«Tak napisała mnie adna padpisčyca. Jana pražyła doŭhaje žyćcio, pamiataje pachavańnie Stalina, i dla jaje heta asabisty śviadomy vybar. I nie tamu, što Alaksandr Chižniak ujaŭlaje ź siabie niejkuju jaskravuju postać, zdolnuju źmianić trajektoryju raźvićcia Biełarusi. Nie, na heta nijak nie padobna», — piša na sajcie Biełsata Alaksandr Knyrovič.
«Vybar mienavita hetaha kandydata vyznačany jak «najlepšy z najhoršych», dy «ŭsio ž taki dyrektar cełaha UP «BiełNDIPhoradabudaŭnictva» nie moža być zusim užo durniem…»
Sapraŭdy, astatnija vidavočna najhoršyja. Kali śpič Chižniaka na biełaruskim TB vyklikaje prosta drymotnaść, to pramovy Syrankova dy asabliva Hajdukieviča vyklikajuć pytańnie ŭ hetaj ža panienki: «Jak my da hetaha, da voś hetych dajšli, dažylisia?». Pry hetym varyjant, prapanavany demakratyčnymi siłami — «Suprać usich» (albo asobnymi pradstaŭnikami tych ža demakratyčnych siłaŭ — bajkot) — panienka dla siabie nie razhladaje. Mienavita pavodle pryčyny niesupadzieńnia ź jaje asabistymi ŭjaŭleńniami pra toje, jak pavinien pavodzić siabie aktyŭny hramadzianin. Dyk voś takoje jaje mierkavańnie.
Tak, mahčymaść paśla 2020-ha hałasavać za Łukašenku jana dla siabie niejak nie razhladaje (choć, dziela spraviadlivaści, i da taho nie razhladała).
Ci ŭpłyvaje heta choć na niešta za miežami jaje ž unutranaha śvietu? Nie. Jaje vybar nijak nie ŭpłyvaje na vynik. Jak i vybar usich astatnich hramadzian, jakija vyrašyli naviedać albo nie naviedać vybarčyja ŭčastki 26 studzienia.
Ad samaj ranicy 27 studzienia CVK abvieścić… Ale kali jon budzie paśladoŭnym, to ad jaŭki na papiarednich vybarach treba budzie adminusavać tysiač tak 500 tych, chto źjechaŭ (z 580 000 tych, chto nibyta aficyjna prahałasavaŭ za Cichanoŭskuju). Takim čynam, jaŭka pavinna była b skłaści adsotkaŭ hetak 76, a hałasoŭ za adnaho tavaryša, jaki ŭžo 31-y hod zusim «nie trymajecca za ŭładu» — 87%.
Adnak, miarkuju, jaŭka nižejšaja za 80% budzie pryznana nieadpaviednaj uzroŭniu narodnaj padtrymki. Tamu: jaŭka — 80%, hałasoŭ «za» — 87%, a moža, i ŭsie 90% — prosta dla taho, kab nie napisać druhomu miescu, našamu «dziravamu Alehu» 5%, kab viedaŭ svajo miesca dy nie zaznavaŭsia.
Ci moža hramadzianin Biełarusi niejak paŭpłyvać na hetuju matematyku? Vidavočna, što nie.
Jana napisana daŭno, jašče viasnoj 2021 hoda, kali byli razhromleny jak reštki partyj, tak i niezaležnyja miedyja i ŭsia supolnaść NDA Respubliki Biełaruś. Mienavita z taho momantu stała mahčymym całkam upeŭniena pradkazać vynik lubych čarhovych vybaraŭ.
Ci ŭpłyvaje choć na niešta niajaŭka na ŭčastki albo hałasavańnie «suprać usich»? Pa-za miežami ŭnutranaha śvietu čałavieka, jaho razmovy z samim saboj — taksama nie. Pakolki, kali vieryć sacapytańniam, u krainie ŭsio jašče pražyvajuć kala 30% prychilnikaŭ dziejučaj ułady, to bajkot vizualna zaŭvažna nie budzie, i ŭžo tym bolš jaho nie pakažuć pa televizary.
Tak i hałasavańnie «suprać usich» va ŭmovach, kali nichto i nie źbirajecca surjozna ličyć hałasy (navošta b heta mahło być patrebnym?), taksama nie hraje nijakaj roli. Tamu ŭ adkaznaha hramadzianina, jaki ŭśviedamlaje svaju adkaznaść za losy Radzimy, jość adrazu try roŭnyja pamiž saboj varyjanty, jak vykazać svajo staŭleńnie da vybaraŭ:
- nie chadzić, zaniacca ŭ hety dzień čymści bolš karysnym, naprykład, pajści źlapić śniehavika ź dziciom (kali raptam vypadzie śnieh);
- schadzić i namalavać «soniejka» albo luby inšy prydatny i dazvoleny znak u hrafie «suprać usich», paviedamiŭšy dziaržavie, što ŭ hetym śpisie niama vartych kandydataŭ;
- schadzić i prahałasavać za luboha sa spojleraŭ, tamu što «nu, choć by dyrektar», abo «prykolna budzie žyć na vulicy Stalina», abo addać naležnaje kreatyvu ad Aleha, jaho namahańniam pa kałupańni niejkaj dzirki ŭ ścianie, nie źviartajučy ŭvahi na fihu, jakuju jon sunie ŭ tvar vybarščykam sa svajho pieradvybarčaha płakata.
Ci jość siarod ich varyjant hałasavańnia za staroha, kulhavaha, sipataha tavaryša, jaki ŭciahnuŭ Biełaruś u vajnu, jaki zładziŭ represii i nastojliva vykidaje narodnyja hrošy na ŭłasnyja fantazii? Mnie padajecca, što niama, ale i taki vybar taksama rašuča ni na što nie ŭpłyvaje…
Adzinaje, na što moža paŭpłyvać abrany hramadzianami varyjant dziejańniaŭ, z čym jon choć niejak suadnosicca, dyk heta z adčuvańniem unutranaj harmonii z samim saboj: «Ja asabista zrabiŭ toje, što ličyŭ maksimalna adekvatnym situacyi, a lehalnyja mahčymaści dla kalektyŭnaha dziejańnia adsutničajuć». I hetym zadavolicca.
Zychodziačy z vykładzienaha, bajkot, Chižniak albo «soniejka» — nie maje pryncypovaha značeńnia. Bieražycie siabie.
Ciapier čytajuć
Doktarku Alenu Mikałajevu padčas vajny adpravili na Vaładarku za dapamohu habrejam — u XXI stahodździ tam ža apyniecca jaje praŭnučka Maryna Zołatava33
Kamientary