Niepakazalnaja pieramoha

Niekali klasyk biełaruskaj litaratury Ŭładzimier Arłoŭ u adnym z padarožnych ese pisaŭ: «Bieźlič tvaich suajčyńnikaŭ ščaśliva žyvie j pamiraje, navat nia viedajučy, što niedzie pamiž Francyjaj i Hišpanijaj jašče ŭ Siaredniavieččy ŭščamiłasia j dažyła da našych dzion maleńkaja, ale hanarlivaja j niezaležnaja kraina Andora». Napeŭna, stolki andorcaŭ razam, jak viečaram 16 žniŭnia, jašče nikoli nia bačyła biełaruskaja stalica. Nasielnictva Andory składaje 65 tysiačaŭ čałaviek, prykładna stolki ž sama kolki pražyvaje ŭ Pinskim rajonie.

Akazvajecca, što andorcy jašče i futboł umiejuć hulać, inšym razam zusim nia kiepska. Nia vierycie? Zapytajciesia ŭ hulcoŭ zbornaj Biełarusi ŭzoru 2000 hodu. Tady ŭ dzień Čarnobylskaj trahiedyi 26 krasavika našyja chłopcy ŭmudrylisia prajhrać andorcam ź likam 0:2. Treba zaŭvažyć, što taja pieramoha stała pieršaj u historyi zbornaj maleńkaj hornaj krainy. Dla biełarusaŭ heta była sapraŭdnaja hańba, paśla hetaha matču z pasady hałoŭnaha trenera zvolniŭsia Siarhiej Baroŭski.

Takim čynam BFF, vybirajučy supiernika zbornaj na žnivień, adrazu źbirałasia zabić dvoch zajcaŭ: i revanš uziać za sensacyjny projhryš u 2000-m, i nie psavać jubileju, bo dla nacyjanalnaj zbornaj heta byŭ soty matč u historyi.

Jubileju nie sapsavali. Biełarusy zabili try biezadkaznyja miačy, choć pretenzii da kamandy, naturalna, jość. Zanadta mała forvardy ŭ pieršym tajmie stvarali vastryni ŭ bramaŭ supiernika. Napadniki Kancavy i Łańko nie zmahli jak śled ni razu ŭdaryć pa varotach. I pieršy tajm moh skončyć sumnymi nulami na tablo, kab nie indyvidualnaje majsterstva Alaksandra Hleba. Chaŭbek londanskaha «Arsenała» na 35-j chvilinie ŭ štrafnoj pryhoža apracavaŭ miač i trapna paceliŭ u blizki vuhał andorskich varot.

U druhim tajmie pačalisia šmatlikija zamieny, jak z adnaho, tak i z druhoha boku, tamu prasačyć cełasny malunak hulni było niemahčyma. Zamieny ŭ składzie zbornaj Biełarusi pajšli na karyść. Andorskija abaroncy, nie paśpiavajučy za śviežymi biełaruskimi napadnikami, usio čaściej pačynali parušać praviły. Na 76-j chvilinie adno z takich parušeńniaŭ skončyłasia štrafnym udaram u ličanych santymetrach ad štrafnoj placoŭki. Vital Bułyha ŭdaryŭ na moc – i nie prahadaŭ. Pireniejskaja «ścienačka» akazałasia chistkaj i ŭdar dasiahnuŭ mety – 2:0.

Praz vosiem chvilinaŭ jašče adzin rezervist Siarhiej Karnilenka, abmanuŭšy fintom abaroncu supiernika, dobra zapaliŭ u daloki kut – 3:0. Razhrom byŭ aformleny, astatni čas futbalisty abiedźviuch kamandaŭ adkryta dahulvali matč.

Hulcy biełaruskaj zbornaj nie asabliva imknulisia kłaścisia ŭ padkatach, bo i takoha režymu chapała dla tatalnaj pieravahi. Andorcy litaralna tolki niekalki razoŭ pierajšli na biełaruskuju pałovu pola.

Naŭrad ci hety pajadynak stanie pakazalnym pierad startam našaj kamandy ŭ adboračnym cykli da čempijanatu Eŭropy, bo klas hulcoŭ zbornaj Andory vidavočna nižejšy, čym u halandcaŭ i rumynaŭ, ci navat u albancaŭ, ź jakimi i daviadziecca pačynać 2 vieraśnia.

❏

Jak zhulali supierniki biełarusaŭ pa adboračnaj hrupie

Nie praminuli mahčymaści 15-16 žniŭnia pravieści hieneralnyja repetycyi i našy supierniki pa padhrupie «G».

Słaviency ŭ Cele razyhrali ničyju ź izrailicianami. Na hoł Bienajuna słaviency adkazyli dakładnym strełam Horana Šukała. Nia vyśvietlili macniejšaha i baŭhary z valijcami – 0:0.

Zatoje haladcy dastatkova nazabivali mocnaj zbornaj Irlandyi ŭ Dublinie – 4:0. Dubl zrabiŭ forvard amsterdamskaha «Ajaksu» Klas-Jan Chuntełaar, jašče pa miaču zabili Raben i van Persi.

Rumyny biez asablivaj ciažkaści razabralisia z kipryjotami – 2:0. A luksemburžcy akazali dastojny supraciŭ turkam, prapuściŭšy adziny hoł na 26-j chvilinie ad napadnika picierskaha «Zenitu» Facicha Tekie. Albancy zabili try miačy ŭ haściach San-Maryna.

• 0
• 0
• 0
• 0
• 0
• 0
• 0
• 0