U samalotaŭ, jakija laciać nad Bałtykaj, pačaścilisia zboi praź pieraškody z GPS. Za hetym moža stajać Rasija
29 krasavika avijakampanija Finnair prypyniła paloty z Chielsinki ŭ estonski horad Tartu. Pryčynaj nazvali «pieraškody GPS, jakija davoli raspaŭsiudžanyja ŭ hetym rehijonie». Pierad hetym dva načnyja rejsy Finnair nie zmahli pryziamlicca ŭ Tartu z-za zboju GPS-navihacyi. Ministr zamiežnych spraŭ Estonii Marhus Cachkna abvinavaciŭ Rasiju ŭ stvareńni pieraškod u pavietranaj prastory krainy. Da jaho dałučylisia kiraŭniki MZS Litvy i Łatvii Habryelus Łandśbierhis i Bajba Braže.
Rasijskaja «Miedyjazona» raspaviadaje, što viadoma pra niebiaśpiečnyja GPS-pieraškody nad Bałtykaj i ich imaviernyja krynicy.
Lotčyki Finnair paviedamlali pra niezvyčajnyja GPS-pieraškody na rejsach, maršrut jakich pralahaŭ mima Kalininhradskaj vobłaści, jašče ŭ sakaviku 2022 hoda.
U červieni 2023 hoda praca GPS była parušanaja nad Litvoj i Estonijaj, pryčym estonskija vajskoŭcy śćviardžali, što krynica pieraškod znachodzicca ŭ Leninhradskaj vobłaści.
Na praciahu 2023 hoda terytoryja, zakranutaja pieraškodami, pašyrałasia, a ich ščylnaść rasła. Nad paŭnočna-ŭschodniaj častkaj Narvehii ŭ 2022 hodzie pieraškody naziralisia ciaham 122 dzion, a ŭ 2023-m — užo 294 dni.
Na Kalady, 25 i 26 śniežnia, mahutnyja pieraškody nakryli poŭdzień Šviecyi, poŭnač Polščy, Litvu i inšyja krainy Bałtyi. Na Novy hod pamyłki GPS fiksavali ŭ Finlandyi, 10, 13 i 16 studzienia — u Paŭnočnaj Polščy.
14 sakavika na paŭhadziny straciŭ sihnał GPS samalot, na jakim brytanski ministr abarony Hrant Šeps viartaŭsia z Polščy, dzie naziraŭ za vučeńniami NATO.
«Za pieršyja dva miesiacy 2024 hoda my atrymali 985 paviedamleńniaŭ ab admovie GPS u paraŭnańni z 1 371 paviedamleńniem za ŭvieś 2023-y», — padličyli ŭ Jeŭrapiejskaj arhanizacyi biaśpieki pavietranaj navihacyi.
Nakolki niebiaśpiečna bałtyjskaja hłušyłka? «Hłušeńnie GPS, viadoma, stvaraje pieraškody, pieraškadžaje narmalnamu pavietranamu ruchu, ale budzie niapravilna kazać, što heta pahražaje jakoj-niebudź avijakatastrofaj», — tłumačyć kiraŭnik CIT Rusłan Levijeŭ.
Pra heta ž havaryłasia ŭ pres-relizie Finnair. «Bolšaść aeraportaŭ vykarystoŭvajuć alternatyŭnyja mietady zachodu na pasadku, ale niekatoryja aeraporty, takija jak Tartu, vykarystoŭvajuć tolki mietady, dla padtrymańnia jakich patrabujecca sihnał GPS. Pieraškody GPS u Tartu vymušajuć nas prypynić paloty datul, pakul nie buduć znojdzienyja alternatyŭnyja rašeńni», — patłumačyli ŭ finskaj avijakampanii.
Adnak razam z prostym hłušeńniem GPS-sihnału isnuje bolš vydaskanalenaja technałohija — spufinh, «kali sihnał GPS nie hłušycca, a padrablajecca», praciahvaje Levijeŭ. Pieradajučy «padrobleny» sihnał, spufier padmanvaje GPS-pryjomnik i prymušaje jaho niapravilna vyznačać kaardynaty: prybory pakazvajuć, byccam samalot adchiliŭsia ad kursu.
Na siońnia nie zadakumientavana nivodnaj avijakatastrofy, vyklikanaj pracaj hłušyłak, adnak u 2019 hodzie ŭ Ajdacha pasažyrski samalot pad uździejańniem štučnych GPS-pieraškod ledź nie ŭrezaŭsia ŭ haru.
Dzie znachodzicca krynica GPS-pieraškod nad Bałtykaj? U OSINT-daśledčykaŭ bałtyjskaj anamalii roznyja mierkavańni. Chtości kaža, što hłušyłka ŭ Kalininhradskaj vobłaści Rasii, chtości — što pamiž Pieciarburham i Narvaj.
Ciapier čytajuć
Adkul u Biełaruś jedzie bolš za ŭsio hastarbajtaraŭ? Top-20 krain — i Pakistana tut pakul niama2
Kamientary