Ź Izraila vysłali dvuch rasijan, jakija vydavali siabie za ŭkrainskich žurnalistaŭ. Jany sprabavali ŭziać intervju ŭ Andreja Makareviča
Izrailskaja palicyja zatrymała dvuch rasijan, jakija vydavali siabie za supracoŭnikaŭ ukrainskaha infarmahienctva UNIAN. Zatrymańnie adbyłosia paśla taho, jak adzin z padazravanych pasprabavaŭ arhanizavać sustreču ź viadomym muzykantam Andrejem Makarevičam.
Pavodle infarmacyi Newsru.co.il, mužčyna, jaki pradstaviŭsia žurnalistam ukrainskaha ahienctva UNIAN Ramanam Skibaj, źviazaŭsia z žonkaj muzykanta Ejnat Klajn pad vyhladam padrychtoŭki materyjału pra siamiejnyja turystyčnyja prajekty. Pavodle jaho słoŭ, vydańnie nibyta zacikaviłasia vinahradnym biznesam siamji Makareviča. Jon śćviardžaŭ, što znachodzicca ŭ Izraili, i prasiŭ sustreču dziela intervju.
Adnak u Ejnat Klajn uźnikli sumnievy nakont sapraŭdnaści jaho asoby. Spačatku jon pamyłkova nazvaŭ ahienctva, jakoje nibyta pradstaŭlaje, — «Union». Paśla taho jak na pamyłku jamu było ŭkazana, jon dasłaŭ «paśviedčańnie» žurnalista, u jakim byli vidavočnyja pamyłki, u tym liku ŭ napisańni nazvy ahienctva na ŭkrainskaj — «UNIAN» zamiest pravilnaha «UNIAN». Na dakumiencie stajała piačatka Zaparožskaj haradskoj rady.
Redakcyja UNIAN paćvierdziła, što takoj asoby ŭ štacie niama, i paviedamiła pra incydent ukrainskim pravaachoŭnym orhanam. U Izraili vydavańnie siabie za inšuju asobu, asabliva z metaj atrymańnia intervju, ličycca kryminalnym złačynstvam. Akramia taho, zamiežnyja žurnalisty abaviazanyja mieć akredytacyju ŭ Dziaržaŭnym pres-biuro Izraila.
Sam Andrej Makarevič prakamientavaŭ situacyju ŭ fejsbuku:
«Piša majoj žoncy nibyta ŭkrainski žurnalist. Nibyta z pavažanaha ahienctva UNIAN, prosić sustrečy z nami. <…> Žonka prosić dasłać paśviedčańnie. Paśviedčańnie ź dzikimi pamyłkami va ŭkrainskaj movie (pačynajučy z nazvy ahienctva), ź piačatkaj čamuści archiva Zaparožskaj haradskoj rady. <…> I jašče — ad frazy «žurnalista» «Adpracoŭvajem aktualnuju paviestku pa Hazie» paviejała takim hebešnym kabinietam, što my źviarnulisia ŭ palicyju».
Padazronyja asoby byli apieratyŭna zatrymanyja izrailskaj palicyjaj i departavanyja ŭ Rasiju.
Jak vyśvietliła vydańnie «Ahientstvo», Raman Skiba rodam z Charkaŭskaj vobłaści, u 2023 hodzie atrymaŭ rasijskaje hramadzianstva. U kantaktach znajomych jon fihuruje jak «redaktar NTV» i «supracoŭnik Pieršaha kanała». Pavodle sacyjalnych sietak i ŭciečak, da siaredziny 2010-ch hadoŭ jon žyŭ va Ukrainie i pracavaŭ barmenam. Z 2016 hoda ŭ svaich akaŭntach paznačaje, što žyvie ŭ Maskvie. Pavodle najaŭnych źviestak, jon moh być źviazany z rasijskim telebačańniem prynamsi z 2020 hoda.
Varta adznačyć, što rasijski telekanał NTV rehularna vypuskaje siužety i filmy pra dziejačaŭ kultury, jakija vyjechali z Rasii i asudzili ŭvarvańnie va Ukrainu — siarod ich i Andrej Makarevič.
Chrysta Hrozieŭ: Mielnikava jak minimum hod, a chutčej za ŭsio, paŭtara pieradavała infarmacyju biełaruskim śpiecsłužbam36
Kamientary