Šrajbman apisvaje varyjanty, jak pry Trampie moža skončycca vajna va Ukrainie

«Padziei apošnich dzion mohuć ździŭlać tolki taho, chto pa iniercyi ličyć prezidenta ZŠA zmaharom za niejki supolny dla Zachadu intares. Takim dziŭnym, ale ŭsio ž stratehičnym sapiernikam Rasii», — piša Arciom Šrajbman u fejsbuku i prapanuje pierastać siabie padmanvać, bo

«supolnaha intaresu kalektyŭnaha Zachadu niama, jak i samoha kalektyŭnaha Zachadu».

«Tramp pradstaŭlaje zusim inšy prajekt, antylibieralny i antyhłabalistyčny. U hetaj baraćbie ŭ jaho jość apanienty ŭ asobie Jeŭrasajuza, Ukrainy, Kanady, inšych mejnstrymnych hulcoŭ, i sajuźniki, nakštałt Orbana, Ficy, ultrapravych partyj Hiermanii, Francyi i tych, što ź imi, i Pucina.

Kali pačać hladzieć na dziejańni Trampa praz hetuju pryzmu — pakrokavaha vybudoŭvańnia partniorstva sa svaim taktyčnym sajuźnikam i ideałahičnym adnadumcam (…), kab razam padarvać libieralny śvietaparadak, to ŭsio stanovicca na svaje miescy i pierastaje vyklikać bieśpierapynny bambiož i adčuvańnie zdradnictva», — davodzić analityk.

Šrajbman zaŭvažaje, što Tramp «byŭ z nami sumlenny, jak nikoli» — adkryta pradstaviŭ svaju prahramu na novy prezidencki termin i nie chavaŭ svaich namieraŭ. Kali chtości ličyŭ jaho pieradvybarčyja zajavy prosta rytorykaj i čakaŭ, što jon budzie pavodzić siabie žarstčej, naprykład, u adnosinach da Pucina, to heta ŭžo ich pamyłkovaje ŭsprymańnie.

Adnak, jak zaŭvažaje analityk u novym vypusku jutub-prajektu «Hadzińničak cikaje», nie ŭsio ŭ rukach Trampa. Realizacyi jaho pamknieńniaŭ mohuć pieraškodzić šerah faktaraŭ: «Ukraina moža nie pahadzicca, (…) jość šaniec, što heta stanie hańbaj dla Amieryki, jak Afhanistan dla Bajdena staŭ, jość šaniec, što Jeŭropa voźmiecca za rozum i niešta budzie rabić».

Pavialičyć

Analityk zaŭvažaje, što niaŭpeŭnienaści ŭ tym, što Trampu ŭdasca realizavać svaje płany pa ŭrehulavańni kanfliktu va Ukrainie, jamu dadajuć i vyniki jaho pieršaha prezidenckaha terminu:

«My možam pahladzieć, jak usie jaho idei pierahavoraŭ zakančvalisia. Pa fakcie jany zmahli dasiahnuć (…) tolki pahadnieńnia pamiž Saudaŭskaj Aravijaj i Izrailem. Usie astatnija pierahavornyja inicyjatyvy Trampa na pieršym terminie skončylisia pa adnoj madeli.

Jon uvachodzić u ich, sprabuje kahości zapałochać, skinuć niejkija dzikija prapanovy, taryfy, niejkija pahrozy, vychady sa ździełak. Potym, naadvarot, rezka mianiajučy ton, sustrakajecca. A potym razumieje, što chutkaha prahresu dasiahnuć niemahčyma, stračvaje cikavaść i idzie ŭ inšy bok».

Šrajbman adznačaje, što tak było ŭ vypadku pieramovaŭ z Paŭnočnaj Karejaj, uviadzieńnia mytnych taryfaŭ na tavary z Kitaja, cisku na Iran.

«I ja dumaju, što heta całkam sabie madel dla jahonaha ŭdziełu va ŭkrainska-rasijskaj vajnie. Pasprabuje, pabačyć, što ŭsio ž taki i hetyja nie zdajucca, i Pucin bolš adsadžany, čym chaciełasia b dumać, i dobra, «varyciesia sami, my pajšli», — davodzić analityk.

Na jahony pohlad, isnujuć dva bazavyja scenary, jak Tramp moža padyści da vyrašeńnia vajny va Ukrainie. Pieršy — heta zaklučeńnie pieramirja na ŭmovach Pucina. Tramp znachodzić bazavyja ŭmovy miru, jakija zadavalniajuć Maskvu, i prapanuje ich Kijevu, jaki pahadžajecca. Pry druhim scenary Ukraina admaŭlajecca ad prynižalnych umovaŭ. Heta daje Trampu mahčymaść zajavić, što nie Pucin pieraškadžaje miru, a Ukraina, i pierastać hetym zajmacca.

«U pieršym scenary Ukraina prynižanaja, Pucin prychodzić praź niekalki hadoŭ, ale heta ŭžo nie prablema Trampa. U druhim scenary heta nie prablema Trampa jašče raniej. Ja dumaju, što voś heta dla jaho bazavaja naładka. Takija dva narmalnyja dla jaho scenary pa vychadzie ZŠA z hetaha kanfliktu — pieradača adkaznaści za jaho jeŭrapiejcam, ukraincam», — davodzić Šrajbman.

U toj ža čas analityk nie ŭpeŭnieny, što ŭsio pojdzie mienavita na hetych dvuch scenarach. Hałoŭnaj pieraškodaj jon ličyć Pucina.

«Dumać, što Pucin taki voś prahmatyk, što jon hatovy prosta za niekalki novych viosak pahadzicca spynicca, nu heta naiŭnaść. Ja dumaju, što ŭ jaho kudy bolšyja płany, i, nie atrymaŭšy pad kantrol ci pad značny taki ŭpłyŭ Ukrainu, jon nie adstupicca. Tamu dumaju, što moža ŭsio pravalicca nie z-za Trampa».

Što tyčycca Trampa, to, jon, na pohlad Šrajbmana, «budzie iści ŭ bok pieramožnaha tvita».

• 9
• 3
• 2
• 5
• 1
• 0
• 0
• 0