U miedykaŭ źbirajuć infarmacyju pra pajezdki ŭ inšyja krainy i svajakoŭ za miažoj
Pa infarmacyi «Našaj Nivy», miedpiersanał źbirali ŭ aktavaj zale, dzie razdavali ankiety, na jakich treba było paviedamić pra suviazi z zamiežžam.
Taki zbor infarmacyi prachodziŭ u niekalkich ustanovach. Supracoŭnikaŭ źbirali ŭ aktavaj zale, dzie razdavali papierki, na jakich treba było paviedamić pra suviazi z zamiežžam.
Zapoŭnić ankiety treba było adrazu na miescy. Ad supracoŭnikaŭ patrabavali napisać, ci nie było ŭ ich dośviedu pracy abo vučoby ŭ inšych krainach. I nie tolki ŭ ich.
«Asablivuju ŭvahu nadavali svajakam. Kali niechta ź blizkich pracuje ŭ inšaj krainie, to treba było abaviazkova napisać, čym jany tam zajmajucca, jak daŭno źjechali, jak časta pryjazdžajuć u Biełaruś, u jakich vy ź imi znosinach», — kaža čałaviek, znajomy ź situacyjaj.
Taksama treba było paviedamić pra dziaciej, jakija vučacca ŭ zamiežnych VNU abo tolki pastupajuć tudy.
«Padčas zapaŭnieńnia niekatoryja prysutnyja zadavali dadatkovyja pytańni, niekatoryja ź vidavočnym ściobam. Na adno z takich dadatkovych pytańniaŭ navat adkazali, što heta nibyta nie abaviazkovaja pracedura.
Maŭlaŭ, kali nie chočacie, to možacie nijakich źviestak nie padavać. Zboram infarmacyi, nakolki my zrazumieli, zajmajecca adździeł kadraŭ. Nijakaha cisku padčas pasiadžeńnia nie było», — zhadvaje surazmoŭca.
Adnak miedyk vykazvaje zaściarohu, što z časam ihnaravańnie padačy źviestak pra siabie i svajakoŭ moža drenna adhuknucca, kali, naprykład, pryjdzie čas praciahvać kantrakt.
«Naŭrad ci ŭ administracyi jość žadańnie zvolnić niekaha praz najaŭnaść «niapravilnych» svajakoŭ, ale kali źvierchu taki zahad pryjdzie, to nielha vyklučać, što paprosiać zvolnicca pa pahadnieńni bakoŭ abo prosta nie praciahnuć kantrakt.
Kožny baicca zhubić svaju pasadu, ludzi zašuhanyja, niekatoryja ŭ administracyi jašče raniej aścierahalisia, što ŭ ich mohuć być prablemy praz toje, što, naprykład, dzieci źjechali za miažu».
Letaś «Naša Niva» ŭžo pisała pra vypadak, kali supracoŭnika dziaržaŭnaj ustanovy vyklikali na razmovu tolki praz toje, što jaho niepaŭnahadovaje dzicia zrabiła apastyl na dakumienty. Adbyłosia heta paśla taho, jak va ŭstanovu spuścili śpisy, u jakich było paznačana, chto z supracoŭnikaŭ i ich blizkich svajakoŭ źviartaŭsia pa hetuju praceduru.
Taksama niadaŭna «Našaj Nivie» stała viadoma, što biudžetnikam z roznych śfier raili nie jeździć u adpačynak u «niesiabroŭskija» krainy.
«Naša Niva» — bastyjon biełaruščyny
PADTRYMAĆCiapier čytajuć
U minskim mietro prachodziać vyprabavańni novyja ciahniki FOTY3
U minskim mietro prachodziać vyprabavańni novyja ciahniki FOTY
Rasijskaja nieanacystka, jakaja adsiadzieła 16 hadoŭ za zabojstva advakata i žurnalistki: Jon naprošvaŭsia svaimi pohladami na čačenskuju kampaniju2020
Kamientary