«Samy vialiki danat — 10 tysiač jeŭra». Redaktar Reform.by Fiodar Paŭlučenka raskazaŭ pra sabranyja za dzień hrošy
Za pieršy dzień prajekt Reform.by padtrymali danatami 260 čałaviek. Suma najvialikšaha ź ich — 10 tysiač jeŭra. Pra heta raskazaŭ «Našaj Nivie» hałoŭny redaktar vydańnia Fiodar Paŭlučenka.
Fiodar Paŭlučenka nie staŭ nazyvać ahulnuju sumu atrymanaj dapamohi, ale adznačyŭ, što jana dazvolić vydańniu pratrymacca «niejki čas». Žurnalist nie čakaŭ, što jaho zvarot atrymaje šyroki vodhuk.
Pra prablemy ź finansavańniem Reform.by Paŭlučenka paviedamiŭ 21 śniežnia. Asnoŭny instytucyjny donar admoviŭ vydańniu ŭ padtrymcy biez tłumačeńnia pryčyn.
«Mnie niajomka prasić ludziej dapamahać nam, bo jość bolš značnyja prablemy: siemji palitźniavolenych, połk Kalinoŭskaha i šmat inšych», — tłumačyć situacyju žurnalist.
Na jaho pohlad, vyrašyć prablemy z Reform.by i inšymi biełaruskimi miedyjami, niemahčyma praz danaty. Heta pavinna być instytucyjanalnaja padtrymka. Najpierš heta tyčycca Jeŭrasajuza i ZŠA.
Fiodar Paŭlučenka kaža, što Reform.by nikoli nie mieŭ doŭhaterminovaj i stabilnaj padtrymki i raźličvaŭ na ŭłasnyja srodki.
Kali ž vydańnie vymušana było źjechać ź Biełarusi, to pracavała za tak zvanyja prajektnyja srodki. Ich vydatkoŭvali na kankretny prajekt. A paśla jaho zakančeńnia treba było šukać inšaha sponsara.
«My viedali, što treba źviartacca da instytucyjanalnych donaraŭ u Jeŭrasajuzie. My źviarnulisia i atrymlivali adkazy, što treba pačakać — i voś dačakalisia admovy», — davodzić žurnalist.
Pavodle jaho, ciapier redakcyja na suviazi ź jeŭračynoŭnikami i ofisam Śviatłany Cichanoŭskaj.
«Kali nam udasca prabić dzirku, praź jakuju zmožam atrymać dapamohu, to heta dapamoža nie tolki našaj redakcyi, ale i inšym biełaruskim miedyja. My znojdziem šlachi, kab rastłumačyć, čamu padtrymka biełaruskich miedyja — važnaja katehoryja dla donaraŭ», — zapeŭnivaje jon.
Na jaho pohlad, donary i zachodnija partniory nie bačać roźnicy pamiž błohierstvam, miedyja, žurnalistykaj. Kali takaja situacyja praciahniecca, to z takoj samaj prablemaj, jak u Reform.by, sutyknucca inšyja miedyja. Na ich pracu nie budzie hrošaj.
Fiodar Paŭlučenka pierakanany, što bieź instytucyjanalnaj padtrymki zachavać biełaruskuju žurnalistyku budzie nie mahčyma.
«Heta vialikaja prablema, bo prafiesijnaja žurnalistyka — heta jak pavietra. Kali jana jość, to jaje nichto nie zaŭvažaje, ale ŭsie karystajucca jaje praduktam», — zaŭvažaje jon.
Pa jaho słovach, ciapier u Jeŭrasajuzie ŭtvaryŭsia kansiensus, što biełaruskija i rasijskija miedyja pavinny abjadnoŭvacca, pracavać razam. Pamiž Rasijaj i Biełaruśsiu nie robicca roźnicy.
«Rasijskija miedyja, jakija vymušanyja byli zjechać za miažu, u pryjarytecie, a biełaruskija zastajucca pa-za pracesam. Heta pamyłka z boku jeŭrapiejskich palitykaŭ. Biełaruskija miedyja pavinny być adasoblenyja ad rasijskich, ich ni ŭ jakim razie nielha abjadnoŭvać z rasijskimi kiejsami», — ličyć hałoŭny redaktar Reform.by.
Na jaho zvarot źviarnuli ŭvahu nie tolki čytačy i kalehi, ale i prapahandysty. Adnym ź pieršym adreahavaŭ telehram-kanał, blizki da hubazika.
«Biezumoŭna, ich ciešyła naša prablema, ale heta śviedčyć, što jany taksama sočać za nami, čytajuć infarmacyju Reform.by. Mianie heta zadavoliła», — adznačaje Fiodar Paŭlučenka.
Reform.by jak paŭnavartasnaje miedyja było stvoranaje ŭ žniŭni 2018 hoda. Jaho inicyjavali troje žurnalistaŭ — Alaksiej Žukaŭ, Alaksandr Atroščankaŭ i Fiodar Paŭlučenka.
U žniŭni 2021 hoda Mininfarm zabłakavaŭ damien dla biełaruskich karystalnikaŭ. Paśla pačatku vajny błakiroŭku pačali i rasijskija cenzary. Sajt vykinuli z rasijskich ahrehataraŭ navin i zabłakavali ŭ Rasii.
Sioleta ŭ krasaviku supołku sajta Reform.by ŭ «Adnakłaśnikach» abviaścili «ekstremisckaj».
Dapamahčy danatami Reform.by možna tut.
«Naša Niva» — bastyjon biełaruščyny
PADTRYMAĆHladzicie taksama:
U Biełarusi pryznali «ekstremisckaj» čarhovuju knihu
U Rasii stvaryli «Tavaryša majora» dla vyjaŭleńnia administrataraŭ telehram-kanałaŭ
Kamientary