Tramp žartam prapanavaŭ Uejnu Hrecki bałatavacca na pasadu premjera Kanady
Abrany prezident ZŠA praciahvaje žartavać pra Kanadu jak budučuju častku Złučanych Štataŭ.
U sacyjalnaj sietcy Truth Social Donald Tramp prapanavaŭ lehiendarnamu chakieistu i rekardsmienu NCHŁ pa kolkaści zakinutych šajbaŭ Uejnu Hrecki stać premjer-ministram Kanady.
«Ja tolki što sustreŭsia z Uejnam Hrecki, jakoha ŭ chakiejnych kołach nazyvajuć «vialikim». Ja skazaŭ jamu: «Uejn, čamu b tabie nie bałatavacca na pasadu premjer-ministra Kanady, jakaja chutka stanie pasadaj hubiernatara Kanady — ty lohka pieramožaš, i tabie navat nie treba budzie vieści kampaniju». Heta jaho nie zacikaviła, ale ja dumaju, što žychary Kanady pavinny pačać jaho prasoŭvać. Za hetym było b cikava nazirać!» — napisaŭ Tramp.
Raniej Tramp nieadnarazova žartavaŭ nakont taho, što Kanada stanie 51-m štatam ZŠA, adznačyŭšy, što taki krok moža značna źnizić vydatki kanadcaŭ.
U žart jon nazvaŭ premjer-ministra Kanady Džaścina Trudo «hubiernataram vialikaha štata Kanada».
Dziadula napadnika NCHŁ Uejna Hrecki byŭ vychadcam ź vioski Ahdemier (siońnia — Drahičynski rajon Bresckaj vobłaści) i naradziŭsia ŭ 1892 hodzie.
U pačatku XX stahodździa Ciarencij Łaŭrenavič Hrecki pierabraŭsia ŭ Kanadu praz Čykaha. Jon emihravaŭ z žonkaj Hannaj i synam Zinovijem. U novym zaakijanskim žyćci dziadula Uejna pačaŭ nasić imia Toni.
Nieŭzabavie jon raźvioŭsia sa svajoj žonkaj i paznajomiŭsia z Maryjaj ź Ciarnopalskaj vobłaści Ukrainy. U ich naradziŭsia syn Uołtar, jaki i staŭ baćkam budučaj lehiendy NCHŁ.
Uejn Hrecki hulaŭ u NCHŁ pamiž 1978 i 1999 hh. Za 21 hod karjery jon ustanaviŭ 61 rekord lihi.
Najvialikšym dasiahnieńniem źjaŭlajecca najbolšaja kolkaść zakinutych šajb — 894 u 1487 hulniach.
U 2010 hodzie Hrecki pabyvaŭ u Minsku, pryjechaŭšy na matč zorak KCHŁ. Tady jamu była arhanizavana sustreča ź siastroj Halinaj Sałdacienkavaj.
«Ja nie chaču adpuskać žyćcio». U piśmieńnicy Śviatłany Kurs rak na poźniaj stadyi10
Kamientary