«Ja dumaŭ, što ludzi źmiatuć nas». Śpiecnazaviec u 2020-m stajaŭ z aŭtamatam u ačapleńni pierad Łukašenkam, a ciapier vajuje za Ukrainu
Viačasłaŭ Hranoŭski zvolniŭsia z orhanaŭ paśla taho, jak ubačyŭ hvałt u dačynieńni da pratestoŭcaŭ. Jon źjechaŭ va Ukrainu, a paśla pačatku poŭnamaštabnaj vajny ŭstupiŭ u Połk Kalinoŭskaha, piša The Observer.
Viačasłaŭ Hranoŭski pajšoŭ słužyć u milicyju ŭ 18 hadoŭ, adrazu paśla zakančeńnia siaredniaj škoły.
«Dla mnohich maładych ludziej, jakich nie cikavić palityka, ale jakija chočuć stabilnaha žyćcia, praca ŭ milicyi — dobry varyjant», — adznačyŭ Hranoŭski.
Jamu byŭ 21 hod, kali ŭ Biełarusi ŭspychnuli masavyja pratesty suprać hvałtu i falsifikacyi Łukašenkam prezidenckich vybaraŭ. Hranoŭski ŭspaminaje, što tady jaho hałoŭnymi intaresami byli «dziaŭčaty, viečarynki i dobry volny čas». Na słužbie jon tady zajmaŭsia zvyčajnymi rucinnymi spravami: vyrašaŭ drobnyja kanflikty ŭ svaim rajonie i sačyŭ za paradkam. Z kalehami ŭ Hranoŭskaha byli dobryja adnosiny.
Ale ciapier, azirajučysia nazad, jaho staŭleńnie da mnohich ludziej, ź jakimi jon pracavaŭ, źmianiłasia.
«Jany nie asabliva razumnyja i nie analizujuć infarmacyju krytyčna. U bolšaści ź ich niama pryncypaŭ. Faktyčna, heta amal abaviazkovaja ŭmova dla pracy ŭ hetaj sistemie», — ličyć Hranoŭski.
U žniŭni 2020 hoda jon bačyŭ, jak jaho kalehi katavali i ździekavalisia z pratestoŭcaŭ, kab abaranić režym Łukašenki. Hranoŭski ŭspomniŭ scenu, jakuju jon ubačyŭ u RUUS Frunzienskaha rajona Minska, dzie jon pracavaŭ, paśla adnoj z pratesnych načej. Jon bačyŭ 70 zatrymanych demanstrantaŭ, jakija kryčać ad bolu. Jany lažali na ziamli ŭsio ŭ kryvi i siniakach, sa ściažkami na rukach. Ich žorstka źbili dubinkami jaho kalehi, ź jakimi jon jašče niadaŭna žartavaŭ na kuryłcy.
«Mnie i raniej davodziłasia zatrymlivać ludziej, ale ja zaŭsiody rabiŭ heta biez hvałtu. Ja zaŭsiody staraŭsia paźbiehnuć žorstkaści. Ale ŭ toj momant… ja ŭbačyŭ zusim žyviolnuju reakcyju na mirnyja pratesty.
Raniej ja dumaŭ, što my, jak milicyja, robim niešta dobraje. Toj momant dakazaŭ, što ja pamylaŭsia», — uspomniŭ Hranoŭski.
16 žniŭnia 2020-ha, kali ŭ Minsku prajšoŭ adzin z najbujniejšych mirnych pratesnych mitynhach, Hranoŭski stajaŭ u ačapleńni.
«Heta było nievierahodna — ja stajaŭ u milicejskim ačapleńni, hladzieŭ na hetaje mora ludziej i dumaŭ, što jany źmiatuć nas, i my apuścim ščyty. Ale jany paviarnuli nazad. U toj momant ja zrazumieŭ, što revalucyja pravaliłasia, i ŭsio budzie tolki horš», — z sumam adznačyŭ były milicyjant.
23 žniŭnia 2020-ha Hranoŭski stajaŭ u ačapleńni la Pałaca Niezaležnaści i naziraŭ, jak Łukašenka z aŭtamatam vyjšaŭ ź viertalota, kali pratestoŭcy ŭžo razyšlisia, i prakryčaŭ siłavikam «Vy pryhažuny!».
«Ja byŭ tam, abaraniajučy čałavieka, jaki zachapiŭ krainu. U toj momant ja zrazumieŭ, što bolš nie chaču być častkaj usiaho hetaha», — kaža Hranoŭski.
U vieraśni 2020-ha jon zvolniŭsia z orhanaŭ. Jamu dazvolili spakojna pajści, ale nieŭzabavie krynicy ŭ milicyi jamu paviedamili, što na jaho rychtujecca kryminalnaja sprava.
