na Dziady i nie vykarystajecie ich usie, to da Kaladaŭ jany mohuć i nie dažyć u nieakiślenym vyhladzie.

Tamu zachoŭvańnie hreckich arechaŭ, makadamii, mindalu, kiešju, arachisu i inšych vašych lubimych arechaŭ na palicy ŭ šafcy, chutčej za ŭsio, nie pryniasie vam anijakaj škody, pry ŭmovie, što vy trymajeciesia zbałansavanaj dyjety. Ale kali vy žadajecie zachoŭvać svaje ŭlubionyja arechi śviežymi na praciahu doŭhaha času, padumajcie pra toje, kab pakłaści ich u słoik, a zatym u marazilnuju kamieru.

• 19
• 0
• 3
• 2
• 7
• 7
• 7
• 0