Praciahvajucca supraćstajańni ŭ Baškiryi. Siłaviki ŭžyli ślezaciečny haz, pratestoŭcy zakidvajuć ich śnieham
Da budynka suda ŭ Bajmaku, dzie niekalki tysiač čałaviek pratestujuć suprać prysudu aktyvistu Failu Ałsynavu, prybyło padmacavańnie siłavikoŭ. Jany ŭžyli ślezaciečny haz. Ludzi nie razychodziacca i nie dajuć vyvieźci Ałsynava.
Karespandenty ź miesca padziejaŭ paviedamlajuć, što siłaviki ŭžyli śvietłašumavyja hranaty i ślezaciečny haz. U vyniku jość paciarpiełyja.
«Troje chłopcaŭ biehli, trymalisia za vočy, skazali, što žorstka cisnuć», — pieradaje karespandent vydańnia «NieMoskvy».
Faila Ałsynava, jakoha asudzili siońnia na čatyry hady kałonii, jašče nie vyvieźli z budynka suda. Palicyja nie zmahła adcisnuć ludziej z darohi, pa jakoj pavinien prajazdžać aŭtazak.
U natoŭpie raspaŭsiudžvajucca čutki, što na miesca sutyknieńniaŭ pavinien pryjechać hubiernatar rehijonu Radyj Chabiraŭ, jaki i napisaŭ danos na aktyvista, ale hubiernatara niama.
Padstavaj dla kryminalnaha pieraśledu Ałsynava stała jaho pramova padčas uzhodnienaha mitynhu viasnoj 2023 hoda. U joj aktyvist, u pryvatnaści, užyŭ słovazłučeńnie «kara chałyk»: «Armianie zjeduć na svaju radzimu, «kara chałyk» — da siabie, ruskija — u svaju Razań, tatary — u svoj Tatarstan. My nie zmožam pierasialicca, u nas niama inšaha doma, naš dom tut!»
Ekśpiertyza, praviedzienaja padčas rasśledavańnia, vyrašyła, što hetaje słovazłučeńnie «adpaviadaje značeńniu słoŭ «chačy«, «čurki«, «čarnamazyja». Na padstavie ekśpiertyzy Ałsynava abvinavacili ŭ ekstremiźmie, nibyta jon daŭ «niehatyŭnuju acenku» žycharam Centralnaj Azii i Kaŭkaza. Miascovyja aktyvisty ž nastojvajuć, što pierakład pramovy, jaki byŭ pradstaŭleny ŭ sudzie, naŭmysna skazili.
Ałsynaŭ — baškirski nacyjanalny lidar, ekaaktyvist, vystupaŭ suprać zołatazdabyčy ŭ rehijonie.
Skandał u «Jeŭraopcie». 96‑hadovamu dziadulu nie dazvolili prysieści na kresła kala kasy20
Kamientary