Hranoŭski sabraŭ dakumienty i rečy i źjechaŭ u Charkaŭ, dzie žyŭ jaho siabar. U vieraśni 2022-ha były siłavik dałučyŭsia da Pałka Kalinoŭskaha. Hranoŭski ličyć, što baraćba z Rasijaj — najlepšy sposab baraćby z Łukašenkam.
«Łukašenka ciapier moj vorah. Adzinaja pryčyna, pa jakoj jon usio jašče va ŭładzie, — heta Rasija. I adziny sposab pieramahčy jaho — zmahacca z Pucinym», — miarkuje Hranoŭski.
Z tych časoŭ bajec pad pazyŭnym Miryk paŭdzielničaŭ u mnohich apieracyjach, pieražyŭ abłohu Bachmuta i straciŭ na poli boju čatyroch blizkich siabroŭ. U Biełarusi Hranoŭskamu vystaŭlenyja šmatlikija kryminalnyja abvinavačvańni, u tym liku za najomnictva, udzieł u ekstremisckaj arhanizacyi i dziaržaŭnuju zdradu.
Bolšaść byłych kaleh ličać Hranoŭskaha zdradnikam. Jon adznačaje, što ŭ biełaruskaj milicyi nie dapuskajecca niezaležnaje myśleńnie — dazvolena tolki ślapoje padparadkavańnie zahadam.
«Kožny zasiarodžany na ŭłasnym dabrabycie. U Biełarusi siaredniestatystyčny milicyjant zarablaje kala 900 rubloŭ u miesiac — jakraz dastatkova, kab źniać adnapakajovuju kvateru ŭ Minsku i kupić ježy. Niadziŭna, što mnohija rasčaravanyja, abmiežavanyja ludzi hatovyja ŭčapicca adzin u adnaho za malusieńkuju premiju», — kaža Hranoŭski.
Jon sprabavaŭ padtrymlivać suviaź ź niekalkimi «razumnymi» byłymi siabrami, ale ŭ vyniku znosiny syšło na ništo. Ciapier ich ahulnaje minułaje ŭ Biełarusi bolš nie maje značeńnia, jaho nie turbuje, što pa toj bok linii frontu mohuć być byłyja tavaryšy.
«Ja bačyŭ, jak majho ŭkrainskaha brata razryvali na častki prosta ŭ mianie na vačach u pačatku ŭvarvańnia. Čamu mianie pavinny chvalavać tyja, chto padtrymlivaje zabojcaŭ?» — kaža Hranoŭski.
Vajary Pałka Kalinoŭskaha vyzvalali ŭkrainskuju terytoryju pad Charkavam
Sud u «DNR» zavočna prysudziŭ biełaruskaha dobraachvotnika Jana Dziurbiejku da 14 hadoŭ kałonii
«Usie fihačyli pa orkach z uśmieškaj na tvary. Mianie zatrochsocili, i ŭśmieški źnikli»
Viarchoŭny Sud pryznaŭ terarystyčnaj arhanizacyjaj Połk imia Kastusia Kalinoŭskaha
Bielhijski prync asabista pryvioz pikap dla Pałka Kalinoŭskaha
Pamiatajecie vypusknika instytuta FSB, jaki raskatvaŭ pa Hrodnie sa ściaham Navarosii? Ciapier jon staŭ varšaŭskim biznesmienam29
Kamientary
Praktyka mabilizavać roznych supracoŭnikaŭ isnavała.
1. Nie apuścili b ščyty. Vykonvali b prykazy, jak rabili da taho i paśla taho.
Nie padparadkavacca heta surjoznaje rašeńnie. Ci byli hatovyja da jaho kalehi? Što śviedčyć pra toje? Navat razmoŭ, što nie treba achoŭvać Łukašenku, pamiž imi nie było. I sam kaža «Jany nie asabliva razumnyja... U bolšaści ź ich niama pryncypaŭ.»
2. Siłavik/karnik (na toj čas) ličyć, što prablema nie ŭ im, što jon nie padtrymaŭ pratestoŭcaŭ, a ŭ kimści inšym. "Jany nie dastatkova ahresiŭna z nami zmahalisia".
Zastałosia, kab jašče Łukašenka skazaŭ, što jon byŭ za revalucyju, ale voś sami nie dajšli da jaho Dvarca, značyć, "kali im nie treba, to i ja zastaŭsia va ŭładzie".
(Vybar, jaki hieroj artykuła zrabiŭ paśla - hodny i śmieły. Pytańnie pra 2020-y, kali było šmat "stratehaŭ", navat na supraćlehłym baku, jakija sami ŭ toj momant ničoha nie zrabili).