Sabaka, addany nie tolki da śmierci. U harach ZŠA znajšli terjera, jaki 10 tydniaŭ achoŭvaŭ cieła haspadara

Praz 10 tydniaŭ paśla taho, jak amierykaniec Ryč Mur adpraviŭsia ŭ hory i nie viarnuŭsia, ratavalniki znajšli jaho žyvoha sabaku, jaki zastavaŭsia pobač ź ciełam haspadara. Džek-raseł-terjeru Fini ŭdałosia vyžyć, bo jon palavaŭ na myšej i inšych drobnych žyvioł, piša Bi-bi-si.

71-hadovy Ryč Mur płanavaŭ padniacca na pik Błekched u štacie Kałarada 19 žniŭnia. Jon uziaŭ u pachod svajho sabaku pa mianušcy Fini, ale dadomu jany nie viarnulisia.

Ratavalniki doŭha šukali ich na stromkim zachodnim schile hary pamiž miescam, dzie była pryparkavanaja mašyna Mura, i viaršyniaj, jakaja znachodzicca na vyšyni 3800 mietraŭ nad uzroŭniem mora. Ale pošuki vyjavilisia biespaśpiachovymi.

Pošukavyja słužby apublikavali abjavy z fotazdymkami dla inšych hornych entuzijastaŭ.

U vyniku 30 kastryčnika cieła źnikłaha mužčyny znajšoŭ palaŭničy. Jaho znajšli ŭ Nacyjanalnym parku San-Chuan, prykładna z 2,5 km na ŭschod ad viaršyni pika Błekchied. Pobač znachodziŭsia žyvy Fini.

Sabaka važyŭ mienš za try kiłahramy: jon straciŭ prykładna pałovu vahi. Pierš za ŭsio Fini advieźli da vieterynara, a zatym viarnuli siamji zahinułaha haspadara.

«Heta vydatnaja historyja. Sabaka nie tolki zdoleŭ vyžyć, ale i prademanstravaŭ svaju addanaść haspadaru», — adznačyła Delinda Van-Brajcin ź miascovaj hrupy ratavalnikaŭ-vałancioraŭ.

Pavodle słoŭ ratavalnikaŭ, sabaku niejkim cudam udałosia nie stać achviaraj drapiežnikaŭ, jakija žyvuć u lesie, takich jak pumy, kajoty i miadźviedzi. A siłkavaŭsia jon, vidać, za košt palavańnia na drobnych mlekakormiačych.

«Džek-raseły-terjery [hetaj parody i ŭkrainski Patron — palaŭničy na miny — NN] — davoli mocnyja maleńkija sabački», — skazała Van Brajcin ahienctvu Associated Press.

«My vielmi rady, što Fini viarnuŭsia ŭ siamju. Jany stracili lubimaha čałavieka, ale ŭ ich zastaŭsia jaho vydatny, addany sabaka», — dadała jana.

Pavodle danych miascovych uładaŭ, Mur pamior ad pieraachaładžeńnia, z-za jakoha jon moh stracić zdolnaść aryjentavacca ŭ prastory.

Siabry Mura raspaviali vydańniu Outsider, što jon byŭ dobrym hornym turystam i raniej užo pakaraŭ pik Błekchied razam ź siabram. Na hety raz jon uziaŭ z saboj tolki Fini, i, pa słovach žonki Mura, Dany Chołbi, jana sprabavała adhavaryć muža ad hetaha pachodu, ale biespaśpiachova.

Kali Chołbi daviedałasia, što Fini vyžyŭ u dzikaj pryrodzie 10 tydniaŭ, žančyna była ździŭlenaja. Jany z synam płakali, kali zabirali sabaku ź vieterynarnaj kliniki, raspaviała jana časopisu Outsider.

Čytajcie taksama:

Sabaka Mai Sandu ŭkusiŭ prezidenta Aŭstryi

Spačatku la Čyrvonaha kaścioła pasialiŭsia adzin sabaka, potym pryjšoŭ druhi

Na leciščy la Hrodna susiedski sabaka zahryz pamieranskaha špica

• 15
• 0
• 0
• 0
• 0
• 11
• 4
• 0