U Biełarusi stvorać novuju Čyrvonuju knihu i vyklučać ź jaje niekatoryja vidy
Ministr pryrodnych resursaŭ i achovy navakolnaha asiarodździa Andrej Chudyk padčas adkryćcia II Mižnarodnaj śpiecyjalizavanaj vystavy ECOLOGY EXPO-2023 anansavaŭ chutkaje stvareńnie novaj redakcyi Čyrvonaj knihi Biełarusi, ź jakoj niekatoryja vidy buduć vyklučanyja, paviedamiła ahienctva «Minsk-Naviny».
Andrej Chudyk adznačyŭ, što ŭ krainie ciapier pravodzicca manitorynh pa 13 napramkach: vada, pavietra, ziamla, azon, torf i inšyja. Pavodle jaho słoŭ, u Biełarusi ciapier «samyja čystyja vodnyja abjekty», a pavietra «z kožnym hodam stanovicca čyściejšym».
Taksama Chudyk raskazaŭ, što ŭ krainie ciapier vialikaja bijaraznastajnaść, a ŭ raślinnym śviecie nazirajecca pavieličeńnie kolkaści vidaŭ pad asablivaj achovaj.
«My ŭ biahučym hodzie budziem stvarać novuju Čyrvonuju knihu Biełarusi, 10-y vypusk. Upeŭnieny, što niekatoryja vidy raślin i žyvioł buduć vyklučanyja ŭ suviazi z rostam ich papulacyi», — skazaŭ ministr.
Viadoma, što daŭno łabiruje takuju mieru ciapierašni staršynia Biełaruskaha tavarystva palaŭničych i rybałovaŭ, kolišni ministr unutranych spraŭ Ihar Šunievič.
«My choć i nie majem navukovaha abhruntavańnia, ale dobra znajomyja z realnaj situacyjaj pa vidach žyvioł. Naša pazicyja pa buramu miadźviedziu viadomaja, jana nie pamianiałasia. I majo hłybokaje pierakanańnie, što jaho nie vyklučać z Čyrvonaj knihi datul, pakul nie zdarycca pieršaja biada», — skazaŭ Šunievič zusim niadaŭna.
Jon padkreśliŭ, što kolkaść miadźviedzia ŭ Biełarusi dasiahnuła niebiaśpiečnych značeńniaŭ i pryjšoŭ čas «pryniać razumnaje i ŭzvažanaje rašeńnie».
Bo, na jahonuju dumku, miadźviedź «źvier niebiaśpiečny, razumny, padstupny i čałavieka ŭsprymaje jak abjekt ježy».
Taksama jon upeŭnieny, što treba vyklučyć z Čyrvonaj knihi ryś i barsuka.
U toj ža čas Minpryrody dahetul, nakolki viadoma, nie padzialała takoj radykalnaj pazicyi.
«Pakul papulacyja miadźviedziaŭ nie źjaŭlajecca ŭstojlivaj, i tamu my i kažam, što zaŭčasna vyklučać hety vid z Čyrvonaj knihi», — adznačali tam, padkreślivajučy, što takaja ž pazicyja i ŭ dačynieńni rysi i barsuka.
U Minpryrody adznačali, što ŭ pytańni ab vyklučeńni žyvioł z Čyrvonaj knihi treba kiravacca pryncypam: kolkaść asobin u papulacyi pavinna być ustojlivaj. «Pakul źviestki navukoŭcaŭ z Nacyjanalnaj akademii navuk Biełarusi kažuć pra toje, što kolkaść papulacyi buraha miadźviedzia ŭ krainie niedastatkovaja dla taho, kab jaho vyklučyli z Čyrvonaj knihi».
Pieršaje vydańnie Čyrvonaj knihi Biełarusi vyjšła ŭ 1981 hodzie, u jaje było ŭklučana 80 vidaŭ žyvioł i 85 vidaŭ raślin. Potym było dvuchtomnaje vydańnie, abnoŭlenaja Čyrvonaja kniha vyjšła ŭ 1993 hodzie. U 2006 hodzie Čyrvonaja kniha ŭklučała ŭžo 189 vidaŭ žyvioł i 274 vidy raślin, 24 — lišajnikaŭ i 29 — hryboŭ.
U tuju redakcyju Čyrvonaj knihi, jakaja dziejničaje ciapier, uklučana 203 vidy dzikich žyvioł, što składaje krychu bolš za 1 pracent ad ahulnaj kolkaści vidaŭ dzikich žyvioł, jakija žyvuć u krainie.
Praź dzieviać miesiacaŭ paśla vyzvaleńnia pamior palitviazień Valeryj Bohdan7
Kamientary