Špakoŭski daŭ zrazumieć, što znakavych palitviaźniaŭ mohuć vyzvalić pry ŭmovie vyjezdu za miažu
Prapahandyst Alaksandr Špakoŭski adreahavaŭ na rezanansny artykuł The New York Times. U im havaryłasia, što ZŠA rychtujuć ździełku z Łukašenkam: vyzvaleńnie palitviaźniaŭ u abmien na sankcyi na kalij i banki.
Vyzvaleńnie Alaksandram Łukašenkam hramadzianina ZŠA i dvuch biełaruskich palitviaźniaŭ moža stać pieršym krokam da maštabnaj uhody pamiž Vašynhtonam i Minskam. Pra heta, siensancyjna paviedamiła The New York Times, raspavioŭ namieśnik pamočnika dziaržsakratara ZŠA ŭ Jeŭropie Krys Śmit na sustrečy dypłamataŭ u Vilni.
ZŠA takim čynam nibyta nacelenyja na zabieśpiačeńnie dystancyjavańnia Biełarusi ad Rasii.
Špakoŭski źviartaje ŭvahu, što biełaruski bok na aficyjnym uzroŭni zachoŭvaje maŭčańnie, amierykancy taksama nie kamientujuć apublikavanuju infarmacyju.
Špakoŭski miarkuje, što źliŭ infarmacyi pra pieramovy amierykancaŭ z Łukašenkam vydańniu mahli zrabić jeŭrapiejskija dypłamaty, «pieraśledujučy ŭłasnyja mety».
«Kali spasyłacca na artykuł The New York Times, to atrymlivajecca, što ŭ Vilni amierykanski emisar Śmit pravioŭ zakrytuju sustreču ź niejkimi «zachodnimi» dypłamatami, jakija i vystupili ŭ jakaści krynic haziety».
Špakoŭski razvažaje, što chacia «Biełaruś nie handluje sajuźnikami», ale «ciapier idzie hłabalny pieramoŭny praces».
«Zadača kiraŭnika dziaržavy, dypłamataŭ, śpiecsłužbaŭ na źniešnim kontury zaklučajecca va ŭsiebakovaj abaronie i zabieśpiačeńni nacyjanalnych intaresaŭ. Heta aksijoma», — piša prapahandyst.
Aficyjny Minsk, pavodle jaho słoŭ, ź pieršaha dnia vajny va Ukrainie zajaŭlaŭ, što maje namier «u tym ci inšym farmacie ŭdzielničać u kamunikacyi ŭ pytańniach mirnaha ŭrehulavańnia, kab kupiravać pahrozy biaśpieki našaj krainy, jakija zychodziać ad raźviazanaj suprać Biełarusi ekanamičnaj ahresii z pryčyny nibyta «saŭdziełu» ŭ vajnie», — zajaŭlaje Špakoŭski.
Jon apieluje da Pucina, jaki zajaviŭ, «kamientujučy hatoŭnaść Maskvy da pieramovaŭ z Zachadam, što «palityka — mastactva kampramisu».
Špakoŭski piša, što paśla pieramohi amierykanskich pravych Biełaruś i Rasija bolš zmohuć zajaŭlać, što jany — «bastyjon viery, kaštoŭnaściaŭ i tradycyjanalizmu».
«Nastupać buduć maładyja, žorstkija, efiektyŭnyja chłopcy. Takija jak Džej Dzi Vens. Z łozunhami «vyzvaleńnia ad balšavizmu».
Špakoŭski dadaje, što režymu ničoha nie pahražaje, kali hramadstva budzie zhurtavana — zrazumieła, vakoł Łukašenki.
«I ŭ takoj situacyi pa vialikim rachunku jakaja roźnica, dzie (u turmie ci za miažoj) budzie znachodzicca toj ci inšy piersanaž biełaruskaj smuty 2020 hoda? Tamu situacyja ŭ raźvićci», — piša jon pra mahčymy los znakavych palitviaźniaŭ.
Ciapier čytajuć
«Vajna ŭsio śpiša». Biełaruskim udzielnikam hiej-prajda ŭ Vilni pahražali raspravaj ad imia biełaruskich vajaroŭ za vykarystańnie bieła-čyrvona-biełaha ściaha218218
Kamientary