Ad eks-palitviaźnia Ihara Karnieja patrabujuć pahasić zapazyčanaść za pobyt na Vaładarcy

«Akazvajecca, patrabujuć pahasić zapazyčanaść za atrymanyja pasłuhi na Vaładarcy. Za 2023 hod! Paŭtary bazavyja, to-bok 63 rubli! Pry hetym jurysty kažuć, što spahnańnie absalutna niezakonnaje: pakul čałaviek u statusie padazravanaha i śledstva tolki vyśviatlaje abstaviny «złačynstva». Schamianulisia, kali ŭžo i SIZA №1 daŭno pierajechała ŭ Kaladzičy, i bazavaja vyrasła na 5 rubloŭ. Prydumać čarhovuju abdzirałaŭku zadnim čysłom — jak dva palcy. Pamnožyć na dziasiatki tysiač palityčnych, jakija prajšli praź Piščałaŭski zamak, — choć jakaja prybaŭka. Da taho ž, akramia paŭhoda ŭ 2023-m, jašče try z pałovaj miesiacy byŭ tam ad pačatku 2024-ha, značyć, u čakańni dadatkovaj pozvy», — napisaŭ jon.

Ihar Karniej dadaŭ, što jon navat hatovy adździačyć, pakolki Vaładarka — adzinaje miesca, jakoje na fonie inšych etapaŭ možna nazvać jašče adnosna humannym, a taksama padzialiŭsia jašče adnoj historyjaj.

«Litaralna za paru tydniaŭ da apieracyi «departacyja» sa ździŭleńniem pabačyŭ na stendzie ŭ mazyrskaj kałonii «śpis hańby» — daŭžniki, na jakich visiać materyjalnyja pazovy. U maim vypadku — uniforma, atrymanaja ŭ zonie №17. Jakuju amal nie nasiŭ, bo adrazu z karancinu ŭsiu škłoŭskaj kadencyju adsiadzieŭ u adzinočkach izalataraŭ.

Tuju chimičnuju robu, u jakoj ablivaješsia potam letam i pramiaršzaješ da kaściej zimoj, acanili ŭ 200 rubloŭ (spadziajusia, niekali stanie muziejnym ekspanatam razam ź inšymi śviedčańniami katavalniaŭ). Ale treba dumać, taksama niedzie vylezie bokam. Za kapiejku ŭ deficytnym biudžecie zadušacca, možna nie sumniavacca…» — napisaŭ žurnalist.

Žurnalist Radyjo Svaboda byŭ zatrymany 17 lipienia 2023 hoda nieŭzabavie paśla pachavańnia mastaka Alesia Puškina. Žurnalistu inkryminiravali «ŭdzieł u ekstremisckim farmavańni». Mahčyma, farmalnaj pryčynaj pieraśledu stali zdymki, zroblenyja na pachavańni i paśla apublikavanyja ŭ niezaležnych miedyja.

22 sakavika 2024 hoda jaho asudzili na try hady kałonii. Karnieja adpravili adbyvać pakarańnie ŭ kałoniju №17 u Škłovie.

Žurnalista niekalki razoŭ kidali ŭ kałonii ŭ pamiaškańnie kamiernaha typu, a ŭrešcie prysudzili jašče 10 miesiacaŭ źniavoleńnia za «niepadparadkavańnie patrabavańniam administracyi».

Vyjšaŭ na volu 21 červienia 2025 hoda ŭ chodzie vyzvaleńnia 14 palitviaźniaŭ, što adbyłosia paśla vizitu amierykanskaj delehacyi ŭ Minsk.,

• 1
• 0
• 0
• 3
• 0
• 0
• 6
• 0