U Kitai raście razryŭ pamiž słovami i realnaściu

U Piekinie na minułym tydni prajšła štohadovaja siesija parłamienta krainy — Usiekitajskaha schodu narodnych pradstaŭnikoŭ. Jaje tradycyjnym zaviaršeńniem na praciahu troch dziesiacihodździaŭ była pres-kanfierencyja premjer-ministra. Padčas jaje druhaja asoba ŭ dziaržavie adkazvała na pytańni pra nadzionnyja prablemy, jakija stajać pierad krainaj. Ale ŭ hetym hodzie tradycyja była parušanaja. Premjer-ministr nie staŭ kamunikavać z presaj.

Na bryfinhu było zajaŭlena, što druhi čynoŭnik krainy nie budzie adkazvać na pytańni paśla zakryćcia siesii da kanca piacihadovaha terminu paŭnamoctvaŭ parłamienta, za vyklučeńniem «asablivych abstavin».

Jak adznačaje Bloomberg, Kitaj prypyniŭ publikacyju niekatorych niepryjemnych ekanamičnych danych za častku minułaha hoda, takich jak vysoki ŭzrovień biespracoŭja siarod moładzi, što pieraškadžaje inviestaram acanić stan ekanomiki. A lidar Kitaja Si Czińpin adkłaŭ praviadzieńnie dvojčy ŭ dziesiacihodździe kanfierencyi pa doŭhaterminovych reformach, jakaja pavinna była adbycca vosieńniu minułaha hoda.

Jak piša The Wall Street Journal, u svajoj pramovie pierad Usiekitajskim schodam narodnych pradstaŭnikoŭ Li Cian kazaŭ pra metu rostu ŭ 2024 hodzie ekanomiki na 5%, abmiežavańni inflacyi ŭ 3% i stvareńni 12 miljonaŭ novych pracoŭnych miescaŭ u haradach.

Jak adznačaje vydańnie, dziŭna i tryvožna toje, nakolki hetyja mety razychodziacca z realnaściu, uličvajučy miery, zapłanavanyja dla ich dasiahnieńnia, i toje, u jakim stanie ekanomika znachodzicca ciapier. Ekśpierty adznačajuć, što ekanomika Kitaja maje fundamientalnyja prablemy. Vidavočny cykličny spad, jaki paharšajecca niaŭdałaj palitykaj Piekina.

Jak adznačajecca ŭ inšym materyjale The Wall Street Journal, parłamienckaja siesija prademanstravała, jak raście razryŭ pamiž słovami Piekina i realnaściu. Urad, jaki paabiacaŭ adkrytaść i prazrystaść, prykładaje ŭsio bolš namahańniaŭ dla kiravańnia presaj. Čynoŭniki ŭ svaich vystupleńniach na siesii parłamienta adznačali pierśpiektyvy ekanomiki, zamoŭčvajučy niebiaśpieki, ź jakimi jana sutykajecca.

Razryŭ pamiž słovami i realnaściu — daŭniaja rysa kitajskaj palityki, ale jon uzmacniajecca pa miery taho, jak fundamientalnyja niedachopy kitajskaj ekanomiki — padzieńnie nasielnictva, rezki rost zapazyčanaści, paharšeńnie adnosin ź niekatorymi najbujniejšymi handlovymi partniorami i padzieńnie cenaŭ na žyllo — stanoviacca ŭsio bolš vidavočnymi.

Zamiest adkrytaha abmierkavańnia hetyja prablemy razhladajucca ŭ zakrytym režymie, a ŭsie najbolš važnyja rašeńni prymajucca adnym čałaviekam — Si Czińpinam. Sami čynoŭniki nie ryzykujuć publična vykazvacca pa roznych pytańniach, jak heta čas ad času praktykavałasia da Si.

Niekatoryja z najbolš pakazalnych momantaŭ kanhresu, na pohlad aŭtara artykuła, byli źviazanyja z tym, što zastałosia niedahavoranym. U minułym hodzie na pres-kanfierencyi ministr zamiežnych spraŭ Kitaja Cyń Han abrynuŭsia z krytykaj na ZŠA i ŭmacavaŭ tym samym svaju reputacyju nacyjanalista, jaki realizuje bačańnie Si Czińpina. A praz try miesiacy jon źnik.

Na pres-kanfierencyi ŭ hetym hodzie ŭ toj ža zale nivodzin z reparcioraŭ nie advažyŭsia spytać u pierajemnika Cyń Hana, kudy jon źnik. Zamiest hetaha žurnalisty z krain, jakija Piekin ličyć družalubnymi, ad Kuby da Tanzanii, zadavali bolš biaśpiečnyja pytańni. Žurnalist The Wall Street Journal nie byŭ abrany, kab zadać pytańnie. 

Čytajcie jašče:

Eks-kiraŭnik MZS Kitaja Cyń Han pamior z-za katavańniaŭ ci suicydu ŭ vajskovym špitali Piekina — Politico

Kitaj bolš nie pa zubach ZŠA?

Čały pra niuansy supracy Biełarusi z Kitajem

• 5
• 0
• 31
• 2
• 2
• 3
• 14
• 0