«U nas składanaja finansavaja situacyja paśla zakryćcia dostupu da sajta. Serca Lisičkina nie vytrymała stresu». «Priessboł» nadrukavaŭ niekrałoh pra hałoŭnaha redaktara
Redakcyja haziety «Priessboł» apublikavała niekrałoh, pryśviečany pamierłamu 11 žniŭnia hałoŭnamu redaktaru vydańnia — Siarhieju Lisičkinu. Jamu było 54 hady.
«Skazać, što ŭ piatnicu redakcyja pieražyła ŭzrušeńnie, — značyć nie skazać ničoha. Heta byŭ šok!
Jašče napiaredadni hałoŭny redaktar «Priessboła» Siarhiej Lisičkin pracavaŭ nad vypuskam čarhovaha numara haziety. Tak, adčuvaŭ siabie nie vielmi kamfortna, ale zapeŭnivaŭ, što ŭsio budzie dobra. Maŭlaŭ, niehatyŭna ŭpłyvaje mahnitnaja bura. Chacia ŭsie razumieli, što ŭ bolšaj stupieni na zdaroŭi adbivalisia prablemy, źviazanyja sa składanaj finansavaj situacyjaj, u jakuju my trapili paśla zakryćcia dostupu da redakcyjnaha sajta.
Nie sakret, što ŭ ciapierašniaj situacyi mienavita internet-płatformie addavali pieravahu rekłamadaŭcy, i jaje strata aznačała spynieńnie finansavych pastupleńniaŭ.
Zrešty, nie źnikała viera ŭ toje, što zdarovy sens voźmie vierch i «dyskvalifikacyja» budzie niadoŭhaj. Ale serca redaktara stresu nie vytrymała, spyniłasia», — napisana ŭ niekrałohu.
U redakcyjnym artykule adznačajecca, što Siarhiej Siarhiejevič pryjšoŭ u «Priessboł» u «składany pieryjad», kali vydańnie straciła hrupu kłasnych žurnalistaŭ, kali «niadobrazyčliŭcy pradrakali chutkuju pahibiel».
Kalektyŭ adznačaje, što napačatku było niamała składanaściaŭ va ŭzajemaadnosinach, u padychodach da spravy, vybary stratehii. Ale ŭmieńnie Lisičkina słuchać kaleh, davier da prafiesijanałaŭ zrabili svaju spravu.
Siarhiej Lisičkin uznačaliŭ hazietu ŭ śniežni 2020 hoda, kali tam pačalisia kadravyja čystki, a kiraŭnictva było zvolniena za padtrymku pratestaŭ.
Pavodle jahonych słoŭ, prapanova zaniać pasadu jamu pastupiła ad tahačasnaha staršyni Biełaruskaj fiederacyi futboła Uładzimira Bazanava. BFF naležała 50% akcyj jurydyčnaj asoby vydańnia. Spačatku paśla razmovy z kalektyvam Lisičkin admaŭlaŭsia ŭznačalić «Priessboł», ale nieŭzabavie pieradumaŭ. Z pryčyny hetaha hazietu pakinuŭ šerah klučavych supracoŭnikaŭ.
Da taho, jak uznačalić «Priessboł», Lisičkin pracavaŭ karespandentam na telekanale ANT, pa sumiaščalnictvie — pres-sakratarom kłuba pa chakiei na travie «Minsk». Taksama jon supracoŭničaŭ sa «Sportivnoj panaramoj», «SB. Biełaruś siehodnia», «Komsomolskoj pravdoj», «Minskim kuŕjerom» i inšymi vydańniami.
Pry Lisičkinie «Priessboł» imknuŭsia trymacca łajalisckaj pazicyi ŭ dačynieńni da ŭład, ale, niahledziačy na heta, niadaŭna sajt vydańnia byŭ zabłakavany Mininfarmam.
Fatohraf-ahient z dvuma pašpartami zdymaje biełarusaŭ i ich mierapryjemstvy ŭ Varšavie13
Kamientary