Rasija ŭpieršyniu vykarystała suprać Ukrainy balistyčnuju rakietu novaha typu. Što heta moža źmianić
Rakieta, jakaja raniej nikoli nie vykarystoŭvałasia ŭ bai, była zapuščana z-pad Astrachani i nacelena na krytyčnuju infrastrukturu ŭ Dniapry. Uličvajučy, što RS-26 «Rubiež» pryznačana dla dastaŭki zbroi masavaha paražeńnia, možna kazać, što RF praviała demanstracyju mahčymaści jadziernaha ŭdaru.
Pa infarmacyi ekśpiertaŭ, mižkantynientalnaj balistyčnaj rakietaj, pa ŭsioj vierahodnaści, źjaŭlajecca RS-26 «Rubiež». Niahledziačy na toje što pieršy paśpiachovy vyprabavalny zapusk hetaj rakiety byŭ ździejśnieny ŭ 2012 hodzie, pra jaje mała što viadoma.
Zachodni ekśpiert Džefry Ljuis raniej pisaŭ, što meta raspracoŭki RS-26 — utrymać zachodnija krainy ad prychodu na dapamohu novym uschodnim členam NATA, jakija znachodziacca bližej da miežaŭ Rasii.
Vydańnie The Telegraph dzielicca mierkavańniem zachodnich ekśpiertaŭ ab tym, što RS-26 raniej u sapraŭdnym bai nie vykarystoŭvałasia.
Pa infarmacyi Defence Express, sistema stvorana na bazie dvuch stupieniaŭ rasijskaj rakiety «Topal-M» i źjaŭlajecca madyfikacyjaj kompleksu «Jars».
«Uličvajučy toj fakt, što RS-26 «Rubiež», a tym bolš mižkantynientalnyja balistyčnyja rakiety (naprykład, «Tapol» abo «Jars»), pryznačanyja dla dastaŭki zbroi masavaha paražeńnia, heta aznačaje tolki toje, što RF prademanstravała mahčymaść jadziernaha ŭdaru», — piša Defence Express.
Ale dakładnyja charaktarystyki RS-26 «Rubiež» nieviadomy. Ekśpierty dapuskajuć, što jaje startavaja masa 40-50 ton, dalokaść palotu — da 6 tysiač kiłamietraŭ. Rakieta moža nieści čatyry jadziernyja bojehałoŭki, jakija mohuć być zamienienyja na zvyčajnuju fuhasnuju bojehałoŭku z zaradam vybuchovaha rečyva da 1200 kiłahramaŭ. Mienavita ŭ takim vykanańni jana i vykarystana ŭ atacy na Ukrainu.
Pa mierkavańni ekśpiertaŭ, svajoj hruzapadjomnaściu RS-26 nie našmat mahutniejšaja za Ch-22 ci avijabomby FAB-1500, jakija Rasija ŭžo nie adzin raz vykarystoŭvała suprać Ukrainy. Tamu nielha havaryć ab niejkim vyrašalnym naniasieńni škody. U toj ža čas zakłapočanaść vyklikaje chutkaść palotu rakiety, jakaja ŭ piać razoŭ pieravyšaje chutkaść huku.
Vajenny ekśpiert Defense Express Ivan Karyčeŭski adznačaje, što Ukraina nie maje dziejsnych srodkaŭ pierachopu takich rakiet. Kompleks Patriot pryznačany dla pierachopu balistyčnych rakiet małoj dalnaści kštałtu Iskanderaŭ. Dla paśpiachovaha supraćdziejańnia rakietam siaredniaj dalnaści, da jakich adnosicca RS-26, nieabchodny takija sistemy, jak THAAD, jakija amierykancy niadaŭna vykarystali dla prykryćcia Izraila.
Pa mierkavańniu ekśpiertaŭ, vykarystańnie Rasijaj RS-26 možna razhladać jak adkaz na vykarystańnie Ukrainaj amierykanskich rakiet ATACMS.
Dla zachodnich sajuźnikaŭ Ukrainy heta aznačaje pieraacenku ich vajennych i dypłamatyčny stratehij. Jany patrabujuć dalejšaha raźvićcia sistemy supraćpavietnanaj abarony krainy, i, mahčyma, bolš šyrokaha ŭdziełu sajuźnikaŭ va ŭmacavańni abaronnaj infrastruktury Ukrainy.
Rasija ŭdaryła pa Dniapry mižkantynientalnaj balistyčnaj rakietaj
Rasija nanosić masiravany rakietny ŭdar pa Ukrainie
Storm Shadow siońnia mahli ŭdaryć pa histaryčnaj siadzibie na Kurščynie, dzie raźmiaščaŭsia rasijski kamandny punkt
«Heta kardynalna mianiaje ŭvieś raskład u viadzieńni bajavych dziejańniaŭ». Što Z-błohiery dumajuć pra ŭdary ATACMS pa Rasii?
«Kali mnie prylacić, ja hatovaja». Nasta Rahatko — pra seks-scenu ŭ svajoj knizie, prarasijskich svajakoŭ, Hajun i Matolku32
Kamientary