Heta situacyja moža stać niebiaśpiečnaj dla biełaruskaha rubla. A praryvu ŭ hetym hodzie nie čakajecca.
Pa vynikach 2024 hoda impart tavaraŭ i pasłuh u Biełaruś pieravysiŭ ich ekspart na 1,3 młrd dalaraŭ, choć u 2023-m krainie ŭdałosia bolš pradać za miažu, čym zakupić dla ŭnutranaha rynku. «Naša Niva» spytała ŭ ekanamista, čamu tak adbyłosia i jakija ryzyki heta niasie dla nasielnictva.
Ekspart pasłuh nie vyratavaŭ
Tradycyjna ŭ Biełarusi bolš impartavali tavaraŭ, čym pradavali za miažu, a z pasłuhami — naadvarot, što ŭ niekatoryja hady dazvalała mieć stanoŭčaje salda ŭ źniešnim handli (u 2023-m jano składała 246 miljonaŭ dalaraŭ).
Ekśpiert BEROC Anastasija Łuzhina adznačaje, što ŭ 2024 hodzie pasłuhi pakazali dobry pryrost.
«Kali ŭ 2023 hodzie dabavačnaje salda pa pasłuhach skłała 2,74 młrd, to pa vynikach 2024 hoda jano vyrasła da 3,4 młrd. Takim čynam hadavy pryrost pa pasłuhach skłaŭ 22%.
Pa tavarach u nas zaŭsiody bałans admoŭny, ale ŭ minułym hodzie situacyja pahoršyłasia i navat značny pryrost pa pasłuhach nie zmoh zbałansavać ahulny pakazčyk», — adznačaje ekśpiert.
Kali ŭ 2023 hodzie minus pa tavarach byŭ na ŭzroŭni 2,5 młrd, to pa vyniku 2024-ha — užo minus 4,7 młrd.
«I što cikava, admoŭnyja tendencyi ŭzmacnilisia mienavita ŭ śniežni minułaha hoda. Kali paraŭnoŭvać pieryjady sa studzienia pa listapad, to my mieli minus 3,7 młrd pa tavarach. Za śniežań admoŭnaje salda pavialičyłasia adrazu na miljard», — źviartaje ŭvahu Łuzhina.
Čamu tak adbyłosia?
Ekśpiert bačyć u hetym niekalki asnoŭnych pryčyn. Na takoje rezkaje paharšeńnie mahli paŭpłyvać jak novyja sankcyi, tak i ŭzrosłyja składanaści z ekspartam na rasijski rynak.
«U śniežni źniziŭsia ŭ hadavym vymiareńni pryrost ekspartu tavaraŭ, a impart ros, pakolki pierad navahodnimi śviatami popyt unutry krainy pavyšajecca.
U cełym pryrost impartu tavaraŭ u 2024 hodzie skłaŭ +6,3% u paraŭnańni z 2023 hodam, a pa eksparcie ŭsiaho 1,2%.
Tut možna kazać pra toje, što na ekspart u 2024 hodzie niehatyŭny ŭpłyŭ akazali sankcyi z boku Zachadu, a taksama nizkija ceny na tyja ž kalijnyja ŭhnajeńni.
Akramia hetaha varta adznačyć, što biełaruskaj pradukcyi stanovicca ŭsio bolš składana ŭtrymlivacca na rasijskim rynku, dzie raście kankurencyja z boku ŭschodnich krain. Da taho ž letaś pačaŭsia praces zapavoleńnie rasijskaj ekanomiki», — kaža Łuzhina.
Kurs rubla moža apynucca pad udaram
Havoračy ab pierśpiektyvach na hety hod, asnoŭnym vyklikam dla biełaruskaj ekanomiki ekśpiert bačyć prablemy ŭ ekanomicy Rasii.
«Ekanomika RF zapavolvajecca, i hety praces budzie vyjaŭlacca chutčej za ŭsio na praciahu hoda. Popyt u tym liku i na biełaruskija tavary adpaviedna budzie nie tak dynamična raści, jak hodam raniej».
Situacyja ŭ ekanomicy, kali kraina maje admoŭnaje salda ŭ źniešnim handli, patencyjna niebiaśpiečnaja dla nacyjanalnaj valuty, choć pakul takoj tendencyi nie nazirajecca.
«Na biahučy momant heta nie akazvaje niehatyŭnaha ŭpłyvu na valutu tolki tamu, što, niahledziačy na admoŭnaje salda, majucca inšyja krynicy, dziakujučy jakim zadavalniajecca popyt. Adnoj z takich vidavočnych krynic jość prodaž valuty nasielnictvam.
Ale nakolki aktyŭna nasielnictva zmoža pradavać valutu sioleta — nieviadoma. Tamu admoŭnaje salda budzie zastavacca faktaram ryzyki dla kursu biełaruskaha rubla», — ličyć ekśpiert.
Ciapier čytajuć
Aryštavali byłoha pamočnika Michaiła Miaśnikoviča10
Aryštavali byłoha pamočnika Michaiła Miaśnikoviča
Ahientka Kardaš vykarystoŭvała seks, kab źbirać infarmacyju pra kalinoŭcaŭ i zavierbavać ukrainskaha kamandzira. A kurataru KDB pisała pra jaho: «Moj łoch»3535
Ahientka Kardaš vykarystoŭvała seks, kab źbirać infarmacyju pra kalinoŭcaŭ i zavierbavać ukrainskaha kamandzira. A kurataru KDB pisała pra jaho: «Moj łoch»35
U Vieniesuele budzie nie prosta vyzvaleńnie palitviaźniaŭ, a amnistyja, pryčym za ŭsie hady. A miascovuju «amierykanku» pieratvorać u hramadskuju prastoru1717
Kamientary