Žychara Viciebska za niezakonnaje palavańnie na miadźviedzia aštrafavali na hihanckuju sumu
U mai kala vioski Vysokaja Hara Biešankovickaha rajona miascovaja žycharka znajšła tušu miadźviedzia. Ekśpierty dastali z zadniaj častki tušy kulu kalibra 7,62 mm. Heta mahła być palaŭničaja strelba TOZ-122.
Napraŭlenaja na ekśpiertyzu strelba, kanfiskavanaja ŭ padazravanaha, 29‑hadovaha žychara Viciebska, była identyfikavana sudovymi ekśpiertami — balistami centralnaha aparata Dziaržaŭnaha kamiteta jak zbroja, ź jakoj byŭ zrobleny streł, paviedamlaje Dziaržkamitet sudovych ekśpiertyz.
Brakańjera ŭdałosia pryciahnuć da kryminalnaj adkaznaści. Za niezakonnaje palavańnie na dzikich žyvioł z Čyrvonaj knihi na padstavie častki čaćviortaj artykuła 282 Kryminalnaha kodeksa brakańjer asudžany na 2 hady pazbaŭleńnia voli z adterminoŭkaj vykanańnia na termin 2 hady, sa štrafam 300 bazavych vieličyń (12 600 rubloŭ), a taksama pazbaŭleny prava zajmacca dziejnaściu, źviazanaj z palavańniem, terminam na 5 hadoŭ. Karabin i ciepłavizijny pryceł kanfiskavanyja.
Nahadajem, što z 1 lipienia ŭ Biełarusi dazvolena palavańnie na miadźviedzia ŭ peŭnych rajonach.
Heta pałova Viciebskaj vobłaści (10 rajonaŭ) i niaznačnaja častka Minskaj vobłaści (Barysaŭski i Łahojski rajony). Heta nie značyć, što miadźviedziaŭ niama ŭ Mahiloŭskaj, Homielskaj, Bresckaj ci Hrodzienskaj abłaściach, prosta pakul jašče ŭ hetych rehijonach nie sfarmavanyja ŭstojlivyja papulacyi miadźviedzia i, adpaviedna, niama nieabchodnych umoŭ dla płanavańnia adstrełu.
Kamientary