Kitajskija mašyny zamiest jeŭrapiejskich, čerhi pa Geely, luksavyja aŭto dla rasijan. Jak za hod źmianiŭsia aŭtamabilny rynak
Rost prodažaŭ na 486% u kastryčniku, aryjentacyja na luksavyja aŭto ź Jeŭropy… Pahladzieli, što jašče zdaryłasia z aŭtamabilnym rynkam Biełarusi za 2023 hod.
Kitaj, Kitaj i jašče raz Kitaj
Źmieny na rynku novych aŭto ŭ Biełarusi ciaham hoda adbylisia kardynalnyja. Choć praces, kali ŭ adkaz na vajennuju ahresiju z Rasii syšoŭ šerah suśvietnych aŭtavytvorcaŭ, byŭ zapuščany jašče ŭ 2022 hodzie (a raniej kala 80% aŭto, jakija pradavali našyja dylery, vyrablalisia ŭ Rasii), istotna rynak pierastroiŭsia mienavita ŭ 2023-m.
Pradaŭcam daviałosia nanova vybudoŭvać svaju pracu, bo składskija zapasy raspradalisia, a brać novyja aŭto aficyjnym dyleram asabliva nie było adkul. Daviałosia šukać novyja krynicy pastavak.
Kali ŭ pačatku biahučaha hoda aŭtadylery paviedamlali ab prodažy 35 madelaŭ novych lehkavych aŭtamabilaŭ, to ŭ listapadzie madelny šerah pašyryŭsia da 75 madelaŭ.
U asnoŭnym na zamienu aŭto suśvietnych brendaŭ z šyldzikam Made in Russia pryjšli mašyny Made in China. I heta ŭžo čystakroŭnyja «kitajcy».
Tak, u Biełarusi adzin za adnym adkryvalisia novyja dylerskija centry raniej nieviadomych biełarusam kitajskich aŭtamabilnych brendaŭ. Jetour, Voyah, Kaiyi, Li, BAIC — tolki častka novych marak z Padniabiesnaj, jakija źjavilisia ŭ prodažy ŭ našaj krainie ŭ 2023 hodzie.
Pa vynikach listapada dola kitajskich marak siarod lehkavych aŭtamabilaŭ pieravysiła 84%. Pry hetym, kala 70% dylerskich prodažaŭ pryjšłosia na biełaruska-kitajskija Geely.
Fienamienalny rost prodažaŭ
U paraŭnańni z 2022 hodam, prodažy novych aŭto ŭ Biełarusi vyraśli. Tolki ŭ studzieni i lutym dylery pradavali mienš za 1000 aŭto ŭ miesiac — 756 i 945 adpaviedna. Ale navat i heta šmat u paraŭnańni z kastryčnikam 2022 hoda, kali dyleram udałosia realizavać tolki 452 aŭto.
Nizkaja baza dazvalała dyleram ahučvać prosta šalonyja ličby pryrostu. Tak, naprykład, u kastryčniku rynak vyras na 486% u adnosinach da kastryčnika 2022 hoda (da 2,4 tysiač adzinak). Pa vynikach 11 miesiacaŭ rost składaje kala 140 %.
Rekordnym staŭ listapad. Aficyjnym dyleram udałosia realizavać 3057 aŭto, ź jakich 2689 skłali lehkaviki.
Zhodna z prahnozami Biełaruskaj aŭtamabilnaj asacyjacyi, pa vynikach hoda prodažy dyleraŭ mohuć dasiahnuć 25 tysiač aŭto, uklučajučy lohkija kamiercyjnyja aŭtamabili, što budzie kala 150% adnosna minułaha hoda.
Adnak ličby vyhladajuć pazityŭna tolki ŭ paraŭnańni z 2022 hodam, kali dylery pradali ŭsiaho 17 234 adzinki techniki. U davajennym 2021 hodzie biełaruskija dylery pradali 46 837 novych aŭto, a za 2020 hod — 53 537.
Biełarusy vybirajuć «ajčynny» aŭtapram?
Inšym fienomienam 2023 hoda možna nazvać źjaŭleńnie čerhaŭ na kuplu Geely. U zaležnaści ad madeli, kab nabyć novuju mašynu biełaruska-kitajskaj vytvorčaści, treba čakać ad miesiaca da paŭhoda.
