Pasła Biełarusi zaprasili na bankiet z nahody ŭručeńnia Nobieleŭskich premij
Letaś Biełaruś i Rasiju nie ŭklučyli ŭ lik zaprošanych praz vajnu va Ukrainie. Taksama sioleta zaprošany Iran.
Rasija i Biełaruś znoŭ zaprošanyja na bankiet u Stakholmie z nahody ŭručeńnia Nobieleŭskich premij, paviedamlaje Nobieleŭski fond. Letaś ich nie ŭklučyli ŭ lik zaprošanych z-za vajny va Ukrainie, piša Bi-bi-si.
Iran u hetym hodzie taksama znoŭ zaprošany na hetaje mierapryjemstva ŭ stalicy Šviecyi.
U fondzie zajavili, što imknucca pryciahnuć navat tych, chto nie padzialaje kaštoŭnaściaŭ Nobieleŭskaj premii.
Piać z šaści cyrymonij uručeńnia Nobieleŭskaj premii štohod prachodziać u Stakholmie, a Nobieleŭskaja premija miru ŭručajecca ŭ Osła.
U minułym hodzie Nobieleŭski fond zajaviŭ, što pasły Rasii i Biełarusi nie buduć zaprošanyja praz rasijskuju ahresiju suprać Ukrainy.
Akramia taho, Nobieleŭskaj premijaj miru byŭ uznaharodžany biełaruski pravaabaronca Aleś Bialacki. Na momant uručeńnia premii jahonaj žoncy jon znachodziŭsia za kratami adzin hod i piać miesiacaŭ. A ŭ sakaviku 2023 hoda byŭ asudžany na 10 hadoŭ źniavoleńnia.
Iran taksama nie byŭ zaprošany ŭ minułym hodzie. Tehieran užo daŭno sutykajecca z krytykaj za situacyju z pravami čałavieka ŭ krainie. AAN zajaviła, što ŭrad hetaj krainy moh učynić złačynstvy suprać čałaviečnaści, dušačy pratesty letaś.
Vykanaŭčy dyrektar Nobieleŭskaha fondu Vidar Chielhiesien tak patłumačyŭ rašeńnie znoŭ zaprasić try hetyja krainy: «Vidavočna, što śviet usio bolš dzielicca na śfiery, dzie dyjałoh pamiž ludźmi z roznymi pohladami zvužajecca».
«Kab supraćstajać hetaj tendencyi, my pašyrajem kolkaść našych zaprašeńniaŭ, kab adznačyć i dać zrazumieć Nobieleŭskuju premiju, a taksama važnaść svabodnaj navuki, svabodnaj kultury i svabodnych, mirnych tavarystvaŭ».
Šviedski deputat Jeŭraparłamienta ad Libieralnaj partyi Karyn Karłsbra abvinavaciła fond u stvareńni «niebiaśpiečnaha precedentu».
Pavodle jaje słoŭ, fond «daŭ zialonaje śviatło zaprašeńniu Rasii na hłamurnuju viečarynu, u toj čas jak rakiety padajuć na ŭkrainskija kulturnyja centry i zabivajuć dziaciej».
Vystupajučy pierad hramadskim radyjo Šviecyi, jana nazvała Rasiju, Biełaruś i Iran «dziaržavami-izhojami», jakija «pryhniatajuć svaich hramadzian, viaduć vajnu i teror suprać ułasnaha naroda i susiednich krain».
«Heta krainy, jakija nijakim čynam nie padtrymlivajuć demakratyčnych kaštoŭnaściaŭ», — padkreśliła Karyn Karłsbra.
«Nie chaču čuć «śpierdalaj da Ukrainy» tolki tamu, što razmaŭlaju z baćkami pa telefonie na ruskaj». Biełarusy dzielacca, čamu viartajucca z Polščy133133
Kamientary