Bieły dom surjozna adreahavaŭ na źjedlivuju parodyju na Donalda Trampa ŭ novaj sieryi multsieryjała «Saŭt-park» (South Park), dzie Satana adchilaje luboŭnyja zamachi «Trampa», bo ŭ taho — mały pienis. Pres-sakratarka Biełaha doma zajaviła, što hety sieryjał užo daŭno nikomu nie cikavy, a jahonyja stvaralniki vydajuć niaśmiešnyja siužety, piša Bi-bi-si.
Novaja sieryja «Saŭt-parka» — pieršaja paśla dvuchhadovaha pierapynku i pieršaja ŭ 27-m siezonie — vyjšła na kanale Comedy Central u hetuju sieradu.
Uvohule ŭ hetaj novaj sieryi aŭtary abvinavačvajuć niadaŭnich prychilnikaŭ Trampa ŭ kryvadušnaści, a samoha Trampa — u dvudušnaści i karyślivaści.
Ścieny Biełaha doma ŭ multfilmie zaviešanyja partretami aholenaha Trampa ŭ karaleŭskich mantyjach, sam Tramp, raspranajučysia dahała, skača ŭ svajoj spalni ŭ łožak da Satany, a toj adchilaje jaho luboŭnyja zamachi.
Kali premjer-ministr Kanady pratestuje suprać uviedzienych Trampam pošlin, toj zajaŭlaje, što razbambić Kanadu, «jak tolki što razbambiŭ Irak».
«Mnie zdajecca, ty bambiŭ Iran», — adznačaje kanadziec.
«A, Irak, Iran — jakaja roźnica!» — adkazvaje Tramp.
Sieryja zakančvajecca «rekłamnym rolikam» Trampa, abaviazak pakazvać jaki mulciašny Tramp naviazvaje žycharam Saŭt-Parka, što paŭstali suprać jaho.
U roliku — užo nie multyplikacyjnym — stvorany ŠI Tramp brydzie pa pustyni, pastupova zryvajučy ź siabie ŭsiu vopratku, uračysty hołas za kadram apaviadaje, jaki jon advažny i metanakiravany. Zatym užo zusim hoły Tramp padaje, z-za vializnaha žyvata vyhladaje pienis z vočkami i hučyć finalnaja fraza: «Tramp. Jaho pienis — mizerny, ale jaho luboŭ da nas — vielizarnaja!»
Namieśnica pres-sakratarki Biełaha doma Tejłar Rodžers, kamientujučy hetuju parodyju, zajaviła, što «Saŭt-park» nikomu nie cikavy ŭžo 20 hadoŭ i «vydaje banalnyja idei, adčajna sprabujučy pryciahnuć da siabie ŭvahu».
«Prezident Tramp usiaho za paŭhoda vykanaŭ bolš abiacańniaŭ, čym luby inšy prezident u historyi našaj krainy, i nijakaje treciasortnaje šou nie pierabje šerah pieramoh prezidenta Trampa», — skazała Tejłar Rodžers.
Stvaralniki «Saŭt-parka» Met Stoŭn i Trej Parkier u čaćvier na fiestyvali Comic-Con u San-Dyjeha raspaviali, što jany čatyry dni spračalisia z pradziusarami, zacierci pienis ci nie. Tyja patrabavali zacierci. U vyniku Stoŭn i Parkier, pa ich słovach, vyrašyli prymalavać pienisu vočki, kab paźbiehnuć zacirańnia.
Pazoŭ, zvalnieńnie, źlićcio
Usiaho niekalki dzion tamu Stoŭn i Parkier padpisali z uładalnikami kanała Comedy Central, kampanijaj Paramount, damovu ab ekskluziŭnych pravach na pakaz sieryjała pa ŭsim śviecie na sumu 1,5 miljarda dalaraŭ.
U hety samy čas Paramount damahajecca ad urada zhody na šmatmiljardnuju ździełku — źlićcio z kampanijaj Skydance.
Paramount taksama vałodaje telekampanijaj CBS, i ŭ hetym statusie na pačatku lipienia vyrašyła vypłacić 16 miljonaŭ dalaraŭ, kab nie davodzić da suda isk Trampa z nahody adredahavanaha intervju Kamały Charys, vypuščanaha ŭ efir pierad listapadaŭskimi vybarami.
Palityki z Demakratyčnaj partyi zajavili, što heta byŭ drenna zamaskiravany chabar Trampu, kab toj nie pieraškadžaŭ źlićciu.
Maniera Trampa padavać pazovy na vielizarnyja sumy taksama abyhrana ŭ novaj sieryi «Saŭt-Parka».
Na minułym tydni CBS abviaściła pra zakryćcio papularnaha viadučaha viačerniaha šou Styviena Kolbiera, jaki vostra krytykavaŭ Trampa. Kampanija zajaviła, što robić heta pa finansavych pryčynach, ale apanienty joj nie pavieryli.
Tolki žminda i lanivy nie padtrymlivaje «Nivy»! Vy možacie za chvilinu padtrymać «NN» padachodnym, nie patraciŭšy ni kapiejki svaich5
Kamientary
Pra chłuśniu, łahičnyja niesupadzieńni, pravy čałavieka, niedamovazdolnaść, zdradu chaŭruśnikaŭ i h.d. - zanadta składana. A pra dyk jasna ŭsim.