Resurs «Piśmo.bieł» pryznany «ekstremisckimi materyjałami». Što pahražaje, kali niekali im karystaŭsia?
Na minułym tydni ŭłady pryznali «ekstremisckimi materyjałami» resurs pa adpraŭcy listoŭ i paštovak źniavolenym «Piśmo.bieł». Servisam karystalisia mnohija biełarusy, pryčym tak źviazvalisia nie tolki z tymi, chto siadzić pa «palityčnych» artykułach. Adpraŭščykam zaraz niešta pahražaje? «Lusterka» zadało hetaje pytańnie jurystu.
Pa rašeńni minskaha suda Partyzanskaha rajona ad 12 listapada, «ekstremisckimi» pryznany sajt «Piśmo.bieł», jaho staronki ŭ sacsietkach.
Pa słovach jurysta, imia jakoha nie nazyvajecca dziela biaśpieki, tym, chto karystaŭsia resursam, moža pahražać administracyjnaja adkaznaść pa art. 19.11 KaAP (raspaŭsiudžvańnie, vyrab, zachoŭvańnie, pieravozka infarmacyjnaj pradukcyi, jakaja źmiaščaje zakliki da ekstremisckaj dziejnaści abo jakaja prapahanduje takuju dziejnaść). Za «zachoŭvańnie» luboj pradukcyi i infarmacyi, jakaja, jak paličać ułady, da jaho adnosicca.
— Čałavieka mohuć adpravić u IČU na termin da 15 sutak (mahčyma, niekalki razoŭ zapar), — kaža surazmoŭca. — Ciapier raźbiaromsia, što represiŭny aparat razumieje pad «zachoŭvańniem»?
Bajusia, lubaja elektronnaja infarmacyja, jakaja jak-niebudź pakazvaje na suviaź z servisam, patencyjna niebiaśpiečnaja. Pačynajučy z historyi pošuku ŭ braŭzery, zakančvajučy elektronnym listom, jaki paćviardžaje rehistracyju na resursie.
Na dumku advakata, pad udaram mohuć znachodzicca ludzi, jakija atrymlivajuć rassyłku ad servisu na asabistuju elektronnuju paštovuju skryniu. Taksama mohuć być prablemy ŭ tych, chto padpisany na prajekt u sacyjalnych sietkach.
Juryst nie vyklučaje, što na čałavieka, jaki karystaŭsia siervisam, mohuć zavieści i kryminalnuju spravu pa art. 364-1 KK (sadziejańnie ekstremisckaj dziejnaści). Ułady mohuć traktavać hetyja dziejańni jak «inšaje sadziejničańnie ekstremisckaj dziejnaści». Ale tut u svaich prahnozach surazmoŭca, možna skazać, bolš aptymistyčny.
— Vierahodnaść kryminalnaha pieraśledu za hetyja dziejańni ja aceńvaju jak dastatkova nizkuju, prynamsi ŭ bližejšyja miesiacy, — ličyć jon.
«Piśmo.bieł» — aficyjna zarehistravanaja arhanizacyja, u jakoj była damova z «Biełpoštaj». Tolki 10% adpraŭleńniaŭ adrasavalisia palityčnym źniavolenym. Asnoŭnymi atrymalnikami byli šarahovyja źniavolenyja. Tamu ŭ zonie ryzyki zaraz patencyjna moža znachodzicca vialikaja kolkaść biełarusaŭ i biełarusak.
— I pa terminie absalutna ŭsio roŭna, čałaviek atrymaŭ ad resursu niejki list na svaju skryniu, rabiŭ reposty ź jaho staronak u sacsietkach abo niešta jašče ŭžo paśla pryznańnia «ekstremisckimi materyjałami». Ci heta było tydzień, ci try hady tamu — usio roŭna hetaja adkaznaść budzie, — tłumačyć juryst.
Pa hetaj pryčynie jon raić ludziam, jakija karystalisia «Piśmo.bieł» ci niejak źviazvalisia z prajektam, «pačyścić» svaje pryłady ad lubych jaho zhadak. Heta važna dla ludziej, jakija zastajucca ŭ krainie ci płanujuć pajezdku siudy z-za miažy.
— Rekamienduju ŭsim, chto karystaŭsia, pravieryć elektronnuju poštu, vydalić usie listy, adpisacca ad rassyłak i ačyścić historyju braŭziera, — raspaviadaje śpiecyjalist. — Samomu ž servisu — časova nie rassyłać apaviaščeńni na poštu, padrychtavać papiaredžańni dla karystalnikaŭ ab mahčymaj niebiaśpiecy i prapanavać instrukcyju pa biaśpiečnym vykarystańni servisu. Jašče dadam: kali budzie niejkaja vyjava, jakaja adnosicca da «Piśmo.bieł», heta taksama mohuć rasceńvać jak «ekstremiscki» materyjał. Uvohule, usio toje, što dazvalaje suadnieści z sajtam, jaho vonkavym vyhladam abo tymi staronkami ŭ sacsietkach, moža paciahnuć jak minimum administracyjnuju adkaznaść. Kali b u Biełarusi byli sudy, hramadzian nie karali b za čałaviečnaść, dapamohu ci akty salidarnaści.
Ciapier čytajuć
U 55 hadoŭ pamior stvaralnik brendu Serge Siarhiej Atroščanka9
Kamientary