Trend na kitaizacyju rynku padchapili nie tolki aficyjnyja dylery, ale i šeryja imparciory. Aŭtamabilami z Kitaja na zamovu pačali zajmacca i niekatoryja firmy-pasiaredniki, jakija raniej śpiecyjalizavalisia na pryhonie aŭto ź Jeŭropy i ZŠA.
Pryhon aŭto ź ES i ZŠA
Jak i ŭ 2022 hodzie, sioleta asnoŭnymi imparciorami aŭto ŭ Biełaruś byli fizičnyja asoby. Na padstavie danych za 9 miesiacaŭ biahučaha hoda možna mierkavać, što ahulnaja ličba impartu aŭto z trecich krain budzie bolšaj, čym u 2022-m, ale nie mocna. Letaś fizičnyja asoby ŭvieźli ŭ Biełaruś bolš za 80 tysiač aŭto. Za studzień-kastryčnik 2023-ha — kala 60 tysiač tolki ź ES.
Dla paraŭnańnia, u 2021 hodzie fizasoby impartavali z trecich krain usiaho kala 34 500 aŭto. Pa vynikach 2022 hoda impart vyras u 2,4 raza. Sioleta kolkasny pryrost moža być u miežach 15-25% za hod.
Pry hetym varta adznačyć, što ŭ 2023 hodzie ź Jeŭropy pačali ŭvozić bolš novych aŭto, u tym liku premijalnaha siehmientu. Kali za minuły hod ź ES u Biełaruś adpravili aŭto amal na 1,5 miljarda jeŭra, to tolki za 9 miesiacaŭ hetaha hoda hety pakazčyk skłaŭ kala 1,7 miljarda jeŭra.
Vynikaje, što siaredni košt aŭto, jakoje jedzie ź Jeŭropy ŭ Biełaruś, pieravyšaje 28 tysiač jeŭra.
Razhrom ABW.by
I kali dla pradstaŭnikoŭ aŭtamabilnaha biznesu 2023 hod byŭ dakładna nie samym horšym, to dla vydańnia «Aŭtabiznes» (abw.by) jon staŭ apošnim. Viadučy aŭtamabilny partał z tryccacihadovaj historyjaj faktyčna skončyŭ svajo isnavańnie praz represii z boku ŭładaŭ.
Redakcyja ŭpieršyniu paciarpieła ad siłavikoŭ u červieni 2022 hoda. Tady byli zatrymanyja hałoŭnaja redaktarka Julija Mudreŭskaja, redaktar śpiecprajektaŭ Juryj Hładčuk i vypuskajučy redaktar Vadzim Ziankievič.
Ziankieviču dali 13 sutak. Na Mudreŭskuju i Hładčuka zaviali kryminalnyja spravy. Julii prysudzili paŭtara hoda kałonii (abvinavacili pa artykule 342 KK, «arhanizacyja ci padrychtoŭka dziejańniaŭ, jakija hruba parušajuć hramadski paradak, abo ŭdzieł u ich»), a Juryju — dva z pałovaj (toj ža artykuł 342, a taksama 368 — «abraza Łukašenki»).
Ale pracu partał praciahnuŭ.
Druhi raz redakcyja sutyknułasia ź siłavikami naprykancy kastryčnika 2023 hoda. Tady zatrymali i abvinavacili va ŭdziele ŭ pratestach i niehatyŭnych kamientaryjach novaha dyrektara partała Vitala Palakova.
U kancy dopisu pad videa z Palakovym HUBAZiK pahražaŭ ułaśnikam biznesu, jakija na toj momant znachodzilisia ŭ adpačynku. Siłaviki ździekliva napisali, što tyja musiać «rychtavacca, bo siły im chutka spatrebiacca». U vyniku vydańnie Abw.by spyniła isnavańnie.
Čytajcie taksama:
VW upieršyniu pakazaŭ novy Transporter. Fanaty marki mohuć być rasčaravanyja, bo heta budzie nie zusim Volkswagen
Hrodzienski aŭtafiestyval vypuściŭ haračy kalandar na 2024 hod
Ciapier čytajuć
U kadr znoŭ trapiła, jakim pamieram šryfta dla Łukašenki drukujuć vystupy, kab jon bačyŭ13
Kamientary