Biełaruski žurnalist, jakoha ledź nie vysłali ź Jeŭropy dadomu, atrymaŭ status uciekača ŭ Polščy
Andrej Lipski pracavaŭ u śvietłahorskim miedyjachołdynhu «Ranak» i źjechaŭ ź Biełarusi praź pieraśled. Ale ŭ Hiermanii jamu admovili ŭ prytułku, a polskija ŭłady chacieli vysłać žurnalista ŭ Biełaruś. Historyja, adnak, skončyłasia ščaśliva, piša «Jeŭraradyjo».
Andrej Lipski ŭ červieni 2023-ha zrabiŭ hučny materyjał pra vybuch na Śvietłahorskim celułozna-kardonnym kambinacie dla vydańnia «Ranak». Praź pieraśled za svaju pracu žurnalist byŭ vymušany biehčy z krainy.
Jon prylacieŭ u Hiermaniju, dzie ŭ jaho žyvie dačka ad pieršaha šlubu, zdaŭsia palicejskamu i paprasiŭ palityčnaha prytułku. Čakajučy rašeńnia, žurnalist doŭha badziaŭsia pa łahierach dla biežancaŭ, adkul jaho departavali ŭ Polšču, nie viarnuŭšy pašpart.
Andrej niekalki razoŭ biespaśpiachova sprabavaŭ lehalizavacca na novym miescy. Paśla taho jak pamiežniki paviedamili, što jon abaviazany dobraachvotna viarnucca ŭ Biełaruś, mužčyna napisaŭ apielacyju. I vynik atrymaŭsia pazityŭny.
«Pašpart znajšoŭsia, rašeńnie pra nadańnie statusu ŭciekača pryjšło na poštu pad samy Novy hod.
Ci to praz šumichu ŭ ŚMI, ci to praz toje, što dapamahała dačka, jakaja žyvie ŭ Hiermanii i pisała-telefanavała pa hetych maich byłych łahierach, pajšoŭ niejki ruch, — raskazvaje Andrej Lipski. — U kancy listapada ci pačatku śniežnia mnie pryjšoŭ list z polskaha Ministerstva zamiežnych spraŭ pra toje, što moj pašpart z 19 listapada pieradadzieny va ŭpraŭleńnie pa spravach zamiežnikaŭ. To-bok pašpart znajšoŭsia.
17 śniežnia ja atrymaŭ SMS pra toje, što rašeńnie pa majoj spravie pra mižnarodnuju abaronu pryniataje — «čakajcie decyzii [aficyjnaha rašeńnia] pa pošcie». I 31 śniežnia, pad samy Novy Hod, ja zabraŭ na pošcie kanviert — nadziva tonieńki. Heta tłumačycca tym, što dla atrymańnia statusu biežanca nie patrabujecca doŭhich tłumačeńniaŭ i spadarožnych dakumientaŭ. To-bok mnie dajuć status biežanca. Spadziajusia, na hetym maje pryhody z dakumientami skončacca», — raspavioŭ Andrej.
Adzinaje, što pakul zastajecca niezrazumiełym dla Andreja, — heta historyja z rašeńniem pra toje, što žurnalist abaviazany dobraachvotna viarnucca ŭ Biełaruś, dzie jaho čakaŭ by sud pa kryminalnaj spravie.
«Dniami kurjer prynios mnie list, dzie napisana, što hałoŭny kamiendant pamiežnaj słužby pieranios razhlad majoj spravy na 16 studzienia ŭ suviazi ź nieabchodnaściu pierakłaści na polskuju movu prykładzienyja mnoju dokazy — pratakoły zatrymańniaŭ i inšaje, jakija ja dasyłaŭ im razam z apielacyjaj.
Tak što, z adnaho boku, pakul jość rašeńnie pra nadańnie mnie statusu biežanca, ź inšaha — nie zavieršany administracyjny praces pamiežnikaŭ. Budu spadziavacca, što rašeńnie pa statusie paŭpłyvaje na hetuju spravu stanoŭča.
Pakul ja, jak i raniej, žyvu ŭ Łodzi, zajmajusia dakumientami i čakaju vykliku na adbitki palcaŭ u Varšavie, kab potym atrymać ženieŭski pašpart.
U mianie na rukach tolki papiera, u jakoj napisana pra status biežanca i ŭsialakija rekamiendacyi pa dalejšaj lehalizacyi», — kaža žurnalist.
Polšča pryniała niadrenna
Paśla historyi z departacyjaj, źnikłym pašpartam i pahrozaj viartańnia ŭ Biełaruś Andrej praciahvaje z aściarohaj hladzieć na ludziej u formie, choć razumieje, što palicyjanty ničoha kiepskaha jamu nie zrabili.
Adkazvajučy na pytańnie, jak žyviecca ŭ Polščy, Andrej kaža, što kraina pryniała jaho niadrenna.
«Narod dobrazyčlivy, nijakaha niehatyvu z boku palakaŭ ja nie adčuvaju, — uśmichajecca surazmoŭca. — Što da kamunikacyi, to vyrazaŭ «dzień dobry» [dobry dzień] i «przepraszam» [prabačcie] pakul chapaje dla znosin u kramach.
U Łodzi ja aranduju pakoj u dvuchpakajoŭcy. Viadoma, pa našych biełaruskich mierkach košt arendy staličny, ale vybirać asabliva niama z čaho. U cełym, ja zadavoleny tym, što na voli, tym, što stan zdaroŭja ŭ normie. A dalej budziem žyć, usie darohi dla nas adkrytyja, ja tak dumaju.
Pakul budzie aptymizm, pazityŭnaje staŭleńnie da rečaisnaści, usio budzie kali nie dobra, to narmalna», — ličyć Andrej.
U novym hodzie Andrej źbirajecca skončyć historyju ź biurakratyčnaj biehaninaj i bolš pracavać.
«Vielmi spadziajusia, što ŭ mianie atrymajecca ŭźjadnacca ź siamjoj. Ja budu prykładać dla hetaha maksimum namahańniaŭ, bo adnamu… adnamu ciažka», — kaža žurnalist.
Ciapier čytajuć
«Usio tak ci inakš budzie vyrašacca na poli boju». Čym budzie zajmacca novaja kiraŭnica Misii demakratyčnaj Biełarusi va Ukrainie?13
Kamientary