Skandalnyja katlety z hruzinskaj kramy akazalisia sapraŭdy biełaruskimi. «Dziubaŭ, łap i chvastoŭ» unutry nie znajšli
Paśla taho, jak u vyniku krytyčnych vodhukaŭ u sacsietkach uźnikli sumnievy ŭ pachodžańni kurynych katlet «Paparać-kvietka» vytvorčaści, jak było paznačana, ahrakambinata «Dziaržynski» ŭ Fanipali, žurnalisty miascovaha vydańnia fanipol.by źviazalisia z samim pradpryjemstvam. Tam paćvierdzili, što pradukt sapraŭdy ich, i patłumačyli, što ŭ im mahło źbiantežyć. A kampanija Bulbaland, jakaja pradaje tavar u Hruzii, dała svaje razhornutyja tłumačeńni.
Na pradpryjemstvie paćvierdzili, što katlety sapraŭdy ich vytvorčaści, a etykietki na hruzinskaj movie jany robiać sami śpiecyjalna dla ekspartnych pastavak.
Pradstaŭniki pradpryjemstva zajavili, što ŭžo vyvučajuć situacyju, kab zrazumieć, što zdaryłasia ŭ kankretnym vypadku, i hatovyja dać pakupnicy aficyjny adkaz. Pry hetym, adnak, dapuścili, što prablema mahła ŭźniknuć z-za niapravilnych umoŭ zachoŭvańnia abo transpartavańnia ŭžo ŭ Hruzii.
Žurnalisty taksama sami naviedali firmovuju kramu ahrakambinata i pahladzieli skład katlet «Paparać-kvietka». Na etykietcy było paznačana: kuskavoje miasa kuraniat-brojleraŭ (plačo, file), skura, paniroŭka, syr, masła, śpiecyi. Miasa miechaničnaj abvałki, jak padazravali mnohija kamientatary ŭ sacsietkach, u składzie niama.
Pradavačka kramy paćvierdziła, što katlety rublenyja, z vyraznymi kavałačkami miasa i načynkaj. Pa słovach pastajannaj pakupnicy, jakaja jakraz akazałasia ŭ toj čas u hetaj kramie, katlety zaŭsiody takija — nie farš całkam adnastajnaj kansistencyi, a mienavita kavałki miasa.
Žurnalisty taksama sami pryhatavali katlety doma, kab acanić ich jakaść. Katleta zachavała formu, atrymałasia ščylnaj, z vyraznymi vałoknami kurynaha miasa — heta paćvierdziła, što pradukt robicca z kuskavoha miasa, a nie z masy, charakternaj dla miasa miechaničnaj abvałki.
Načynka była syrna-śmietankovaj, smak apisali jak «8 z 10 dla svajoj cenavaj katehoryi». Nijakich «dziubaŭ, łapaŭ ci chvastoŭ» unutry nie znajšli.
Takim čynam, viersija pra padrobku nie paćvierdziłasia — u Batumi sapraŭdy pradavali aryhinalnuju biełaruskuju pradukcyju. Adnak pakupnica, mahčyma, čakała ad katlet inšaj kansistencyi i ŭspryniała kuskavoje miasa jak niešta padazronaje, paśla čaho i naradziłasia historyja pra «pieramołatyja adkidy».
Ceny ŭ Biełarusi i Hruzii, darečy, prykmietna adroźnivajucca: kali ŭ firmovaj biełaruskaj kramie kiłahram katlet kaštuje 10 rubloŭ 33 kapiejki, to ŭ hruzinskaj — kala 20 łary, što prykładna roŭna 20 biełaruskim rublam. Takim čynam, u Batumi pradukt pradavaŭsia amal u dva razy daražej.
Paśla kampanija Bulbaland, jakaja zajmajecca prodažam biełaruskaj pradukcyi ŭ Hruzii praź sietku kramaŭ, aficyjna prakamientavała pretenzii, siarod inšaha adznačyŭšy, što jana pracuje ŭsiaho krychu bolš za dva hady, ale maje ŭ asartymiencie ŭžo bolš za 1500 biełaruskich najmieńniaŭ. I heta adzinaja sietka kramaŭ u Hruzii, dzie 100% tavaraŭ biełaruskaj vytvorčaści. Adziny tavar, jaki vyrablajecca na miescy — adzin ź vidaŭ chleba, i toj piačecca ź biełaruskaj muki.
Ad ahrakambinata «Dziaržynski» kampanija zavozić šyroki asartymient: zamarožanyja paŭfabrykaty sa śvininy, kurycy i indyka, hatovuju pradukcyju, a taksama kurynyja i indyčynyja častki.
Nie biełaruski štrychkod na ŭpakoŭcy, jaki pačynajecca z «200», tłumačycca tym, što heta pradukcyja na vahu, a ŭpakoŭka štučnych tavaraŭ maje biełaruski kod «48».
Uvieś tavar dastaŭlajecca ŭ Hruziju ŭ śpiecyjalnych refryžaratarnych mašynach z zachavańniem pravilnaha tempieraturnaha režymu. Tempieratura kantralujecca pry adhruzcy na zavodzie, na miažy jaje praviarajuć vieterynarnyja słužby, i jašče raz — na składzie pry pryjomie. A ŭ samich kramach dziejničaje sistema kantrolu jakaści HACCP, što paćvierdžana adpaviednym siertyfikatam.
Upakoŭka vyrablajecca pa damoŭlenaści z pastaŭščykom i moža adroźnivacca ad biełaruskaj. Heta tłumačycca tym, što dla Hruzii, zhodna z zakanadaŭstvam, na etykietcy abaviazkova pavinna być infarmacyja na hruzinskaj movie.
Što da smaku i vodhukaŭ, to kampanija padkreślivaje — heta subjektyŭna. Kali pradukt pradajecca, to ŭ jaho jość svoj pakupnik. Kali niešta nie kuplajuć, to taki tavar vyklučajuć z asartymientu. I naadvarot — kali pakupniki rehularna prosiać pryvieźci niejkija kankretnyja biełaruskija tavary, to sietka starajecca ich prośby zadavolić.
U Hruzii pradajucca vielmi niasmačnyja biełaruskija katlety. Ale ci nasamreč jany biełaruskija?
U Biełarusi raspracoŭvajuć štučnuju rybu dla karmleńnia školnikaŭ
«Kudy hladzić sanstancyja?» U stałoŭcy, dzie charčujucca ślapyja ludzi, pradajuć katlety z syrym miasam
«Na abiedy i viačery nie traciła bolš za 5 BYN». Biełaruska — pra svaje vydatki na padarožža ŭ Žyrovicki manastyr
Ciapier čytajuć
«Byŭ hałodny, jak z Aśviencima, nie jeŭ ni miasa, ni harodniny». Što viadoma pra śmierć babrujskaha žurnalista, na jakoha zaviali kryminalnuju spravu ŭ Polščy1616
Kamientary
Ja by i tak ich nie kupił,vpročiem.