Rasija painfarmavała Biełaruś pra pierachod da źbirańnia 100% mytaŭ na naftu. Minsk admaŭlajecca płacić.
Biełaruski bok prainfarmavany ab pierachodzie Rasii da źbirańnia z 1 studzienia mytnych płaciažoŭ u poŭnym abjomie na naftu, što pastaŭlajecca. Pra heta zajaviła pres-słužba ŭrada RF pa vynikach zavieršanych 31 śniežnia biezvynikovych pieramoŭ.
Rasijski bok u poŭnaj adpaviednaści z damoŭlenaściami, dasiahnutymi na pasiadžeńni Vyšejšaha dziaržsavieta 10 śniežnia, zrabiŭ usio mahčymaje dla zaklučeńnia da Novaha hoda mižuradavaha pahadnieńnia, jakoje rehuluje pastaŭki rasijskaj nafty ŭ Biełaruś, padkreślivaje pres-słužba. Z hetaj metaj biełaruskamu boku byli pieradadzienyja prajekty adpaviednych dakumientaŭ.
«Pieramovy, pa sutnaści, vialisia z 10 pa 31 śniežnia štodnia. Na žal, nam nie ŭdałosia vyjści na damoŭlenaści ab padpisańni adpaviednych dakumientaŭ», — paviedamlaje pres-słužba ŭrada Rasii.
Adnačasova padkreślivajecca, što rasijski bok paćviardžaje hatoŭnaść biaspošlinna pastaŭlać naftu dla ŭnutranaha spažyvańnia Biełarusi z ulikam asablivaha charaktaru sajuźnickich adnosin va ŭzhodnienyja terminy i pry najaŭnaści dakumientaŭ, jakija stvarajuć dla hetaha pravavyja asnovy.
Z hetaj metaj biełaruskim partnioram pieradadziena zaprašeńnie prybyć u Maskvu ŭ studzieni dla pieramoŭ, kab vyjści na padpisańnie adpaviednych dakumientaŭ.
U paviedamleńni havorycca, što rasijskija pastaŭščyki nafty harantujuć vykanańnie svaich abaviazacielstvaŭ pa pastaŭkach u adpaviednaści ź dziejnymi kantraktami dla spažyŭcoŭ u Biełarusi i Jeŭropie.
Raniej krynica ŭ rasijskaj delehacyi zajaviła, što pieramovy ab pastaŭkach rasijskaj nafty ŭ Biełaruś u 2010 hodzie zaviaršylisia biezvynikova i buduć praciahvacca. Pavodle jaho słoŭ, biełaruskaja delehacyja viartajecca damoŭ. Situacyja, što skłałasia, źviazanaja z «adsutnaściu nieabchodnych dyrektyŭ i paŭnamoctvaŭ u pradstaŭnikoŭ Respubliki Biełaruś».
Pavodle słoŭ krynicy, Minsk damahajecca biaspošlinnych pastavak usiaho abjomu syraviny. «Sa škadavańniem davodzicca adznačyć, što biełaruski bok faktyčna pa-raniejšamu praciahvaje prytrymlivacca ničym nie abhruntavanaj zapytnaj pazicyi, pavodle jakoj Rasija, pa sutnaści, pavinna praciahvać subsidavańnie biełaruskaj ekanomiki, praciahvajučy, tym bolš va ŭmovach adsutnaści adpaviednaha mižuradavaha pahadnieńnia, biaspošlinnyja pastaŭki nafty nie tolki dla ŭnutranaha spažyvańnia, ale i na ŭvieś abjom rasijskaj syraviny, što pastaŭlajecca», — zajaviła krynica.
28 śniežnia vice-premjer rasijskaha ŭrada Ihar Siečyn paviedamiŭ, što pahadnieńnie ab časovych pastaŭkach nafty z Rasii ŭ Biełaruś u 2010 hodzie moža być padpisanaje 30—31 śniežnia. Kali hetaha nie adbudziecca, 1 studzienia 2010 hoda nabudzie moc zvyčajny režym pastavak enierharesursaŭ, jaki praduhledžvaje vypłatu 100% mytnych płaciažoŭ.
18 śniežnia Siečyn zajaviŭ, što Rasija prapanavała Biełarusi biaspošlinna pastaŭlać 5—6 młn. ton nafty dla ŭnutranaha spažyvańnia. Uvieś astatni abjom całkam budzie abkładacca ekspartnymi pošlinami. Z 2010 hoda pierastaje dziejničać panižalny kaeficyjent na pastaŭki nafty i naftapraduktaŭ u Biełaruś, jaki ciapier składaje 0,356, nahadaŭ Siečyn.
Biełaruski bok «zychodzić z taho, što
da momantu padpisańnia adpaviednych dakumientaŭ biaspošlinnyja pastaŭki nafty z Rasijskaj Fiederacyi ŭ abjomach unutranaha spažyvańnia Respubliki Biełaruś u studzieni—lutym 2010 hoda pavinny ažyćciaŭlacca ŭ adpaviednaści z damoŭlenaściami, dasiahnutymi raniej prezidentami». «Usie nieabchodnyja dla hetaha pravavyja padstavy jość, abjomy pastavak nafty zakantraktavanyja subjektami haspadarańnia dźviuch krain, biełaruskim bokam ažyćcioŭlena ich papiaredniaja apłata», — zajaŭlaje pres-słužba ŭrada.
U paviedamleńni adznačajecca, što padčas praviedzienych 30—31 śniežnia ŭ Maskvie pieramoŭ pa ŭmovach pastavak nafty «na členaŭ biełaruskaj delehacyi, skład i paŭnamoctvy jakoj byli paćvierdžanyja adpaviednaj pastanovaj Savieta ministraŭ Respubliki Biełaruś,
byŭ akazany biesprecedentny cisk, što, pavodle mierkavańnia biełaruskaha boku, źjaŭlajecca absalutna nieabhruntavanym i niedapuščalnym».
«Faktyčna biełaruskamu boku było prapanavana parušyć bazavy dahavor ab stvareńni adzinaj mytnaj terytoryi i farmiravańni Mytnaha sajuza, što byŭ padpisany kiraŭnikami troch dziaržaŭ — Biełarusi, Rasii i Kazachstana. Sychod ad hetych damoŭlenaściaŭ i vyviadzieńnie cełaha enierhietyčnaha siektara Biełarusi za miežy padpisanych dahavoraŭ pa stvareńni Mytnaha sajuza šmat u čym padarvali b usie dasiahnutyja damoŭlenaści pa dalejšaj intehracyi našych dziaržaŭ», — padkreślivaje pres-słužba Saŭmina.
Topavy pierakładčyk pajechaŭ u Biełaruś mianiać pašpart — i sieŭ za danaty. «KDB pahladzieŭ na sumu i vyrašyŭ, što nichto ŭ zdarovym rozumie nie moža vydatkavać stolki ŭłasnych hrošaj»3
Kamientary