«Vaźmicie šapki-ha*donki, pažadana ciomnaha koleru! Termabializnu z saboju!» Voś što znajšli ŭ telefonie źbitaha rasijskaha lotčyka

Žurnalisty ŭkrainskaha kanała «Suśpilnie. Čarnihaŭ» atrymali ŭnikalny dostup da telefona rasijskaha lotčyka źniščalnika Su-34 Alaksandra Krasnajarcava, jaki vyžyŭ paśla taho, jak jaho samalot byŭ źbity abaroncami Čarnihava 5 sakavika 2022 hoda.

U telefonie, jakim mužčyna karystaŭsia z 16 lipienia 2019 hoda da svajho pałonu ŭ sakaviku 2022 hoda, znachodziłasia bolš za 60 hihabajt fota, videa i pierapisak, jakija raskazvajuć pra žyćcio lotčyka da vajny i ŭ čas uvarvańnia. Pryvodzim samaje cikavaje.

Chto taki Krasnajarcaŭ

Major Alaksandr Krasnajarcaŭ — piłot pieršaha kłasa, načalnik pavietrana-ahniavoj i taktyčnaj padrychtoŭki 2-ha źmiešanaha avijacyjnaha pałka 2-j źmiešanaj avijacyjnaj dyvizii VPS Rasii. Ź siamjoj pražyvaŭ u Čalabinsku. U 2016 hodzie jon udzielničaŭ u vajennaj apieracyi Rasii ŭ Siryi.

Ź pierapiski piłota z žonkaj stała viadoma, što rasijski lotčyk u 2021 hodzie mieŭ miesiačny zarobak kala 1750 dalaraŭ.

Padrychtoŭka da vajny

U dadatku Telegram u telefonie Krasnajarcava žurnalisty znajšli rabočuju hrupu rasijskich piłotaŭ «Pieršaja JEPT», jakaja była stvorana ŭ vieraśni 2021 hoda. Hrupa naličvaje 48 čałaviek. Usie jany słužać u 2-m hvardziejskim źmiešanym avijacyjnym pałku, jaki bazirujecca na vajennym aeradromie Šahoł pad Čalabinskam.

Pavialičyć

Źmiest pierapiski raskryvaje płany rasijskaj avijacyi pa padrychtoŭcy da poŭnamaštabnaha ŭvarvańnia va Ukrainu.

21 śniežnia 2021 hoda, amal u 5 hadzin ranicy, namieśnik kamandzira eskadrylli Jaŭhien Kaniščaŭ piša nastupnaje paviedamleńnie:

«Šust, došč, savie, łuka, chitr, łaryk, kałmy, jud, hubajd, bor, kaŭroŭ, vustryca. Hetym piersanažam vyjezd kudy-niebudź zabaronieny. Kali što, na zbor hadzina. I pahnali. Pastaŭcie ŭsie plusy, piersanažy. Što vam daviedziena. Chatnim ni słova pa mahčymaści. A chto nie ŭ śpisie, rot na zamku trymać».

Pavialičyć

2022 hod dla piłota Su-34 Krasnajarcava pačaŭsia z terminovaj telehramy ab navučańni z 11 pa 14 studzienia ŭ Navasibirsku pa asablivaściach bajavoj padrychtoŭki i dziejańniaŭ avijacyi i supraćpavietranaj abarony va ŭmovach uzbrojenych kanfliktaŭ. Da 25 studzienia, jak vynikaje ź pierapiski, Krasnajarcaŭ zastavaŭsia ŭ Čalabinsku. Tam jon prachodziŭ miedycynskaje abśledavańnie.

Paśla hetaj daty ŭsia źmiešanaja avijacyjnaja dyvizija pačała pieramiaščacca da ŭkrainskaj miažy. U rasijskich ŚMI źjavilisia publikacyi pra heta, a ŭ pierapiscy majora z žonkaj Anastasijaj jość paviedamleńnie, dzie jana za jaho chvalujecca.

«Hladžu naviny i stanovicca strašna…» — piša žančyna. Na heta Krasnajarcaŭ adkazvaje: «Usio budzie dobra!!! Nie chvalujsia!!! My razam nazaŭždy!!! I hladzi mienš naviny».

Toje, što Su-34 pierakinuli bližej da miažy z Ukrainaj, zafiksavana na videa ad 18 lutaha 2022 hoda, jakoje źniaŭ na telefon sam Krasnajarcaŭ.

U hety ž čas u telehram-hrupie «Pieršaja JEPT» źjaŭlajecca paviedamleńnie namieśnika kamandzira eskadrylli Kaniščava, jaki zahadvaje lotčykam i šturmanam uziać z saboj vopratku i rečy na zadańnie:

«Pa formie adzieńnia. ŁTA (lotna-techničnaje abmundziravańnie. — NN) zimovaje! Z saboju kambiezy biarom. Na nahach ciopłyja vysotniki! Zapałki, usiu heta zał*pu z saboju! Datyčyć usich, chto źjechaŭ i vylataje zaŭtra! Šapki vaźmicie ha*donki, pažadana ciomnaha koleru! Termabializnu z saboju!»

