Dziadok — apazicyjanieram: Zajmajučysia dyskredytacyjaj Ofisa Cichanoŭskaj, vy ljacie vadu na młyn režymu

Anarchist i były palitviazień Mikoła Dziadok u svaim pieršym paśla vyzvaleńnia strymie rezka raskrytykavaŭ tych pradstaŭnikoŭ demakratyčnych siłaŭ, chto zajmajecca ŭnutranym chejtam, i vykazaŭsia ab nieabchodnaści pakinuć Łukašenku akno dla razmovaŭ.

«Ja mahu skazać, što ni paśla pratestaŭ 2006, ni paśla pratestaŭ 2010, 2017 hadoŭ u nas nie było i małoj doli taho resursu, jaki jość ciapier», — zajaviŭ Mikoła Dziadok u svaim strymie.

Hałoŭnym faktaram, jaki źmianiŭ situacyju, Dziadok ličyć źjaŭleńnie madeli alternatyŭnaha ŭradu, jaki ŭznačalvaje Śviatłana Cichanoŭskaja:

«Ujavicie sabie, za miažoj Biełarusi jość faktyčna madel alternatyŭnaha ŭradu, lidarka jakoha, Śviatłana Cichanoŭskaja, navat i nie budučy farmalnaj kiraŭnicaj niejkaj armii prychilnikaŭ albo partyi, maje kałasalny maralny, simvaličny aŭtarytet».

Hety aŭtarytet, pavodle słovaŭ Dziadka, dazvalaje Cichanoŭskaj «jeździć pa ŭsich krainach śvietu, dzie Łukašenka nie ličycca lehitymnym lidaram, być pryniataj kiraŭnikami krain, bujnych jeŭrapiejskich, upłyvovych krain, kiraŭnikami MZSaŭ, kiraŭnikami jeŭrapiejskich struktur. (…) Jana ŭvachodnaja ŭ tyja miescy i ŭ tyja kabiniety, kudy nie ŭvachodny Łukašenka, a heta jakraz centr cyvilizavanaha śvietu».

Dziadok adznačaje, što ŭ samych cyvilizavanych krainach śvietu prymajuć nie Łukašenku, a Cichanoŭskuju — jak lidarku Biełarusi.

«Uziaŭšy da ŭvahi mientalitet Łukašenki, jahony pohlad na śviet, prosta ŭjavicie, da jakoj stupieni jaho ad hetaha bambić. Da jakoj stupieni heta dla jaho niebiaśpiečna», —

davodzić błohier i akreślivaje dźvie klučavyja pahrozy, jakija najbolš niepakojać režym:

«Łukašenka baicca, pa vialikim rachunku, tolki dźviuch rečaŭ. Pieršaje — heta pryznanaje inšymi dziaržavami palityčnaje pradstaŭnictva Biełarusi. I druhoje — heta alternatyŭnyja ŭzbrojenyja siły. I toje, i druhoje ŭ Biełarusi zaraz jość. Raniej hetaha nie było».

Dziadok padkreśliŭ, što mienavita hetyja dźvie struktury — Ofis Cichanoŭskaj i Połk Kalinoŭskaha — źjaŭlajucca abjektami najbolšaha chejtu z boku režymnaj prapahandy.

Krytyka ŭnutranaha chejtu

Mikoła Dziadok rezka asudziŭ tych pradstaŭnikoŭ apazicyjnaha ruchu, jakija zajmajucca dyskredytacyjaj Ofisa Cichanoŭskaj i abvinavačvajuć supracoŭnikaŭ Ofisa ŭ pracy na karyść režymu.

«Kali ja baču ludziej, jakija pačynajuć raskazvać, što tam karupcyjaniery, i hranty kraduć, i tam Cichanoŭskaja 170 miljonaŭ hrantaŭ prysvoiła… Ja chaču im skazać, što vy ljacie vadu vyklučna na młyn režymu».

