Kandydat na pasadu kanclera Hiermanii abvinavačvaje Maska va ŭmiašalnictvie ŭ niamieckija vybary
Frydrych Mierc, adzin z kandydataŭ na pasadu kanclera Hiermanii, ŭ intervju The Wall Street Journal papiaredziŭ, što Iłan Mask sutykniecca z nastupstvami svajoj padtrymki «Alternatyvy dla Hiermanii».
Niamiecki palityk aburany padtrymkaj Maska ultrapravaj partyi «Alternatyva dla Hiermanii». Amierykanski biźniesmien prasoŭvaje partyju praz svaju sacsietku X, ličyć Mierc.
«Toje, što adbyłosia padčas hetaj vybarčaj kampanii, nie moža zastacca niezaŭvažanym», — adznačyŭ jon u intervju WSJ.
U X Mask nieadnarazova zaklikaŭ hramadzian Hiermanii hałasavać za ŭltrapravuju partyju, maŭlaŭ, heta vyratuje krainu. «Ničoha aburalnaha nie prapanujecca, tolki zdarovy sens», — pisaŭ Mask.
Pry hetym Mierc hatovy dziejańniem adkazać na ŭmiašalnictva Maska ŭ vybary. Niahledziačy na toje, što adna z samych vialikich jeŭrapiejskich fabryk Tesla znachodzicca kala Bierlina.
Na jakija dziejańni hatovy Mierc, jon nie ŭdakładniŭ, ale zaŭvažyŭ, što «ich nastupstvy pakidaje adkrytymi».
«Heta padtrymka vybarčaj kampanii. Ci źjaŭlajecca heta, tak by mović, ekanamičnym raźlikam abo ŭkładam u ADH, nieabchodna vyśvietlić. Toje, što chtości pa-za miežami Jeŭropy ŭmiešvajecca ŭ nacyjanalnuju vybarčuju kampaniju takim čynam, adbyvajecca ŭ pieršyniu», — skazaŭ jon.
Frydrych Mierc — lidar partyi Chryścijanska-demakratyčny sajuz (CHDS), adzin z kandydataŭ na pasadu fiederalnaha kanclera Hiermanii.
Siabie Frydrych Mierc apisvaje jak transatłantysta. U 2000-ja jon pakinuŭ vialikuju palityku i pačaŭ zajmacca biznesam.
Pierad viartańniem u partyju jon uznačalvaŭ «Atłantyčny most», niekamiercyjnuju arhanizacyju, jakaja zajmajecca prasoŭvańniem niamiecka-amierykanskaha siabroŭstva.
Mierc byŭ zaŭziatym krytykam «Alternatyvy dla Hiermanii» i kazaŭ, što nikoli nie staŭ by stvarać kaalicyju z hetaj partyjaj. Ale dva tydni tamu jon unios u parłamient prapanovu suprać imihracyi, jakoje było pryniata tolki dziakujučy hałasam ADH. Za heta palityka mocna raskrytykavali.
Paźniej parłamient Hiermanii bolšaściu hałasoŭ adchiliŭ zakonaprajekt ab uzmacnieńni strohaści mihracyjnaj palityki ŭ krainie.
Apanienty abvinavacili Mierca ŭ tym, što jon złamaŭ brandmaŭer — adzin z hałoŭnych pryncypaŭ niamieckaj palityki, kali ŭltralevyja i ŭltrapravyja partyi nie mohuć pryjści da ŭłady. Z-za hetaha pryncypu ADH padviarhałasia astrakizmu z boku ŭsich inšych partyj z momantu jaje stvareńnia ŭ 2013 hodzie.
Paśla hałasavańnia suprać CHDS uspychnuli pratesty, jakija vymusili Fiederalnaje ŭpraŭleńnie kryminalnaj palicyi, anałah FBR, uzmacnić achovu Mierca.
Zaraz bolšaść apytańniaŭ dajuć ADH krychu bolš za 20% hałasoŭ, što dazvalaje joj zaniać druhoje miesca na vybarach, adstajučy ad CHDS prykładna na 10 punktaŭ.
Kamientary