Z-błohiery paviedamlajuć pra niaŭdačy rasijskich vojskaŭ na Danbasie
Adrazu niekalki rasijskich pravajennych błohieraŭ paviedamili, što rasijskija vojski zatarmazili svoj nastup na klučavych kirunkach u Danieckaj vobłaści, zaŭvažyła vydańnie «Važnyje istorii».

«Pad Pakroŭskam usio vielmi składana, vybivajuć łahistyku, niama ludziej. Pad Časavym Jaram ledź idziem napierad, ale taja ž karcina — vybivajuć łahistyku, niama ludziej. Pa Tarecku — haradskija bai, USU kontratakujuć. Praciahvajem viešać łapšu načalstvu na ŭsich uzroŭniach. Karcina — niama ludziej, vybivajuć łahistyku», — paviedamiŭ Z-kanał «BČ 3».
Tak, na levym fłanhu ad Pakroŭska USU viaduć kontrnastupalnyja dziejańni, u toj čas jak rasijskija sałdaty «adyšli z šerahu pazicyj, źbierahajučy asabovy skład», piša blizki da Hienštaba US RF telehram-kanał «Rybaŕ».
Vajenkar Kacianok pieradaje, što ŭkrainskim vojskam udałosia «značna zatarmazić nastupleńnie US RF, a miescami i paciaśnić», jak u rajonie Udačnaha i Kotlina na paŭdniovym zachadzie ad Pakroŭska, a taksama zamacavacca ŭ pramzonie Piasčanaha i vyjści da ŭskrain Šaŭčenki na poŭdni.
«Na levym fłanhu Pakroŭskaha frontu situacyja vielmi ciažkaja. U Tarecku — ciažkaja […] Niahledziačy na paviedamleńni MA RF ab vyzvaleńni Tarecka, US RF nie vałodajuć horadam całkam. U Časavym Jary pazicyjnyja bai, navin praktyčna nie pastupaje», — piša prapahandyst Aleh Caroŭ.
U Tarecku USU taksama ściahnuli reziervy i kontratakujuć, «vidavočna, ukliniŭšysia ŭ našu abaronu, a niekatoryja ŭčastki zabudovy tak i nie byli ŭziatyja», adznačaje «Rybaŕ». Z-kanał «Fiłołoh v zasadie» patrabuje pryciahnuć da adkaznaści tych u Minabarony RF, chto 7 lutaha daŭ spravazdaču ab poŭnym uziaćci horada.
Ukrainskija aficyjnyja asoby i telehram-kanały, OSINT-prajekt DeepState i amierykanski Instytut vyvučeńnia vajny (ISW) paćviardžajuć zapavoleńnie prasoŭvańnia US RF u Danieckaj vobłaści.
«My bačym, što jany vysilvajucca. I jany hetaha nie chavajuć. Asobnyja [prapahandysty] kažuć, što ŭ ich nie chapaje asabovaha składu, dronaŭ, KABaŭ», — kaža pradstaŭnik apieratyŭna-stratehičnaj hrupoŭki «Chorcica» Viktar Trehubaŭ.
ISW u štodzionnaj spravazdačy 6 sakavika apublikavaŭ karty, ź jakich vynikaje, što USU prasunulisia ŭ rajonie Tarecka i pad Pakroŭskam.
«Našy značna pašyryli zonu kantrolu kala Šaŭčenki, ciapier majem taktyčnyja pośpiechi», — piša bajec USU z pazyŭnym «Mučnoj».
Na karcie DeepState nievialikaja častka zachoplenych US RF učastkaŭ na levym fłanhu ad Pakroŭska za apošni tydzień pierajšła ŭ šeruju zonu.
U kancy lutaha ŭkrainskija vajskoŭcy i analityki paviedamili pra paharšeńnie apieratyŭnaha stanovišča US RF u rajonie Pakroŭska.
«Padziei na Pakroŭskim kirunku, miarkujučy pa ŭsim, usio bolš pačynajuć nabyvać davoli niehatyŭny dla praciŭnika charaktar. Pieršyja «zvanočki» taho, što situacyja tam moža pamianiacca kardynalnym čynam, užo źviniać», — pisaŭ ukrainski vajskovy ahladalnik Kanstancin Mašaviec.
Sa słoŭ analityka, kala dvuch tydniaŭ rasijskija vojski ŭ rajonie siołaŭ Kotlina, Udačnaha, Uśpienaŭki i Piasčanaha nie mahli prasunucca napierad, niahledziačy na toje, što ŭvieś čas pravodziać ataki i šturmy.
Napiaredadni Rasija i ŭvohule prypyniła bolš čym na tydzień nastup na poŭdzień i paŭdniovy zachad ad Pakroŭska, choć kala horada i na prylehłych kirunkach razhornutyja čatyry rasijskija ahulnavajskovyja armii.
U kancy studzienia prezident Ukrainy Uładzimir Zialenski pryznačyŭ na Pakroŭski kirunak adnaho z samych maładych i pierśpiektyŭnych hienierałaŭ — kamandujučaha Suchaputnymi vojskami USU Michaiła Drapataha. Jon udzielničaŭ u vyzvaleńni Chiersona i adkazvaŭ za paśpiachovuju abaronu pad Charkavam letam 2024 hoda.
USU viarnulisia ŭ centr Tarecka i stvaryli pahrozu atačeńnia rasijskaj hrupoŭki ŭ horadzie
Ukrainskija desantniki adbili važny pasiołak pad Pakroŭskam
Ukrainskija vajskoŭcy vyzvalili siało ŭ Danieckaj vobłaści
Ukraincy pravodziać paśpiachovyja kontrataki na Pakroŭskim napramku
Hod Syrskaha. Jak vajuje ŭkrainskaja armija z hetym hałoŭnakamandujučym
Hieroj vyzvaleńnia Maryupala ŭ 2014-m staŭ kamandujučym Suchaputnymi siłami USU
Kamientary