Jon adznačyŭ, što kali ŭ kahości jość pretenzii da Ofisa, isnujuć cyvilizavanyja sposaby ich danieści, a nie vynosić u publičnuju śfieru.

«Kali ŭ vas jość pretenzii da Ofisa, u vas jość tysiača i adzin sposab danieści hetyja pretenzii da Ofisa. Nie treba palivać ich łajnom, vynosić heta ŭ publičnuju śfieru, radavać tym samym režym, vykonvać jahonuju pracu».

Dziadok padkreśliŭ, što režymnyja ŚMI hadami atakujuć mienavita Cichanoŭskuju i Połk Kalinoŭskaha, što śviedčyć pra toje, chto źjaŭlajecca ich najbolš niebiaśpiečnym praciŭnikam.

«Ja, viedajecie, siadzieŭ, čytaŭ hadami saŭbiełku («SB-Biełaruś siehodnia» — «NN»), i ja baču, kaho jany močać, chto im praciŭny najbolš. Heta Śviatłana Cichanoŭskaja i połk Kalinoŭskaha. Jany tam prosta tony brudu, chejtu na ich vylivajuć, z numara ŭ numar, adno i toje. I paśla hetaha ja vychodžu, a mnie chtości kaža, piša, što Cichanoŭskaja — prajekt KDB, što jana skrała 170 miljonaŭ dalaraŭ… Nu, chłopcy, prabačcie, mnie chočacca skazać, [u vas] kukucha adjechała ci što?

Dziadok adznačaje, što jon razumieje, što častka krytyki moža zychodzić ad rasčaravańnia ludziej, jakija pakinuli Biełaruś u 2020 hodzie i spadziavalisia na chutkaje padzieńnie režymu.

«Ja razumieju pa-čałaviečy hetych ubier-krytykaŭ. (…) Mahčyma, heta jany kažuć ad rasčaravańnia, što jany, źjazdžajučy ŭ 2020 hodzie, mierkavali, što heta nienadoŭha, što voś litaralna paŭhodzika, hodzik, potym jašče paŭhodzika — i Śviatłana Cichanoŭskaja skinie režym i na biełym kani zajedzie ŭ Biełaruś».

Adnak były palitviazień daje ćviarozuju acenku situacyi i roli Cichanoŭskaj:

«Dyk voś, ja vam adkryju sakret. Ja chaču, kab mianie ŭsie pačuli. Śviatłana Cichanoŭskaja vam nie skinie Łukašenku. Ale jana robić dobry kavałak pracy dla taho, kab heta mahło być ździejśniena ŭ budučym».

Uzmacniać ci nie sankcyi?

U svaim strymie Dziadok taksama padtrymaŭ mierkavańnie ab nieabchodnaści harmanizacyi sankcyj suprać Biełarusi z sankcyjami, uviedzienymi ŭ dačynieńni Rasii.

U toj ža čas, na jaho pohlad, «treba pakidać dla Łukašenki akienca dla razmovaŭ, davać jamu zrazumieć, što kali jon budzie vypuskać palitviaźniaŭ, to možna hetyja sankcyi i nie paharšać».

Pavodle błohiera, razhladajučy pytańnie ŭzmacnieńnia sankcyj, u pieršuju čarhu nieabchodna dumać ab vyzvaleńni palitviaźniaŭ. U hetym jon salidarny z Taćcianaj Chomič:

«Ja zhodzien zaraz z hrupaj Taćciany Chomič i inšych, jakija ličać, što pieršačarhovaja zadača dla biełaruskaha demakratyčnaha ruchu — heta vyzvaleńnie palitviaźniaŭ. Kali dla vyzvaleńnia palitviaźniaŭ treba ŭzmacnić sankcyi, i heta budzie dziejničać, ja za ŭzmacnieńnie. Kali jość varyjant nie ŭzmacniać, a prosta papužać jaho ŭzmacnieńniem, kab jon vypuściŭ palitviaźniaŭ — nu, značycca tak».

• 4
• 0
• 1
• 2
• 0
• 0
• 0
• 1