Ekanamist Pavieł Daniejka raskazaŭ, čamu na sumoŭjach pytaŭsia pra Hary Potera
A taksama padzialiŭsia, što pavinien umieć rabotnik, kab być pierśpiektyŭnym.
Čamu treba vučycca, kab stać paśpiachovym
«My pavinny mianiać ludziej. Vučoba, navučańnie, dyjałohi — heta farmavańnie inšaha bačańnia. Heta važny bazis budučyni krainy. (…) Adukacyja stanovicca klučavoj rečču», — ličyć Pavieł Daniejka i padkreślivaje nieabchodnaść stvareńnia ŭ Biełarusi svajho Harvardu ŭ novym vypusku tok-šou «Žyćcio-malina».
Na pohlad ekanamista, u sučasnym śviecie pierśpiektyŭny čałaviek pavinien umieć zadavać pytańni štučnamu intelektu.
«Pačali havaryć pra toje, što štučny intelekt zamienić jurystaŭ, buchhałtaraŭ. Nikoha jon nie zamianiaje. Jon źjaŭlajecca instrumientam», — ličyć Daniejka i zaŭvažaje, što ŭ Złučanych Štatach jurydyčnaja praktyka z vykarystańniem štučnaha intelektu rvanuła ŭvierch.
Dobrym prykładam taksama źjaŭlajucca šachmaty: «Mašyna vyjhrała ŭ Kasparava. Ale hrosmajstar i mašyna [razam] vyjhrajuć u luboj mašyny. Tamu što ich dyjałoh dazvalaje sfarmavać treci pohlad, jaki niedastupny kožnamu ź ich [paasobku]».
Daniejka adznačaje, što štučny intelekt stanie dobrym dadatkovym instrumientam u pracy tolki ŭ tym vypadku, kali čałaviek viedaje, jak pravilna zadać jamu pytańnie.
«Dla hetaha treba mieć karcinu śvietu, kab vyjaŭlać novyja trendy, pra jakija ty pytaješsia. Tamu sučasnaja adukacyja pavinna sfarmavać karcinu śvietu i razumieńnie trendaŭ jaho raźvićcia. Tolki tady ty zmožaš stvarać niešta novaje. A štučny intelekt budzie instrumientam u stvareńni hetaha. Toje, što jon umieje, — heta pierapracoŭvać masivy infarmacyi, a toje, što my ŭmiejem, — heta stvarać bačańnie taho, čaho niama», —
tłumačyć Daniejka. Jon spadziajecca stvaryć na bakałaŭryjacie pa ekanomicy EHU takuju adukacyju, jakaja dazvolić vypusknikam być paśpiachovymi ŭ budučyni.
U čym važnaść «Hary Potera»
U razmovie Pavieł Daniejka źviarnuŭ uvahu na važnaść knih pra «Hary Potera». Jon nazyvaje jaje «pierałomnaj u fentezi». Jak tłumačyć ekanamist, tradycyjnaje fentezi — heta śviet, jaki nie na Ziamli abo ŭ minułym, a «Hary Poter» — fentezi, jakoje žyvie ŭ sučasnym.
Daniejka raskazvaje, što na sumoŭjach zaŭsiody pytaŭsia, ci čytaŭ čałaviek «Hary Potera» i čamu hetaja kniha stała papularnaj. Jon tłumačyć heta žadańniem ubačyć tvorčy patencyjał, pravieryć, nakolki ŭ kandydata raźvita analityka, bo «pra ekanomiku jany ŭsie adkažuć, jany ž knižki čytajuć».
«Na sumoŭi takija pytańni, jakija, na pieršy pohlad, znachodziacca zboku, dazvalajuć ubačyć, ci dumaje čałaviek, ci sprabuje znajści rašeńnie».
Daniejka raskazvaje, što razmova pra «Hary Potera» na sumoŭi ŭ jaho zajmaje kala 40 chvilin. «Takaja razmova dazvalaje zrazumieć, ci hatovyja jany kapacca, znachodzić rašeńni ŭ takich tupikovych, niečakanych pytańniach».
Ciapier čytajuć
Pamior palitviazień Valancin Štermier. «Ledź chadziŭ paśla insultu — a jaho kinuli ŭ ŠIZA»6
Kamientary
Pytańnie ž nie pra hołyja viedy śvietu Potera, a pra zdolnaść da myśleńnia, analityki na prykładzie ahulnaviadomych rečaŭ. Minimalna adukavany čałaviek nie musić dobra viedać usiaho, ale bazavuju infarmacyju pra zvyšpapularnyja rečy musić mieć, navat kali jon i nia lubić papularnyja štuki. A tam užo lohka i praanalizavać, ab čym heta, čamu stałasia papularnym.