Kitajcy ahladali placoŭku pad majninh-fiermu ŭ Hrodzienskaj vobłaści
U Śvisłač pryjazdžali kitajskija inviestary, jakija šukajuć placoŭku dla majninhu kryptavalut. Jany sustrelisia sa staršynioj Śvisłackaha rajvykankama Alaksandram Viarsockim i jaho namieśnikam, jaki kuryruje pytańni ekanomiki, zaŭvažyła vydańnie Hrodna.life.
U Śvisłackim rajonie inviestary ahledzieli placoŭki, dzie možna pabudavać majninh-fiermu. Detalaŭ sustrečy nie raskryli, ale nie sakret, što biełaruskija ŭłady apošnim časam bolš havorać ab pryciahnieńni ŭ krainu kryptavalutnych zdabytčykaŭ.
Ułady chočuć bolš majninh-fierm u Biełarusi
Ministerstva enierhietyki, «Biełenierha» i Ministerstva antymanapolnaha rehulavańnia i handlu zacikaŭleny ŭ pavieličeńni kolkaści fierm dla majninhu kryptavaluty ŭ krainie. U tym liku i tamu, što biełaruskaja ekanomika nie spažyvaje ŭsie tyja abjomy enierhii, jakija vyrablajucca paśla zapusku BiełAES.
Biełaruskija ŭłady vielmi chočuć pryciahnuć u krainu majnieraŭ, raskazaŭ namieśnik kiraŭnika MARH Ivan Viežnaviec na kanfierencyi pa kryptavalutach, jakaja prajšła ŭ Minsku ŭ śniežni 2023. Dla hetaha inviestaram prapanujuć vialikija skidki na elektryčnaść. Bujny majnier moža atrymać skidku kala 30% pa taryfie na elektraenierhiju, kali zaklučyć z «Biełenierha» damovu, pa jakoj fierma abaviazanaja spažyvać minimum 15 młn kVt·h na hod.
Choć u Biełarusi majninh, a taksama kupla i prodaž kryptavaluty fizičnymi asobami ŭ asabistych metach dazvoleny, budavać na hetym biznes fizičnym asobam nielha. U MUS navat prapracoŭvajuć mahčymaści zabaranić usie ŭhody z kryptavalutami dla fizičnych asob. I choć pakul fizičnym asobam zajmacca majninham u asabistych metach možna, dla lehalnaha biznesu ŭ hetaj śfiery treba stvaryć jurydyčnuju asobu.
Kolki majninh-fierm u Biełarusi ciapier
Hiendyrektar kancerna «Biełenierha» Pavieł Drozd raskazaŭ Tochka.by, što siońnia ŭ Biełarusi pracujuć dźvie bujnyja fiermy pa zdabyčy kryptavaluty — na placoŭcy Biarozaŭskaj DRES i na Minskim zavodzie šaścierniaŭ. Takija bujnyja spažyŭcy vielmi vyhadnyja kancernu, bo vykarystoŭvajuć vialikija abjomy enierhii kruhłasutačna i biez vychodnych.
Ciapier čytajuć
«U nas jość płan, jak stać nastupnaj Finlandyjaj Uschodniaj Jeŭropy». Siarhiej Cichanoŭski vystupiŭ u Jeŭraparłamiencie31
Kamientary