Ad 300 000 da 500 000 dalaraŭ. Stała viadoma, chto pryvioz Džejsana Deruła ŭ Biełaruś

Chto taki Džejsan Deruła i što jon rabiŭ u Minsku?

Džejsan Deruła — amierykanski śpiavak, aŭtar piesień, akcior, muzyka i tancor. Na jaho rachunku 13 płacinavych sinhłaŭ, bolš za 7 miljardaŭ prahladaŭ klipaŭ na jutubie i bolš za 38 miljonaŭ padpisčykaŭ u instahramie. Jon viadomy svaim trekam Take You Dancing, a taksama duetami ź Niki Minaž, Snup Doh, Pi Dzidzi i Maroon 5.

U Minsk Deruła prylataŭ, vidać, na mierapryjemstva bara «Mama Styflera». Akramia hetaha, jon sustreŭsia z premjer-ministram Alaksandram Turčynym, jakomu raskazaŭ pra dobryja ŭražańni ad Minska i pryznaŭsia, što «chacieŭ by tut nabyć druhi dom» (Turčyn u adkaz paabiacaŭ «dapamahčy» ŭ hetym pytańni).

Taksama śpiavak pryjšoŭ na sustreču ź Viktaram Łukašenkam — starejšym synam Alaksandra Łukašenki i prezidentam Nacyjanalnaha alimpijskaha kamiteta. Pa słovach muzyki, abmiarkoŭvałasia praviadzieńnie šou ź jaho ŭdziełam u kastryčniku i jon «budzie rady, kali ŭdasca vystupić u stalicy Biełarusi».

Pavialičyć

A jašče muzyka daŭ intervju dziaržkanału «Biełaruś 1», u jakim raskazaŭ, što jamu vielmi padabajecca Biełaruś, i pachvaliŭ pieśniu małaviadomaj vykanaŭcy Naści Kraŭčanki, ź jakoj jana źbirajecca na konkurs «Interbačańnie» ŭ Maskvie.

Što za bar jaho zaprasiŭ?

Niekalki dzion zapar Deruła źjaŭlaŭsia na afišach minskaha bara «Mama Styflera», raźmieščanaha na tusovačnaj vulicy Zybickaj. Praŭda, pra vystupleńnie havorki nie išło. Anonsy byli składzienyja ŭ davoli abciakalnych farmuloŭkach: «Z nami adpačyvaje suśvietnaja zorka», «Viečarynka z zorkaj suśvietnaha maštabu».

Pa ŭsioj bačnaści, amierykaniec prosta prysutničaŭ va ŭstanovie. U tyktoku jość niekalki videa taho, jak Deruła niešta pje ŭ kłubie — i na hetym usio.

Składana skazać, jaki hanarar artyst paprasiŭ za svajo źjaŭleńnie. Pradziusarskaje ahienctva BnMusic pakazvaje, što startavaja staŭka za vystup Deruła składaje prykładna ad 200 000 da 350 000 dalaraŭ ZŠA.

Amierykanskaje bukinh-ahienctva Celebrity Talent International pryvodzić prykładny dyjapazon: ad 300 000 da 500 000 dalaraŭ za vystup ci prosta źjaŭleńnie Džejsana Deruła na pryvatnaj viečarynie abo karparatyŭnaj padziei.

Bar «Mama Styflera» nazyvaje siabie «samaj papularnaj tusovačnaj ustanovaj na vulicy Zybickaja ŭ Minsku». Kamanda asobna padkreślivaje, što tam dziejničajuć dres-kod i fejs-kantrol.

Jak daviedałasia «Lusterka», bar naležyć pradprymalnikam Dźmitryju Sinkieviču i Daniłu Karpoviču. Pra ich nie tak šmat publičnych źviestak.

Dźmitryj — adnafamilec viadomaha biznesmiena Piatra Sinkieviča, saŭładalnika Expobel i hanarovaha konsuła Nikarahua. Adnak, miarkujučy pa imieni pa baćku, Dźmitryj nie davodzicca synam Piatru, i dastupnyja danyja nie dazvalajuć skazać, ci jość pamiž imi jakaja-niebudź inšaja svajackaja suviaź.

U kožnym vypadku, vyhladaje małavierahodnym, kab bar, chaj i davoli bujny, moh dazvolić sabie samastojna apłacić vizit zorki koštam u sotni tysiač dalaraŭ. Ale chto tady heta zrabiŭ?

Vierahodny adkaz možna znajści ŭ sacsietkach Deruła.

Z kim Deruła sustreŭsia pierš za ŭsio?

