«Kali takich ludziej buduć sotni i tysiačy, my sutykniemsia z surjoznaj pahrozaj». Kiejs byłoha milicyjanta Macijeviča ŭzrušyŭ litoŭskich palitykaŭ
Litoŭskija palityki i čynoŭniki paśla źjaŭleńnia infarmacyi, što ŭ Litvie paŭtara hoda žyŭ i pracavaŭ były major biełaruskaj milicyi, jaki ŭdzielničaŭ u zadušeńni pratestaŭ 2020 hoda, zahavaryli pra nieabchodnaść udaskanaleńnia pracesu pravierki biełarusaŭ, jakija ŭjazdžajuć u Litvu, piša Delfi.lt. Pa hetym pytańni jość zhoda pamiž uładami i apazicyjaj.
Vice-śpikier Siejma, pradstaŭnik kiroŭnaj kaalicyi Paŭlus Saŭdarhas adznačyŭ, što najaŭnaha ciapier paradku pravierki niedastatkova. Deputatka ad apazicyjnych sacyjał-demakrataŭ Davile Šakalenie taksama adznačaje, što važna pašyryć mahčymaści ŭstanoŭ, jakija ŭ Litvie praviarajuć inšaziemcaŭ.
«My marudzim z nadańniem našym raźviedčykam paŭnamoctvaŭ, jakija jość u ich kaleh ź inšych krain NATA. (…) Treba havaryć i pra finansavańnie», — skazała deputatka.
Na dumku Paŭlusa Saŭdarhasa, niekantralavany ŭjezd biełarusaŭ u krainu moža stać pahrozaj litoŭskaj nacbiaśpiecy.
«Biełaruśsiu kiruje dyktatar, heta dziaržava nafaršyravanaja śpiecsłužbami, tam dla hetaha zadziejničana šmat mahutnaściaŭ — kab raściahnuć sietku biełaruskich ahientaŭ u Litvie. (…) U nas mohuć być takija ahienty, i ich niaprosta budzie vyjavić Departamientu mihracyi i našaj vyviedcy», — skazaŭ deputat.
«Kali źjava budzie masavaj — kali takich ludziej buduć sotni i tysiačy, to nastupić dzień X, kali my sutykniemsia z surjoznaj pahrozaj nacbiaśpiecy», — zaŭvažyŭ Saŭdarhas.
1 lutaha 2024 hoda Departamient mihracyi paviedamiŭ, što pryniata rašeńnie ab pazbaŭleńni hramadzianina Biełarusi Alaksandra Macijeviča časovaha dazvołu na žycharstva ŭ Litvie, pakolki jon nie zadavalniaje ŭmovam, jakija dziejničajuć u dačynieńni da asob, jakim vydajuć taki dakumient.
Kali vyśvietlicca, što Macijevič ujaŭlaje pahrozu biaśpiecy krainy, to budzie pryniata pastanova zabaranić jamu ŭjezd u Litvu.
Pavodle infarmacyi MUS Litvy, pieršy raz Macijevič pryjechaŭ u Litvu z Polščy, u jaho była nacyjanalnaja viza inšaj krainy Jeŭrasajuza. U listapadzie 2022 hoda, kali jamu vydali dazvoł na žycharstva, nie było źviestak pra toje, što jon moža ŭjaŭlać pahrozu nacyjanalnaj biaśpiecy Litvy.
Ciapier čytajuć
Amierykancy dabilisia vyzvaleńnia Juryja Ziankoviča. Jon byŭ prysudžany da 11 hadoŭ źniavoleńnia13
Kamientary