«Uziali butelku vina i cyharu». Jak pajšoŭ u adstaŭku eks-ministr zamiežnych spraŭ Ukrainy
Były ministr zamiežnych spraŭ Ukrainy Dźmitryj Kuleba raskazaŭ, jak adreahavaŭ na navinu pra svajo zvalnieńnie, i prakamientavaŭ pryčynu takoha rašeńnia. Pra heta jon raskazaŭ na jutub-kanale žurnalistki Raminy Eschakzaj, paviedamlaje TSN.
Pa słovach Kuleby, «usio było davoli štodzionna».
«My pajšli sa Śviatłanaj (žonka Kuleby) u spartzału ŭviečary, i jak tolki ja pačaŭ pieraapranacca, da mianie pačuŭsia zvanok ad premjer-ministra. Jon paprasiŭ mianie padjechać, ja ŭsio zrazumieŭ, skazaŭ Śviatłanie — heta jano, zajmajsia, ja chutka viarnusia», — kaža eks-kiraŭnik MZS.
Paśla hetaha jon pajechaŭ da premjera, a paśla da prezidenta Uładzimira Zialenskaha.
«I paśla ŭžo była Śviatłana. My ŭziali butelku pienistaha vina, cyharu, list papiery, ručki — pajšli na bałkon. My zakuryli, ja vypiŭ i napisaŭ zajavu na zvalnieńnie. Tak, ułasna, heta ŭsio i skončyłasia», — adznačyŭ Kuleba.
Taksama Kuleba vykazaŭsia pra pryčyny svajho zvalnieńnia z pasady.
«Ja mahu skazać tolki toje, što nijakich pretenzij da majoj pracy ŭ pracesie majho zvalnieńnia nie było ahučana. Toje, što heta nie pytańnie niejkich prablem u źniešniaj palitycy, ja dumaju, heta vidavočna, u pryvatnaści dla ludziej, jakija sočać za hetaj temaj», — dadaŭ Kuleba.
Viarchoŭnaja Rada ŭzhadniła zvalnieńnie Dźmitryja Kuleby z pasady ministra zamiežnych spraŭ Ukrainy 5 vieraśnia. U toj ža dzień na jaho miesca pryznačyli novaha ministra — Andreja Sybihu.
Kamientary