Pamiatajecie ŭkrainskuju vałanciorku, jakaja źnikła pa darozie ŭ Mazyr? Praz paŭhoda znajšłasia za kratami — «špijanaž»
Sud nad Natallaj Zacharanka pačniecca ŭ dzień jaje 44-hodździa. Žančynie pahražaje da piatnaccaci hadoŭ turmy.
Natalli Zacharanka 43 hady. Žančyna jašče da vajny časta naviedvała Biełaruś — padpracoŭvała handlem na homielskich rynkach. Ale paśla rasijskaha ŭvarvańnia jana pačała dapamahać biežancam dy pierasialencam z Ukrainy. Pieravoziła ludziej u ES i ŭ Biełaruś, pieradavała dla svajakoŭ, jakija zaviśli ŭ Biełarusi, hrošy, leki i dakumienty.
Hety kirunak jaje dziejnaści paćviardžajuć nie tolki słovy svajakoŭ, ale i zapisy numara žančyny ŭ kantaktnych knihach roznych ludziej. Siarod ich: «pieravoźnik na RB», «Natalla pieravoźnik z Ukrainy», «Natalla Pasyłki», «Natalla dakumienty» i hetak dalej.
Va ŭkrainskich miedyja jaje nazyvali vałanciorkaj. Viadoma, što jana jeździła ŭ Biełaruś na ŭłasnaj mašynie (miarkujučy pa zapisach u kantaktnych knihach, heta miniven Mercedes Vito).
Suviaź ź joj źnikła 19 lipienia 2023 hoda, amal adrazu paśla taho, jak jana pryjechała ŭ Biełaruś. Tryvohu zabiła dačka žančyny: numary i miesiendžary maci stali niedastupnyja, a aficyjnyja orhany maŭčali. Praŭda, dačku pierakonvali, što, maŭlaŭ, siarod zatrymanych Natalli niama. Ale i paśla publikacyj u miedyja pra žančynu nie stała ničoha viadoma.
Jak vyjaviłasia, 15 lutaha 2024 u Homielskim abłasnym sudzie pačniecca praces nad Zacharanka. U hety dzień u Natalli dzień narodzinaŭ. Abvinavačvajuć jaje ŭ špijanažy — heta asabliva ciažki artykuł, pa jakim mohuć pryznačyć ad siami da piatnaccaci hadoŭ turmy.
Z maksimalnaj dolaj imaviernaści možna ličyć, što Natallu ŭtrymlivajuć u homielskim SIZA №3 — inšych izalataraŭ u Homieli niama.
Razam z Natallaj sudziać jaje znajomuju Łarysu Krupu za «niedaniasieńnie pra złačynstva». Joj pahražaje da dvuch hadoŭ turmy — ale jana nie ŭ SIZA, bo heta niemahčyma pa zakonie
(uziać pad vartu da suda mohuć, kali čałavieku pa artykule, pa jakim jaho vinavaciać, pahražaje bolš za dva hady źniavoleńnia).
«Naša Niva» — bastyjon biełaruščyny
PADTRYMAĆCiapier čytajuć
Na Šry-Łancy ŭ 37 hadoŭ pamior biełaruski kinapradziusar Andrej Matałyha3
Kamientary