Cikava, što jašče 22 lipienia — vidavočna, adrazu paśla prylotu — Džejsan Deruła sfatahrafavaŭsia z tureckim biznesmienam Mustafoj Ehiemienam Šenieram. U toj momant jany abodva znachodzilisia ŭ minskim restaranie «Hości», što vidać pa łahatypie na mieniu na stale.

Hety zdymak źjaviŭsia ŭ storys ananimnaha instahram-akaŭnta ź nikam 0009ege, paśla jaho pierapościli sam Deruła i profil restarana.

Pavialičyć

Mustafa Ehiemien Šenier — aficyjny ŭładalnik biełaruskaha TAA «Hulniavy kartel», jakoje staić za minskim kazino H CASINO. Hetaja ŭstanova, raźmieščanaja ŭ hateli DoubleTree by Hilton na praśpiekcie Pieramožcaŭ u Minsku, nazyvaje siabie «samym vialikim kazino ŭ Biełarusi».

Pavodle danych servisu «Kartateka», u 2024 hodzie čysty prybytak kazino skłaŭ 6,4 miljona rubloŭ, a ŭ rekordnym 2022 hodzie pieravysiŭ 25 miljonaŭ rubloŭ.

Raniej žurnalisty-rasśledvalniki nazyvali Šeniera hramadzianinam Turcyi, adnak u Adzinym dziaržaŭnym rehistry jurydyčnych asob i indyvidualnych pradprymalnikaŭ krainaj jaho hramadzianstva paznačanaja Biełaruś.

Pavialičyć

U lutym 2025 hoda Biełaruski rasśledavalnicki centr vypuściŭ materyjał, u jakim havaryłasia, što ŭ jahonym kazino admyvali sotni miljonaŭ jeŭra z usioj Jeŭropy, sabranyja praź nielehalnyja staŭki. Heta paćvierdziŭ Džemil Anał — były finansavy dyrektar źviazanaj z Šienieram kampanii, jaki na momant intervju znachodziŭsia ŭ niderłandskaj turmie, a 1 maja byŭ zabity.

Pa infarmacyi rasśledavalnikaŭ, pa ŭsioj Jeŭropie dziejničała sietka pa abnajaŭlivańni dachodu ad nielehalnych stavak. Dalej najaŭnyja pryvozili ŭ Biełaruś i ŭnosili ŭ kasu minskaha H Casino pad vyhladam projhryšu hulcoŭ. Nielehalny dachod vydavali za prybytak hulniavoj ustanovy, paśla čaho hrošy farmalna stanavilisia «čystymi».

Džemil Anał zajaviŭ u razmovie z žurnalistami, što H Casino «kryšavaŭ» były siłavik. Pa fota jon apaznaŭ Vitala Macisa, byłoha supracoŭnika Słužby biaśpieki Alaksandra Łukašenki.

Rasśledavalniki pry dapamozie «Kibierpartyzan» vyśvietlili, što dyrektar H Casino Andrej Pracharenka pierasiakaŭ miažu razam z Macisam jak minimum 62 razy. Sam Pracharenka ŭ telefonnaj razmovie z žurnalistam zajaviŭ, što Macis «nikoli ŭ žyćci nie pracavaŭ» u jahonym kazino, taksama jon nie viedaŭ pra admyvańnie hrošaj ad nielehalnych stavak.

Lubić zorak i nie lubić viadomaść

Tureckaje anłajn-vydańnie Türk dünyası jašče ŭ 2021 hodzie źviartała ŭvahu, što Šenier pryvoziŭ u Minsk tureckich zorak i apłačvaŭ dla ich pieraloty. Tady ŭ śpievaka Ibrahima Tatłysiesa było zapłanavana piać kancertaŭ u Biełarusi z sumarnym hanararam u try miljony dołaraŭ. Publikacyja ŭ tureckim vydańni paśla była vydalenaja.

Miarkujučy z afišaŭ, u rozny čas u kazino vystupali taksama tureckija znakamitaści Sibiel Džan, Linet, Chande Jenier, Ališan, rasijskija artysty Luboŭ Uśpienskaja, Uładzimir Praśniakoŭ i ŭkrainka Śviatłana Łabada.

Šienier nie viadzie publičnych akaŭntaŭ u sacsietkach. Adnak na roznych płatformach jość mnostva falšyvych błohaŭ, jakija padpisanyja jahonym poŭnym imieniem. Jon nibyta fud-błohier, padarožnik, prahramist i śpiecyjalist pa budaŭnictvie.

Pavialičyć

Ich kantent całkam zhienieravany pry dapamozie niejrasietki. Vierahodna, stvaralnik hetych staronak chacieŭ zrabić tak, kab infarmacyju pra biznesmena było składana znajści praz pošuk, upisaŭšy jaho imia. 

• 2
• 3
• 0
• 5
• 2
• 0
• 8
• 0