Minsk abviarhaje «Hardyjan»

U Minsku abviarhajuć apublikavanuju 15 śniežnia infarmacyju haziety «Hardyjan» (Vialikabrytanija) ab tym, što adpraŭnym punktam zatrymanaha ŭ Tajłandzie ź nielehalnym hruzam zbroi Ił‑76 była Biełaruś.

«Heta znoŭ vydumki, jakija ŭźnikli tolki tamu, što adzin z členaŭ ekipaža hramadzianin Biełarusi», — zajaviŭ BiełaPAN pradstaŭnik Dziaržaŭnaha vajenna‑pramysłovaha kamiteta.

Adkazvajučy na pytańnie, ci mahła ź Biełarusi nielehalna vyvozicca zbroja, surazmoŭca ahienctva padkreśliŭ:

«Nikoli takoha być nie moža. Niemahčymy niaŭličany vyvaz zbroi z krainy. U nas samaja žorstkaja sistema ekspartnaha kantrolu zbroi ŭ Jeŭropie.

Nikoli nidzie my nie pastaŭlali zbroju, parušajučy abaviazacielstvy pierad AAN».

Treba adznačyć, što ŭ pres‑słužbie Rady biaśpieki Biełarusi admovilisia ad jakich‑niebudź kamientaraŭ nakont infarmacyi, raspaŭsiudžanaj «Hardyjan».

Jak raniej paviedamlałasia, samalot Ił‑76 (bartavy numar 4L‑AWA), zarehistravany ŭ Hruzii, amal z 40 tonami zbroi, u tym liku ručnymi hranatamiotami i pieranosnymi zienitna‑rakietnymi kompleksami, byŭ zatrymany 12 śniežnia ŭ Banhkoku, dzie pryziamliŭsia dla dazapraŭki. Zatrymany piać členaŭ ekipaža — čatyry hramadzianiny Kazachstana i hramadzianin Biełarusi Michaił Pietuchoŭ 1955 hoda naradžeńnia, jaki pracavaŭ bortinžynieram.

14 śniežnia kryminalny sud Banhkoka pastanaviŭ uziać pad vartu ekipaž samalota i pradoŭžyŭ termin jaho zatrymańnia na 12 dzion.

Ekipažu pradjaŭlena abvinavačańnie ŭ nielehalnaj transparciroŭcy zbroi i davańni łžyvaj infarmacyi ŭładam Tajłanda ab charaktary hruzu. Zhodna z tajskimi zakonami, lotčykam pahražaje pažyćciovy turemny termin. Členy ekipaža śćviardžajuć, što nie viedali ab charaktary hruzu. Pavodle ich słoŭ, jany pieravozili abstalavańnie dla bureńnia naftavych śvidravin.

Rasśledavańnie hetaj spravy moža praciahnucca niekalki miesiacaŭ ci jašče bolš, paviedamiŭ pradstaŭnik pravaachoŭnych orhanaŭ Tajłanda. «Heta sprava moža być vielmi doŭhaj.

Zanadta zabłytanaja pakul karcina: samalot zarehistravany ŭ Hruzii, ale niadaŭna. U jaho kazachstanski haspadar. Frachtavała samalot ukrainskaja firma, jakaja źjaŭlajecca filijałam novaziełandskaj firmy, a z kim źviazana taja — pakul niezrazumieła.

U supravadžalnych dakumientach na hruz, navat u avijanakładnoj, atrymalnik hruzu naohuł nie nazvany. Dazvoły na pralot terytoryj roznych krain u samalota byli na ŭvieś zvarotny šlach praz Šry‑Łanku i AAE da Ukrainy, i zbroja mahła być vyhružana ŭ lubym punkcie maršrutu», — paviedamiŭ na ŭmovach ananimnaści supracoŭnik tajskaha ŭpraŭleńnia pa baraćbie sa złačynnaściu, jaki niepasredna ŭdzielničaje ŭ rasśledavańni.

Jon taksama paviedamiŭ, što ŭ palotnym płanie samalota fihuruje adzin ź nievialikich aeraportaŭ u AAE, raźmieščany ŭ niepasrednaj blizkaści z hruzavym marskim portam, na terytoryi svabodnaj ekanamičnaj zony. «Tyja ekśpierty, ź jakimi my paśpieli pakul źviazacca, havorać, što kali hruz pryznačaŭsia mienavita dla hetaha aeraporta, jon moh być adrazu ž pierahružany na hruzavoje sudna, i tady ślady jaho zhubilisia b kančatkova», — skazaŭ jon.

• 0
• 0
• 0
• 0
• 0
• 0
• 0
• 0