Pamior niadaŭna asudžany za «ekstremizm» eks-dyrektar Homielskaha teatra lalek Dźmitryj Harelik
Siońnia, 2 studzienia, pamior były dyrektar Homielskaha teatra lalek Dźmitryj Harelik. Jamu było 63 hady. Pra heta jaho siabry paviedamili ŭ sacyjalnych sietkach, piša «Lusterka».
Dźmitryj Harelik atrymaŭ adukacyju ŭ budaŭničym technikumie. Ale paralelna sam arhanizavaŭ amatarski kalektyŭ u Domie nastaŭnika. Kali ŭ druhoj pałovie 1980-ch pačaŭsia kaapieratyŭny ruch, jon razam z tavaryšam stvaryŭ kaapieratyŭ, jaki vyrablaŭ teatralnyja lalki dla prodažu dziciačym sadkam, škołam i amatarskim hurtkam. Niekatory čas pracavaŭ inžynieram technahladu, a z 1 červienia 1992 hodu staŭ dyrektaram Homielskaha teatra lalek.
Hety kalektyŭ pracuje ŭ Homieli z 1968 hoda. Mienavita pry Hareliku ŭ 2002 hodzie teatr atrymaŭ novy budynak i pierajechaŭ tudy praz dva hady. Jak adznačajecca na sajcie kalektyvu, «hastrolna-fiestyvalnaja hieahrafija teatra achoplivaje prastoru ad Atłantyčnaha ŭźbiarežža Ispanii da Cichaakijanskaha ŭźbiarežža Uładzivastoka, ad stalicy Respubliki Komi da Šry-Łanki. <…>. Teatr nieadnarazova stanaviŭsia łaŭreatam i dypłamantam roznych mižnarodnych teatralnych fiestyvalaŭ u Biełarusi, Rasii, Ukrainie, Kazachstanie, Tadžykistanie, Łatvii, Italii, Hišpanii, Słavakii, Hiermanii, Indyi, Šry-Łancy i inšych krainach».
U studzieni 2024 hoda Harelika sudzili pavodle č. 2 art. 19.11 KoAP (Raspaŭsiud ekstremisckich materyjałaŭ). Pravaabaroncy tady tak i nie daviedalisia, u čym kankretna jaho abvinavačvali i jakoje rašeńnie vynies sud.
U žniŭni hetaha hoda stała viadoma, što Harelika zvolnili. Kali dakładna heta adbyłosia, nieviadoma. Na 14 maja 2024 hoda pasada dyrektara ŭžo była vakantnaj. Darečy, hetaja pasada tak i zastałasia vakantnaj.
Kamientary