Sam ža Krasnajarcaŭ zapisaŭ na telefon pasadku An-124-100 «Rusłan» z bartavym numaram RA-82013 na aeradromie Siešča ŭ Branskaj vobłaści. Za niekalki dzion da ŭvarvańnia, 14 lutaha 2022, u hety ž An-124 na aeradromie Piermi hruzili vajennyja viertaloty.

Pavialičyć

Jak vynikaje ź infarmacyi telefona, 22 lutaha Krasnajarcaŭ pačaŭ vyvučać Google-karty ŭkrainskich haradoŭ. Vyśvietliłasia, što jon detalova razhladaŭ vulicy Čarnihava i Kijeva.

Pačatak vajny

Pa słovach žurnalistaŭ, 23 lutaha žonka Anastasija pavinšavała muža i spytała, kali jon vierniecca. Na što mužčyna adkazaŭ: «Chiba što chutka».

Za 24 lutaha ŭ telefonie Krasnajarcava niama nijakaj infarmacyi — ni zvankoŭ, ni paviedamleńniaŭ, ni apaviaščeńniaŭ. Tolki na nastupny dzień jon vyjšaŭ na suviaź z žonkaju i maci. U nastupnyja dni ŭ rabočym čacie abmiarkoŭvajuć pieršyja źbityja rasijskija samaloty.

Žurnalisty pryvodziać pierapisku pamiž Krasnajarcavym i jaho kalehaj Dźmitryjem Sielinym za 2 sakavika 2022 hoda.

«A nakryć tam usio nie varyjant?» — pytajecca Sielin.

«Nie», — adkazvaje Krasnajarcaŭ i dadaje, što «pa mirnych nielha, nie ŭsie tam drennyja».

«Tak zrazumieła, u samoha tam svajaki žyvuć», — pahadžajecca Sielin i prosić pisać čaściej.

«Prarviomsia. Vyhladaje na toje, što dachaty nie skora», — piša Krasnajarcaŭ.

3 sakavika 2022 hoda rasijskija samaloty ŭpieršyniu nanieśli masiravany avijaŭdar pa Čarnihavie. Šeść avijabombaŭ FAB-250 (pa 250 kiłahram kožnaja) patrapili ŭ žyłyja damy. Pad ataku rasijskaj avijacyi patrapili dźvie škoły. Pa danych prakuratury, u hety dzień zahinuła 47 čałaviek.

Pałon

5 sakavika 2022 hoda Alaksandr Krasnajarcaŭ vylecieŭ na šmatmetavym źniščalniku Su-34 z vajennaha aeradroma ŭ pasiołku Siešča ŭ Branskaj vobłaści i nakiravaŭsia na Čarnihaŭ. Adnak padčas zachodu na cel jaho samalot byŭ źbity pieranosnym zienitna-rakietnym kompleksam FIM-92 Stinger, jaki vykarystoŭvali bajcy 105-ha pahraničnaha atrada.

Rakieta patrapiła ŭ ruchavik Su-34, pačaŭsia pažar, samalot hublaŭ vyšyniu. Na borcie Su-34 znachodzilisia šeść niekirujemych avijabombaŭ FAB-500 (pa 500 kiłahram kožnaja). Abłomki samalota ŭpali na pryvatny dom.

Krasnajarcaŭ i jaho šturman Kanstancin Kryvałapaŭ katapultavalisia, ale Kryvałapaŭ zahinuŭ pry pryziamleńni. Krasnajarcaŭ ža vyžyŭ i pryziamliŭsia na dach žyłoha doma. Brat haspadyni doma pasprabavaŭ dahnać piłota, ale Krasnajarcaŭ dvojčy streliŭ u jaho ź pistaleta Makarava. Mužčyna zahinuŭ. Nieŭzabavie rasijski piłot, jaki chavaŭsia ŭ padvale susiedniaha doma, byŭ zatrymany bajcami terytaryjalnaj abarony Ukrainy.

Pavialičyć

Dalejšy los

U pałonie Krasnajarcaŭ prabyŭ da pačatku krasavika, kali byŭ abmienieny na piaciarych ukrainskich piłotaŭ.

26 kastryčnika 2023 hoda sud zavočna prysudziŭ Krasnajarcava da 14 hadoŭ pazbaŭleńnia voli i abaviazaŭ vypłacić 2 miljony hryŭniaŭ maralnaj kampiensacyi siastry zabitaha čarnihaŭca.

Sud paličyŭ dziejańni piłota parušeńniem mižnarodnaha humanitarnaha prava, a značyć, vajennym złačynstvam, a nie naŭmysnym zabojstvam.

U studzieni 2023 hoda Krasnajarcaŭ byŭ zaŭvažany na pryjomie ŭ prezidenta Rasii Uładzimira Pucina, jaki vystupaŭ sa štohadovym pasłańniem Fiederalnamu schodu Rasii. Z tych časoŭ mužčyna nie źjaŭlaŭsia na publicy.

Žurnalisty zmahli pahavaryć z Krasnajarcavym. U razmovie jon śćviardžaŭ, što nikoha nie zastreliŭ, nie viedaje ab vyniesienym prysudzie i ciapier užo nie lotaje.

• 12
• 1
• 3
• 8
• 1
• 0
• 31
• 1