67-hadovaja biełaruska viarnułasia sa Šviecyi. Ciapier joj pahražaje da dziesiaci hadoŭ turmy
Halina Kraśnianskaja, imavierna, stała žyła ŭ Šviecyi i navat udzielničała ŭ žyćci dyjaspary. Ale čas ad času viartałasia ŭ Biełaruś. U adzin z takich razoŭ jaje zatrymali. Raspaviadajem, što viadoma pra žančynu.
Halinie Kraśnianskaj 67 hadoŭ. Rodam z Babrujska, imavierna, ź siamji vajskoŭca — u sacsietkach paznačana, što jana naradziłasia ŭ «vajskovym haradku Kisialevičy». Niekali tam byŭ bujny vajenny harnizon i škoła była stvoranaja akurat dla dziaciej vajskoŭcaŭ.
Paśla škoły pajechała ŭ Minsk vučycca na chimika ŭ Biełaruskim technałahičnym instytucie (ciapier — BDTU). Ale paśla Halina pracavała ŭ vajskovych častkach, kali vieryć jaje sacsietkam. Naprykład, z 1981-ha pa 1986-y ŭ častcy № 48819, jakaja baziravałasia ŭ prasavieckaj častcy Hiermanii — HDR.
U niezaležnaj Biełarusi pracavała spačatku ŭ vajskovaj častcy, a paśla inžynieram u pryvatnaj firmie. Imavierna, paśla jana pierajechała ŭ Šviecyju: va ŭsich sacsietkach Haliny bolšaja častka fota apošnich 15 hadoŭ adtul, a ŭ kantaktnych knihach inšych abanientaŭ jana padpisanaja «Halina Šviecyja» i «Halina Stakholm». Jana musić mieć i šviedskaje hramadzianstva.
Jana raspaviadała ŭ sacsietkach pra roznyja pryhožyja miescy, jakija bačyła ŭ hetaj krainie, a taksama vykładała fota z sustreč miascovaj dyjaspary. Ničoha kryminalnaha tam niama — ludzi prosta źbiralisia na supolnyja pikniki abo kulturnickija iventy.
A ŭ 2020-m žančyna z sumam pisała, što praz kavid nie moža pabačyć baćkoŭ.
Chobi Haliny — kucharyć. U svaim instahramie jana źmiaščała fota chatniaj vypiečki dy inšych stravaŭ.
Nieviadoma, kali žančyna viarnułasia ŭ Biełaruś, ale nie raniej za viasnu 2023-ha hoda. Apošniaje abnaŭleńnie ŭ jaje fejsbuku datujecca sakavikom, ale apošnija fota sa Šviecyi — kancom 2022-ha.
Data zatrymańnia nieviadomaja taksama, ale vinavaciać jaje druhoj častcy artykuła 361-3 Kryminalnaha kodeksa. Pa źviestkach «Viasny», zvyčajna heta aznačaje achviaravańnie biełaruskim dobraachvotnikam abo na dapamohu Ukrainie. Žančynie pahražaje ad piaci da dziesiaci hadoŭ turmy — inšaha pakarańnia pa artykule nie praduhledžana.
Sud nad Halinaj Kraśnianskaj pačaŭsia siońnia ŭ Minskim haradskim sudzie. Imavierna, da suda jaje trymajuć pad vartaj.
«Naša Niva» — bastyjon biełaruščyny
PADTRYMAĆCiapier čytajuć
Minsk, Varšava, Vilnia — paraŭnoŭvajem, dzie praściej kupić kvateru čałavieku ź siaredniaj zarpłataj1
Kamientary