Biełaruskich top-madelaŭ vyvieźli na bajavyja treniroŭki. Adzin ź instruktaraŭ byŭ z našyŭkaj vahnieraŭcaŭ
Telehram-kanał unutrannych vojskaŭ MUS apublikavaŭ foty, na jakich dziaŭčat z Nacyjanalnaj škoły pryhažości navučajuć užyvać zbroju. Na adnym ź instruktaraŭ — našyŭka PVK «Vahnier».
Kiraŭnictva Nacyjanalnaj škoły pryhažości sumiesna z MUS i łukašenkaŭskim ideołaham Vadzimam Hihinym pryvieźli biełaruskich madelek na bajavyja treniroŭki pa ŭžyvańni ahniastrelnaj zbroi. Adpaviedny fotarepartaž źjaviŭsia 18 vieraśnia ŭ aficyjnym telehram-kanale ŭnutranych vojskaŭ Biełarusi.
Zhodna sa spravazdačaj, madeli znajomilisia z roznymi vidami zbroi i vučylisia akazvać pieršuju dapamohu.
«Pradstaŭnicy Nacyjanalnaj škoły pryhažości na čale ź jaje kiraŭnicaj Baženaj Jaremič i hienieralnym dyrektaram Nacyjanalnaj biblijateki Vadzimam Hihinym asvojvali ahniavuju padrychtoŭku i taktyčnuju miedycynu», — pišuć u kanale.
Vučylisia jany ŭ «prafiesijna padrychtavanych vajskoŭcaŭ śpiecpadraździaleńniaŭ unutranych vojskaŭ, jakija štodnia adtočvajuć svajo majsterstva pad kiraŭnictvam daśviedčanych instruktaraŭ z realnym bajavym dośviedam».
Pry hetym na adnym z vajskoŭcaŭ zboku na hrudziach vidać emblema najmitaŭ rasijskaj pryvatnaj vajskovaj kampanii «Vahnier», častka bajcoŭ jakoj znachodzicca ŭ Biełarusi i jakraz zajmajecca škaleńniem biełaruskich bajcoŭ.
Cikava, što hety ž vajskoviec na druhim fota ŭžo nie maje na hrudziach emblemy «Vahniera». Svoj tvar jon chavaje pad maskaj.
Ci heta vahnieraviec, ci biełaruski vajskoviec, jaki vyrašyŭ načapić našyŭku rasijskaj PVK, nieviadoma.
Ale adzin ź biełaruskich prapahandysckich kanałaŭ śćviardžaje, što siarod instruktaraŭ vahnieraŭcy byli.
Nahadajem, što najmity PVK «Vahnier» prybyli ŭ Biełaruś jašče letam paśla sproby vajskovaha miaciažu vahnieraŭcaŭ. Kiraŭnik kampanii Jaŭhien Pryhožyn niadaŭna zahinuŭ u padazronaj avijakatastrofie.
Z taho momantu peŭnaja častka najmitaŭ usio jašče zastajecca ŭ Biełarusi i treniruje biełaruskich sałdat. Adnak kolkaść vahnieraŭcaŭ u krainie źnižajecca i ich asnoŭny łahier pad Asipovičami častkova demantavany.
Adbor top-madelaŭ u Biełarusi — pradmiet uvahi asabista Alaksandra Łukašenki, jaki niaźmienna prysutničaje na konkursie «Mis Biełaruś». Mnohija z udzielnic i pieramožcaŭ konkursu apynajucca ŭ śvicie kiraŭnika krainy.
«Naša Niva» — bastyjon biełaruščyny
PADTRYMAĆPaśla śmierci Pryhožyna Zinhman sprabuje pierachapić achoŭnyja kantrakty «Vahniera» — krynicy
Na konkursie «Mis Biełaruś» hledačoŭ paradavali tancam z kuvałdami VIDEA
Raniej «na ich dračyli», a «ciapier našy SSA abkłali hety łahier z usich bakoŭ». Biełaruskija aficery raskazali pra apošnija naviny vakoł «Vahniera»
Ciapier čytajuć
«Abmiarkoŭvajem pytańnie ab vyzvaleńni jašče 1300 źniavolenych». Tramp raskazaŭ, pra što havaryŭ z Łukašenkam41
Kamientary