Pamiatajecie asabistaha piłota Łukašenki, jaki trapiŭ u turmu? Voś jak skłaŭsia jaho los
Piłot z 35-hadovym stažam Vadzim Mielnik byŭ prysudžany da 6 hadoŭ kałonii, ale pravioŭ za kratami značna mienš.
Vadzim Mielnik byŭ nadzvyčaj važnaj piersonaj na miažy stahodździa. Piłotam «Biełavija» jon staŭ jašče za savieckimi časami, a ŭ 1990-ja ličyŭsia asabistym piłotam Alaksandra Łukašenki. U pačatku 2000-ch Mielnik staŭ adkazvać za ŭsio biełaruskaje nieba — spačatku jak namieśnik staršyni Kamiteta pa avijacyi (2001-2005), a paśla jak staršynia hetaha kamiteta (2005-2012). Pry hetym jašče praciahvaŭ pieryjadyčna latać jak piłot.
Paśla hetaha Mielnik staŭ dyrektaram avijakampanii «Transavijaekspart». U hetym statusie jaho i aryštavali ŭ krasaviku 2015 hoda. Jaho abvinavacili ŭ machlarstvie i dačy chabaru.
Pavodle viersii siłavikoŭ, Mielnik vyrašyŭ skarystacca tym, što zamiežniki chacieli kupić «Transavijaekspart», i prapanavaŭ svaje pasłuhi, kab być pasiarednikam — pahavaryć z kim treba i pieradać hrošy kamu treba. Choć nasamreč, maŭlaŭ, nie moh nijak upłyvać na situacyju.
Byłomu piłotu prysudzili 6 hadoŭ z kanfiskacyjaj majomaści i adpravili ŭ viciebskuju kałoniju dla čynoŭnikaŭ, siłavikoŭ i biznesmienaŭ. Bolš pra Mielnika publična nichto nie ŭzhadvaŭ.
«Kibierpartyzany» padzialilisia z «Našaj Nivaj» vypiskaj z baz, ź jakich možna zrabić vysnovu pra toje, što dalej adbyvałasia ŭ žyćci Vadzima Mielnika.
Za kratami jon pravioŭ prykładna pałovu pryznačanaha terminu. Ničoha dziŭnaha ŭ hetym niama — Mielnik moh patrapić pad niekalki amnistyj i ŭrešcie atrymać umoŭna-daterminovaje vyzvaleńnie. Na svabodzie jon apynuŭsia ŭ 2018 hodzie.
Tady ž jaho ŭziali na pracu ŭ kampanii «Rusałan», jakaja zajmałasia kansultavańniem pa pytańniach kamiercyjnaj dziejnaści i kiravańnia.
U 2019-2020 Mielnik pracavaŭ u Biełaruskim navukova-daśledčym instytucie transpartu «Transtechnika». Dalej u bazach jość paznaka, što ŭ 2020-2021 jon byŭ rabotnikam «Minskkamunciepłasietki», paśla čaho narešcie viarnuŭsia da avijacyi.
U 2021-2022 Mielnik pracavaŭ u kampanii «Alfa Aryjon», śpiecyjalizacyja jakoj — vytvorčaść bieśpiłotnikaŭ. A ŭ 2022 hodzie jon vykładaŭ u Minskim dziaržaŭnym vyšejšym avijacyjnym kaledžy.
U kancy 2022 hoda Vadzim Mielnik pamior. Jamu było 63 hady.
Ciapier čytajuć
«Niejkaja Liza, jakoj 20 hadoŭ, sudzicca z Łukašenkam» — vialikaja hutarka z novaj vice-śpikierkaj KR Lizavietaj Prakopčyk10
Kamientary