Ministerstva infarmacyi trecim razam admoviła niedziaržaŭnaj haziecie «Mahiloŭski čas» u rehistracyi. Hetym razam čynoŭniki, pavodle dyrektarki TAA Hanny Iljinoj, vyjavili, što pamiaškańnie, u jakim znachodzicca jurydyčny adras vydańnia, nie adpaviadaje patrabavańniam zakanadaŭstva.
Uładalnik pamiaškańnia, tavarystva «Naładka‑Servis», prapanuje skasavać damovu na jaho arendu pa ŭzhadnieńni bakoŭ. Kali da 15 studzienia hetaha nie adbudziecca, uładalnik maje namier skasavać damovu ŭ adnabakovym paradku.
Hanna Iljina pierakananaja, što na ŭładalnika pamiaškańnia ciśnie miascovaja ŭłada. Akurat pierad navahodnimi śviatami dziejnaść tavarystva «Naładka‑Servis» praviarali supracoŭniki Ministerstva pa nadzvyčajnych situacyjach. Čynoŭniki spasyłajucca na toje, što nibyta žychary rajona, dzie źbirajucca rehistravać hazietu, niezadavolenyja źjaŭleńniem drukarni; akramia taho, jany suprać i samoj rehistracyi haziety.
«Ja nie viedaju, adkul naahuł źjaviłasia infarmacyja pra drukarniu, adnak hety nibyta zvarot žycharoŭ i spravakavaŭ pravierki dziejnaści arandadaŭcy. My nie źbirajemsia skasoŭvać damovu pavodle pahadnieńnia bakoŭ, ale jana adnaznačna budzie skasavanaja. Ułada ŭparta suprać rehistracyi niedziaržaŭnaj haziety. I, mahčyma, my abrali nie najlepšy čas — napiaredadni vybarčych kampanij. Spačatku nas admaŭlalisia rehistravać u miežach zakanadaŭstva ab ŚMI, ciapier ža pajšli šlacham cisku na arandadaŭcu», — zaznačaje Hanna Iljina.
Pieršy raz hazietu admovilisia rehistravać, bo ŭ jaje hałoŭnaha redaktara nie było vyšejšaj adukacyi. Druhi raz — praz adsutnaść u rehistracyjnym pakiecie kopii damovy zasnavalnika ź jurydyčnaj asobaj, na jakuju ŭskładalisia funkcyi redakcyi haziety.
Hazieta «Mahiloŭski čas» vychodziła jak niezarehistravanaje hramadska‑palityčnaje vydańnie ad 2007 hoda nakładam 299 asobnikaŭ. Sproby zarehistravać hazietu iduć ad 10 vieraśnia 2009 hoda.
Ciapier čytajuć
Kalekcyju karcin Viktara Babaryki raspradajuć ź vialikimi źnižkami. Ale biez samaha darahoha dla jaho tvora4
Kamientary